Read Rongmei Naga ISAIA 65 Bible Online

ISAIA 65 - Rongmei Naga bible

ISAIA 65

¹RINGHPOUC rui sa e, “Amei nunc rui huayneymei dawlou khang ai nkhwan bam khwan e, tiki kaniw huayney mak ge. Kaniw rui ata phutow kan khang ai chamdaanv bam khwan e, tiki kaniw phu mak ge. ‘Ai khou hei bam e; ai nangniw ta nkhavlou puni,’ twna daw me twna ai chamdaanv tanh tan bam khwan e, tiki Isaraelmei rui huayney mak ge.

²Kaniw nu tancna nkhuaimei taanv rana taancna kaniw rana chaeng khou tatna bammei amei nunc ta riu khang ai neihmaryn abaanc haamv pat zingc zingcna nkhwan e.

³Kaniw ahu kahak khou alung tipuamcna bam e. Kaniw ravmaengc pikwan khou ravkhaeng tat bam e khatni rav baihmei rav khou agaw ntei e.

⁴Zingbangc chaeng khowlang khou khatni tarou khou theihmei bumaengc nunc ta kachuc khang tat re. Kaniw guak zanc tu e khatni ravmaengc khang khaengmei zancdui zangv e.

⁵Kumlana kaniw rui meic baihmei ta ‘Aniw daeng khou guang tuanh rio, aniw nthanmei nunc e, nangniw kahi nuh mak ge!’ twna sa e. Heikumhmei nunc ti hei ai zauc bam ngam mak ge alungpuam kaniw ruc khou amit dat zat lakmei mai kumc chuangc bam e.

⁶“Kaniw ta dandi tii khang ai hy keylou tang the, kaniw khang tii nimei dandi hy keylou tang the. Kaniw taanv tei ai zauc samlou lak khe,

⁷tiki kaniw paap khatni kaniw pupouc nunc paap guay dandi tei ai rui kaniw khou tii puni the. Kaniw rui chyng twan khou naimei rav baihmei ravbamv guay khou agaw ntei the kumna ata sa kasicna sa the. Hei kumhmei kaniw rui taanc kanmei taanv guay khang tei biuhmei dandi tii puni the.”

⁸RINGHPOUC rui sa e, “Meic gaanv khat na sini drakhathai gaymei ta tei sw kasic mak ge; tiki hei tei rui kaniw drakhadui kasiamh e. Ai rui ni amei nunc kaguayna ta swmaan ngam lak ge, asiamruai swmei guay ta thu ai kanlou puni.

⁹Juda kaikhwangmei Isaraelmei nunc ta ai rui suaihiamlou puni, kumna kakikta rui akandih chyngramv hei kaniw tuang sw puni. Ai rui kadahloumei, atuang siamruai swmei nunc rui khou tei lungc puni.

¹⁰Kaniw rui ata kalum puni khatni kaniw tuang lauziu khatni kiruai guay neihkey thangc Sharon nzaengc khou khatni neihpat thangc Akor nzaengc khou kabynbamv sw puni.

¹¹“Tiki ata ganclouna, Zaion, atuang nthanmei chyng ta amuc lana, Gad khatni Meni ta kalum bammei nangniw san thu

¹²buy-baeng hu khou theicsi theihmei puni the; kalam thu ai nangniw ta kaw khou tei nangniw daw mak ge khatni ai sa khou tei nangniw nking mak ge. Nangniw alat liam ni twna liam the kumna simei taanv taanc the.

¹³Hei zaeng rui ai rui nangniw khou sa e twmei thu ata kalumna alat piuna bammei nunc tei tuzangv khang mphamh mphahna nai puni the, tiki nangniw thu ndaapc tarimei ariw puni the. Kaniw neihlana bam puni, nangniw zakna bam puni.

¹⁴Kaniw neihlana lu suanna bam puni, tiki nangniw lung anangna kap bam puni.

¹⁵Ai rui kadahloumei nunc khang nangniw zanc tei siangdanmei zanc sw puni the. Kauh Liangmei RINGHPOUC ai rui nangniw ta swluai puni. Tiki alat piumei nunc khang ai rui zanh thanh tiilou puni.

¹⁶Mi kandic khou lungc bammei thow rui pwni suaihiam ney e thei suai makmei Ravguangc rui suaihiamlou khang ney puni. Thow pwni latdyng sw e thei suai makmei Ravguangc zanc sindaancna sa puni. Reynungc ryanramei guay tei tat kan puni the khatni amuc kan puni the.”

¹⁷RINGHPOUC rui sa e, “Zauc lo, ai kandih kathanc khatni tingpuk kathanc kasiamh bam e. Karaanmei tei thu amuc kan ni the, lungning khou nganv ningtow bam dat ni tuang hamh the.

¹⁸Zauclo! Ai rui damcloumei khou hei nangniw neihla zaenggayna bam tho. Ai rui kasiamhloumei Jerusalem thanh hei neihlamei rui padik puni the, kumna mi khou bammei guay neihla puni the.

¹⁹Ai rui Jerusalem khatni kamei nunc zaeng rui neihlamei padik puni the. Khoutei kapmei nai dat lak khe, nkhavlou khang kauhmei khwan ni chu dat lak khe.

²⁰Ngasatna swna ni theic dat lak khe, meic kathuicna panty lungsingna lungc puni the. Tingkwm 100 lunghmeipu tei ni chabwan swna lungc puni the. Tingkwm 100 lungc tangh makna theihmei nunc tei ai rui riap tina e.

²¹Meic nunc rui kai swna khou tei kaniw lungc puni the-meic baihmei rui khou tei lungc lyn lak khe. Kaniw drakha bang lingc keyna kadui kaniw zangv puni the-

²²Kaniw rui swthauloumei kai khou tei meic baihmei rui lungc lak ge khatni kaniw rui lingcloumei tei meic baihmei rui tu lak ge. Amei nunc thingbang kumc panty lungsingna lungc puni the. Kaniw tuang taanvthai kaniw tuna lungc puni the.

²³Kaniw tuang taanv guay kathai laa tu puni the, khatni kaniw nac nunc kamut kamaimei ariw lak ge. Ai rui kaniw ta khatni kaniw kikta ta tingsaengzaeng khang suaihiamlou puni the.

²⁴Kaniw huayneymei tei suaic suak mak khou rui neymei tei dawlou puni the.

²⁵Angiw nunc lev lauziunac nunc kataek tu kariu puni the; guaih kumcna kamangliangpui ni napgou tu puni the, nrui rui ni meic kabiu dat lak khe. Atuang nthanmei chyng Zaion khou kabiu kabaeng nimei tuang khatni simei nai dat lak khe.”