Read Rongmei Naga ISAIA 66 Bible Online

ISAIA 66 - Rongmei Naga bible

ISAIA 66

¹RINGHPOUC rui sa e, “Tingkauh hei atuang guangc bamvpaeng e, kandih hei aphayba bamv e. Kum e thei, nangniw akhang tabui kumhmei kai swlou diwna cho khatni ai bam khang tabui kumhmei bamv kasiamhlou diwna cho?

²Mbaanv kapwm hei ai rui damcloumei tuang e! Niamhna, lunghlaih thayna, ata pingna, alat piuna lunghmei nunc ta tei ai nzian e.

³“Meic nunc rui kamei kamei taanc nii niimei taanc the. Guaituamchic downa khaengmei lev maansei swluaina khaengmei, lauziu khaengmei lev siguang dangvna khaengmei; phunling khaengmei lev guak zei khaengmei; agaw nteimei lev ravmaengc ta kalummei mi guay hei kalat akhat na di the. Hei kumhmei chanymei tuang kalummei tuang taanv hei kaniw kahawna taanc the.

⁴Hei zaeng rui kaniw pingna bammei swkamut kamaimei tei kaniw ruc khou tiguang puni the. Kalam thu ai kaw khou tei meic gaanv khat na sini dawlou mak ge, ai sa khou tei meic gaanv khat na sini nkinglou mak ge. Kaniw alat liam ni twna liam the kumna simei taanv taanc the.”

⁵RINGHPOUC rui samei hei nking o, kata pingmei khatni kalat piumeithiule: “Nangniw alat piu chuyna lungc timei zaeng rui, nangniw mei nchamc gaanvsaekc rui nangniw ta karaeng the kumna nangniw ta khaac patlou the. ‘RINGHPOUC rui katik kiu lyanlouna nangniw ta kiuc kanlou pw diu, kum pw e thei aniw nangniw ta zaucna neihla puni,’ twna sana kaniw nangniw ta sinnui bam e! Kaniw kahak tei zak puni the!

⁶Nking o! Kaidai khou khwan ranvna karo bammei khwan tei, Ravkai khou chu bammei khwan tei RINGHPOUC rui kata zauczihmei nunc ta dandi tiimei khwan e!

⁷“Atuang nthanmei kaidai hei meicpui akhat rui ryanra makna thay mak daekna mpouh akhat puancloumei kumhmei tuang e.

⁸Mi kumhmei thowkumhmei rui chu the cho hamh e thei how the cho? Zaatc akhat tei zaeng neih khat na rui puanc thuakloumei nai the cho? Zaion guangcdic tei puanc pat ni khou ryanra akhaengv bam ni tuang hamh mak ge.

⁹Ai rui amei nunc ta puanc pat changh puanc pat ni khou rui tipuanc pat makna taan puni twna ningna cho?” RINGHPOUC rui sa pat kan the.

¹⁰Jerusalemeile neihla nchamc o; kakhang rui zaenggay o, mi kaidai ta nzianmei nangniw meic guayna! Ntaw kamei lev neihla tho, kakhang rui kap kanmei meic guayna!

¹¹Ngasatna rui kapui noudui nouhmei kumc, nang kanoudui nouc ngguna lungc puni the.

¹²RINGHPOUC rui sa e, “Ai rui nang ta tingpui maruina tilungcgay chingkhiuhlou puni the; zaatc nunc tuang lanv hei nang khou luangc taek zat makmei duithuak kumc luangc guang puni the. Nangniw hei kapui rui puancnouclouna kapamv khou nzianna pamc puanclouna makuatloumei nac nunc kumc puni the.

¹³Kapui rui kanac ta swmloumei kumc ai rui nangniw ta Jerusalem khou swmlou puni the.

¹⁴Mi guay hei guang tangclou pwkhou, nangniw neihla puni the; kumna hei tei rui nangniw ta titanclou puni the khatni tina pumhgaylou puni the. Hei kumc pwkhou RINGHPOUC ai rui alat piumei nunc ta nkhavlou e, khatni ata zauczihmei nunc ruc khou alungpuam keylou e twmei nangniw thay puni.”

¹⁵RINGHPOUC mai kazauhna guang puni. Kamei rui lunghpuamhmei nunc ta tei dandi tii khang kamei pwanzingh khou tuangcna guang puni.

¹⁶Kakhuay naimei kandihmei kaguayna ta mai rui khatni buy-baeng rui dandi tii puni. Meic geicna theic puni.

¹⁷RINGHPOUC rui sa e, “Rav baihmei ta kalum khang kaniw pumc sw nthan bammei nunc, rav baihmei kalummei pikwan thangc kanglwan tat bammei nunc, guak zanc, apuak zanc khatni baihmei chanymei taektw tu bammei nunc khang nganvmei tei ana guang the.

¹⁸Kaniw tuang lungning khatni kaniw tuang taanv guay tei ai thay e. Zaatc kaguayna maansei kapwmna ta khuam kaduai khang ai guang pw the. Kaniw guang kaduai pwkhou, ai rui tabui sw ngam cho twmei kaniw how puni

¹⁹khatni kaniw ta dandi tiimei hei ai rui e twmei kaniw thay puni. “Tiki kaniw gaanvsaekc ta thu ai rui nsaekclou puni kumna kaniw ta zaatc pang khou khatni azanc hym chu zat makmei khatni atik agunc how zat makmei duhmei kandic guay: Spain, Libia khatni Lidia, sauhpai sin thaymei zaat, Tubal khatni Grik khou thouclou puni. Mi zaatc nunc khou hei kaniw rui atik ahym kauc ndauh puni.

²⁰Kaniw rui nangniw zaat meic kaguayna ta zaatc pang khou rui kaipat swna akhou phungc guang dat puni. Isaraelmei nunc rui phunling puatkat nthanmei haan khou louna Ravkai khou phungc guangmei kumcna kaniw rui mi nunc ta tei takuanh, kuanniam, guaikuan, khatni takuanh gari khou louna Jerusalem atuang nthanmei chyng khou phungc guang puni, twna RINGHPOUC rui sa e.

²¹Ai rui kaniw gaanvsaekc ta amuh khatni Levimei tiswlou puni.

²²“Kandih kathanc khatni tingpuk kathanc tei angamv paan rui nai bam ngam nimei kumcna nangniw kikta khatni nangniw zanc nai bam ngam puni.

²³Bw Thanh Ngai kathuic khatni Sabbathneic kathuic zaatc kathuicna tuang mei Jerusalem khou ata guang kalum puni,” twna RINGHPOUC rui sa e.

²⁴“Kaniw tatpat dat pwkhou, alat liammei nunc tuang phouh nunc tei how puni. Kaniw ta tumei nthanv nunc tei theic dat ni tuang hamh the, khatni kaniw ta rawmei mai tei amit dat zat ni tuang hamh the. Mi lwn tei maansei kaguayna khang meic chanymei lwn sw puni the.”