Read Rongmei Naga ISAIA 63 Bible Online

ISAIA 63 - Rongmei Naga bible

ISAIA 63

¹“Edom tuang Bozra kaidai khou rui guangmeipu hei thow cho? Mi phey haengh piuna ngammei swna ruan patmeipu hei thow cho?” “Mi hei RINGHPOUC, kanlou khang katik kangamv daihmeipu, kamei rui rihngamloumei tei kauc ndauh khang guangmei tuang e.”

²“Drakhadui kasiamh khang drakha niimeipu kumcna katuang pheybaan hei tabui sw tina heidi haengc bam tu cho?”

³RINGHPOUC rui daw e, “Ai rui zaatc nunc ta drakhathai ta kumc niipuat key the, meic gaanv khat na rui sini ata nkhavlou maek ge. Areic thauna ai rui kaniw ta niipuat key the, kumna kaniw zei rui apheybaan guay haengc ngam the.

⁴Amei nunc ta kanlou nimei ganv guang the twmei ai ding the, kaniw ta zauczihmei nunc ta dandi tii nimei ganv tangc khwan the.

⁵Ai zauc pwki ata nkhavlou nimei maek ge twmei howna ai ngak sakh sak the. Tiki alungpuam rui ata titanclou the, kumna arana rui ngam the.

⁶Areic thauna ai rui zaatc kapwmna ta nii puat paruatlou the khatni kaniw ta sw puat paruatlou the. Ai rui kaniw zei kandih khou bun keylou the.”

⁷RINGHPOUC rui taek makna nzian bammei ramzian tei ai rac ni; kamei rui aniu khang taancloumei taanv guay khang rui ai kata thuanc ni. Kazauzian paan rui khatni taek makna nzian bammei paan rui kamei rui Isaraelmei khang geicna suaihiamlou the.

⁸RINGHPOUC rui sa e, “Kaniw hei amei nunc e; kaniw ata guat ni tuang hamh e.” Kumna kamei rui kaniw ta

⁹kaniw tuang ryanra kaguay khou rui kanlou the. Kaniw ta kanloumei hei baanchara rui hamh e, RINGHPOUC kamei rui nzianna khatni lunghsucna kaniw ta kanduakloumei tuang e. Tat kanmei ganv khou ni kamei rui kaniw ta kaganv kathuic makalou khwan e,

¹⁰tiki kaniw rui kata liamna kalung tiryanra padiklou khwan e. Kumna RINGHPOUC rui kaniw ta zauczihmei swna kaniw ta adow khwan the.

¹¹Khoutei kaniw tat kanmei ganv ta ningtow the, RINGHPOUC bangc Mousi tuang ganv ta tei, kaniw rui kumna thanv the, “Ntaw thu RINGHPOUC, kamei nunc tuang kapy swmei nunc ta duipui khou rui kanduakloumei tei tabui thangc tat kan thena cho? Kabumaengc Mousi khou tiiloumeipu RINGHPOUC tei tabui thangc tat kan thena cho?

¹²Tabui thangc bam kan thena cho RINGHPOUC, Mousi ta sinswna kapumtan rui taanv daih mpeyna taancloumeipu, duipui ta tiluangc ntamvlouna duisyng khou kamei nunc ta titat kaanlouna, kakhang tingsaeng dinc bam nimei zanh tatmei taanv taancloumeipu tei?”

¹³RINGHPOUC rui zayloumei paan rui kaniw tei nwmbangc takuanh nunc kumc kaniw phaykaamv kaamc zi zat kan mak ge.

¹⁴Guaih pang ta kandih gaymei nzaengc baek khou gaengclou kumc RINGHPOUC rui kamei nunc ta zaeng tiswlou the. Kamei rui kamei nunc ta zaylou the kumna kazanc hym tidaiclou the.

¹⁵He RINGHPOUC, nthanmei hymdaihmei nang bamv tingkauh thangc rui phaengc keyna zauclou o. Nang rui aniw khang heidi lunghsuc bammei tei tabui thangc tat kan thena cho? Aniw ta ntaamvlou rio.

¹⁶Nang hei aniw pu e. Aniu pupouc Abraham khatni Jakob rui aniw ta thay mak sini RINGHPOUC nang rui thu aniw ta thay e. Nang hei aniw pu e, nang hei aniw ta kanduak tanh tanlou bammeipu e.

¹⁷Tabui swna nang rui aniw ta nang chaeng khou rui titat mbianghlou tu cho? Tabui swna nang rui aniw lung heidi titanclouna aniw ta nang khou rui ducna titatlou tu cho? Nang bangc nunc khang rui guanglou dat ro, nang tuang sw tanh tanna bammei nunc khang rui.

¹⁸Aniw, nang tuang nthanpui mei nunc ti hei zauczihmei nunc rui matat akhat alay ganc khwan the; kaniw phay rui nang tuang nthanmei bamv ta niibin the.

¹⁹Nang rui aniw guangc hamh kumcna khatni aniw hei nangmei nunc hamh kumcna nang rui aniw ta swlou the.