Read Rongmei Naga ISAIA 64 Bible Online

ISAIA 64 - Rongmei Naga bible

ISAIA 64

¹Tabui swna tingpuk siatra patna key makna cho? Chyngbut guay rui nang ta howna ping kadunh puni.

²Mai ruc khou dui bat kumc kaniw ping kadunh kathanh puni. Guangna nang ta zauczihmei nunc ruc khou nang ngamv lyanlou o, kumna zaatc nunc ta nang hu khou tikadunhlou o!

³Nang guangna aniw rui ning makmei meic pingmei taanv taanclou khwan e; chyngbut guay rui nang ta howna ping kadunh khwan e.

⁴Meic gaanv khat na sini nang kumhmei Racguangc ta how mak ge khatni chu mak ge, kakhou lwmloumei nunc khang hei kumhmei taanv taancloumeipu ta.

⁵Nchumhmei taanc niina taancna lungc bammei nunc khatni akumhna kaniw lunghmei ta nang laa nii cho twmei ningtow bammei nunc ta nang riulouna bam e. Nang rui aniw ta lunghpuamc bam khwan e, kum sini aniw paapc taancna taancna bam khwan e; nang lungpuam dai puamc bam sini rey khou ruina aniw hei laanhmei taanv rana taancna bam khwan the.

⁶Aniw kaguayna hei paapcmei rana di the; aniw tuang gayliang the twmei taanv tei nganvna tanac kiw kiumei pheyraan kumc the. Aniw paap zaeng rui dandi keyna mpwan rui phungc tat bammei thingnwang kumc the.

⁷Nang khou guangna huayney bammei maek khe; nang rui nkhavlou diu khang nang khou guangmei ni maek khe. Aniw paap zaeng rui nang aniw khou rui nkamh kan the khatni aniw ta ganclou the.

⁸Tiki, he RINGHPOUC, nang hei aniw pu e. Aniw hei gambic e, nang hei lai kasiamhmei e. Nang rui aniw ta damcloumei tuang e.

⁹Kumhpui zaeng rui aniw ruc khou lunghpuamc langv lou rio khatni aniw paap aniw khou tingsaeng chaklou rio. Aniw hei nang tuang mei nunc e; aniw ta zauc nzianlou o.

¹⁰Nang tuang nthanmei kaidai guay tei tazikramv kumc the; Jerusalem hei lungctaekna ganc rimlou the.

¹¹Aniw tuang Ravkai, nthanmei khatni gay kanmei bamv, aniw pupouc nunc rui nang ta thuanc bammei bamv tei mai rui swkamut kamailou the. Aniw rui nzianmei bamv guay tei kasic ngam the.

¹²He RINGHPOUC, mi khou hei nang taanv swlou lakna cho? Nang ramhkhat na sini swlou makna aniw rui akhaengv ngam lak biuc aniw ta tiryanra bam nina cho?