Read Rongmei Naga ISAIA 62 Bible Online

ISAIA 62 - Rongmei Naga bible

ISAIA 62

¹Jerusalem ta ai katiu thau puni, reih rei bam lak ge; kata kanlou kan mak saanv ai reih rei bam lak ge, khatni katuang rihngammei zingbangc mairam gaanh kumc gaanc pat mak saanv nthaekc lak ge.

²He Jerusalem, nang rihngammei ta zaatc nunc rui how puni! Kaniw tuang guangc guay rui nang hym how puni. Nang ta zanh thanc phuaklouna kaw puni, RINGHPOUC rui phuakloumei zanc rui kaw puni.

³Nang hei RINGHPOUC khang howgaymei guangh pyrun kumc puni the.

⁴Nang ti hei “Gancloumei” twna kaw dat lak khe, nang kandic ta ni “Muloumei now” twna kaw dat lak khe. nang zanc thanh kiu “Ravguangc rui Kata Hephziba” twna kaw puni the. Nangniw kandic ta tei “Neihlana Now suanmei” twna kaw puni the, kalam thu RINGHPOUC rui nang ta pian the, kamei hei nang kandic khang gaanv kumc puni the.

⁵Nggaanv rui liuchangc ta kanow khang laamei kumc, nang ta kasiamhloumeipu rui nang ta kanow khang laa puni the. Nowpouc rui nowpeic ta neihlamei kumc nang Racguangc rui nang ta neihla puni the.

⁶He Jerusalem, nang tuang raengh ruc khou ai rui rigaanvmei nunc lou kan the; zingbangc kalaanv kaniw tei reih reina bam lak khe. Kaniw rui RINGHPOUC khou kalatdyng guay tiningtow bam puni the. Kumna kaniw rui mi guay tei kata ti-amuc key lak khe.

⁷Kamei rui Jerusalem ta kasiamh thaulou dat mak saanv khatni mi hei kandih kapwm rui thuanc bammei kaidai tiswlou mak saanv kaniw rui kata ti-nthaekc lak ge.

⁸RINGHPOUC rui kalaic dat lakmei latdyng sw kan the, kumna kangamv paan rui hei tei tiguang tangc puni the: “Nangniw tuang nap-bi tei zauczihmei nunc tuang taek tisw dat lak khe, khatni gin nunc rui nangniw tuang drakhadui zangv bam dat lak khe.

⁹Nap-bi lingc keyna tay guanghmei nangniw rui, mi nap-bi tei tu lana RINGHPOUC ta thuanc puni the. Drakhalau ruaicna kathai rei guangmei nangniw rui, atuang Ravkai khou mi drakhadui tei zangv puni the.”

¹⁰He Jerusalemmei nunc, kaidai khou rui tatpatna nangniw mei nunc hanc guang datmei nunc khang tei chaeng kasiamh tho! Chaengdai kasiamh tho; ntauh guay khuaic ganc tho! Zaatc nunc tei thay khang chuang daanc thau tho.

¹¹Kalam thu RINGHPOUC rui kandih kapwm khou kumna kauc pat the: “Nangniw ta kanlou khang RINGHPOUC guang the, kamei rui kanduakloumei nunc ta nduanghna guang the twna Jerusalemmei nunc khou dinclou ti tho.”

¹²Nangniw ta “Ravguangc tuang nthanmei nunc,” “RINGHPOUC rui Kanpatloumei nunc” twna kaw puni the. Jerusalem ta “Ravguangc rui Nzianmei Kaidai,” “Ravguangc rui ganclou makmei Kaidai” twna kaw puni the.