Read Rongmei Naga ISAIA 60 Bible Online

ISAIA 60 - Rongmei Naga bible

ISAIA 60

¹Thau tho, he Jerusalem, neihmik kumcna gaanc tho; RINGHPOUC hym nang ruc khou gaanclou bam the!

²Baihmei zaatc nunc ta tei zinghmei rui gumbin bam puni; tiki nang ruc khou thu RINGHPOUC riw gaanclou puni; kahym titah tamei riw tei nang khou how puni.

³Zaatc nunc tei nang riw khou khatni guangh nunc rui nang tuang tingthan patmei gaanhriw khou nzwan guang puni.

⁴Nang mik phaengc patna zauc nkuayna zauc zauc o: nang mei nunc tei kai guang dat khang guang kaduai bam the! Nang nac mpouh nunc duh thangc rui guang puni the, khatni nang nac aluhpui nunc ta ngana ta kumc pamclouna guang puni the.

⁵Nang mi hei zauc lana neihlamei rui padik puni the; nang zaenggay langvna kadunh puni the. Zaatc nunc tuang lanv guay nang khou phungc guang puni the; duipui paengc thangc rui kaniw tuang lanv guay guang puni the.

⁶Puatc phunghmei guaikuan kangdai Midian khatni Epha khou rui guang puni. Kaniw tei kachaekc khatni agaw phungcna Sheba khou rui guang puni. RINGHPOUC rui taancloumei gaychamv tei meic nunc rui kauc ndauh puni!

⁷Kedar khatni Nebaiot tuang lauziu guay tei khaeng khang nang khou phungc guang puni kumna RINGHPOUC ta tipian khang khaenglou puni. RINGHPOUC rui katuang Ravkai hym tidaic mbulou puni.

⁸Muanghbangv samh kumc, akhouhna pang kazy bamv nzwanna samc guang kumc, guangmei rungh guay hei tabui kumhmei rungc cho?

⁹Mi hei duh thangc rui ata nkhwan puni, Tarsismei rungc rui huliang puni Isaraelmei tuang nthanmei Racguangc, zaatc guayna ta kamei nunc ta chakhwang tiswloumeipu, RINGHPOUC zanc ta ngamvziw sw khang kaniw daandi kachaekc ni phungc guang e.

¹⁰RINGHPOUC rui Jerusalem khou sa e, “Zaatc baihmei nunc rui nangniw tuang raengh kasiamh puni, khatni kaniw guangc nunc rui nang siamruai sw puni. Alungpuamcna ai nang ta riap the, tiki ntaw thu ai nang ta zauc nzianlou dat puni the.

¹¹Zaatc nunc tuang guangh nunc kaniw tuang lanv phungc guang bam diu khang, zingbangc kalaanv nang tuang raengckat guay laanc bam puni the.

¹²Nang siamruai sw makmei zaatc nunc ta thu swkamut kamailou puni.

¹³“He Jerusalem, nang ta kasiamh dat khang, atuang Ravkai howgayna kasiamhlou khang, atuang kaidai kahym tidaiclou khang, luthing, juniper thing, saipres thing, khatni Lebanon ngouc khou rui gay liangmei thing phungc guang puni.

¹⁴Nang ta rairiumei nac nunc tei guangna nang hu khou nkhum keyna kalum puni. Nang ta mala bammei guayna tei nang phaypav bangc khou kalum puni. Kaniw rui nang ta ‘RINGHPOUC tuang Kaidai,’ ‘Zaion, Isaraelmei tuang nthanmei Racguangc tuang Kaidai’ twna kaw puni.

¹⁵“Meic lungctaekna ganc rimh rimlou bammei kaidai nang ti hei ganclou dat lak khe khatni karaeng bam dat lak khe.

¹⁶Nang zaatc baihmei nunc noudui zangv puni the guangh nunc rui nang ta makuat puni the; RINGHPOUC ai rui nang ta kanlou the, Isaraelmei tuang Ngammeipu Racguangc rui nang ta rylou the twmei nang thay puni the.

¹⁷“Tanzinc phaan kachaekc, ntanh phaan daandi, thing phaan tanzinc, ntauh phaan ntanh ai rui nang khang tiguang puni the. Nang tuang dihsinpouc nunc rui nang ta rai dat lak khe; nchumhna khatni nchu-nzaenghna nang ta sin khang ai rui tiswlou puni the.

¹⁸Abiw adowmei khwan nang kandic khou chu dat lak khe; swkamut kamaimei rui nang kandic ta sw kasic karouclou dat lak khe. Ai rui nang ta raengh kumc gaeklou puni; ai rui nang ta kanloumei khang tei nang ata thuanc puni.

¹⁹“Kalaanv chaeng neihmik rui, zingbangc chaeng bw rui, nang khang gaanhmei sw bam dat lak khe; RINGHPOUC ai rui nang tuang tingsaeng gaanhmei sw puni the; ahym riw rui nang ruc khou gaanclou puni the.

²⁰Nang khang neihmik key dat lak khe, nang khang bw ni key dat lak khe; RINGHPOUC hei nang khang tingsaengzaeng riw sw bam puni the, kumna nang tuang ryanra zaengsimei ganv guay tei luai kan puni the.

²¹Nang mei nunc rui nchumhna lungc puni the, kumna mi kandic hei tingsaeng kaniw tuang sw puni the. Meic guayna khou ahym ndauh khang ai rui kaniw ta lingclou the, ai rui kaniw ta kasiamhlou the.

²²Nang tuang nthyam liang, liangmei kaikhunc nganvna ngamv naimei zaat akhat di daic pat puni the. Kaganv tei guang pwkhou, ai rui mi hei katumcna tiguang tangc puni the. Ai hei RINGHPOUC e!”