Read Rongmei Naga ISAIA 7 Bible Online

ISAIA 7 - Rongmei Naga bible

ISAIA 7

¹Jotham rui puanhmei, Uzzia tou Guangh Ahaz rui Juda kandic sin bammei douc Siriamei guangc Rezin lev Isaraelmei guangc Remalia rui puanhmei Peka kaney rui Jerusalem ta adow khwan e, tiki Jerusalem ta thu kaney laa ngam kan mak khwan e.

²Siriamei ricmei nunc Isaraelmei ramv khou guang tangc bam the twmei chamv Judamei guangc khou guang tangc pwkhou, guangh tei khatni kamei nunc tei ping langvna mpwan rui thingbang kanukc kumc kadunh the.

³RINGHPOUC rui Isaia khou sa the, “Nang rui nang nac mpouh Shear Jashub ta nduanghna Guangh Ahaz ta ariw tat ro. Karucmei zeic khou rui zay keymei duiriang nganvloumei mun khou pheysoumei nunc rui taanvtaanh bammei bamv khou tei nang kata chaengluang khou ariw puni.

⁴Kamei tei ntak nrakna, reih reina, kaluang araammei tuang sw makna bam o twna sa tio. Guangh Rezin khatni Siriamei nunc khatni Guangh Peka tuang lungpuam tei amit kan nimei maiswm dangv kanei tuang maikhou na kumh tuang de.

⁵Siriamei tei Isaraelmei lev nangniw ta sw khang raengc bam e.

⁶Kaniw rui Juda khou rih keyna, meic nunc ta tei tipinglouna, kaniw biak tiliangclouna, Tabeel nac mpouh ta guangh bamv khou lou khang kaniw sw bam e.

⁷“Tiki RINGHPOUC, ai rui mi hei sapui tuang e twmei thu mi hei tabui nungc na sini guang tangc lak ge.

⁸Kalam thu Siria hei katuang kaidai Damaskas suangc tanh mak ge, khatni Damaskas hei Guangh Rezin suangc tanh mak ge. Isaraelmei hei tingkwm 65 lungc khou bakpuat paruat keyna kandih akhat swna nai dat ngam ni tuang hamh the.

⁹Isaraelmei hei kakaidai Samaria suangc tanh mak ge, khatni Samaria hei Guangh Peka suangc tanh mak ge. “Nangniw lwmmei khou ding ntip mak ge thei nangniw ding ngam ni tuang hamh e.”

¹⁰RINGHPOUC rui Ahaz khang lat tiguang dat re:

¹¹“RINGHPOUC nang Racguangc khou ndanhmei taanv akhat taanclou o twna sa tio. Hei tei taruaih nthukmei thangc rui ni nuh e, hamh e thei tingkauh karuc thangc rui ni nuh e.”

¹²“Ai ndanhmei taanv taanclou khang sa lak ge. Ai RINGHPOUC ta nchanv zih e,” twna Ahaz rui daw the.

¹³Hei lat khou tei Isaia rui kumna daw the, “Nking o, David Guang kikta nuncle, nangniw maansei lungpuam ntanvmei na biuh mak gena aRavguangc lungpuam ni ntanv ni hena cho?

¹⁴Gay the, RINGHPOUC kamei kahak rui ndanh khang tiilou puni the: madanhmei tuang khat taanclou o, liuchang akhat rui kapumc nritna mpouh gaanv khat puanc puni the, kazanc rui ‘Immanuel’ twna kaw puni.

¹⁵Mi nac tei sigay thay pat pwkhou, meic nunc tei guaihnoudui zangvna khatni nkhuaihdui tuna lungc puni.

¹⁶Mi ganv kiu guang makmei hu khou rui, nang rui pingna bammei guangh kanei tuang kandic nei tei swkamut kamai kan ni the.

¹⁷“RINGHPOUC rui nang khou, nang mei nunc khou, khatni guangh kaimei guay ruc khou Juda khou rui Isaraelmei ntamv pat rap khou rui ariw zat makmei ramrianra tiguang puni the kamei rui Asiriamei guangc ta thouc guang puni the.

¹⁸“Mi ganv kiu guang pwkhou, RINGHPOUC rui Izipmei nunc tei duc liangmei Nail duiriang thangc rui sim pang kumcna samc guang khang khatni Asiriamei nunc kaniw kandic thangc rui nkhuaih katangv kumc samc guang khang kaw puni.

¹⁹Kaniw tei khow kauhmei khowlang khatni khowsaeng khowlang khou bam puni, kumna kaniw rui sauh bang ding khatni lauziu byn guay khou bam padik puni.

²⁰“Mi ganv kiu guang pwkhou, RINGHPOUC rui Euphratis duiriang paengc thangc bammei Asiriamei guangc ta kaw guang puni, kumna kamei rui nangniw biangc hiw, nangniw sam khatni nangniw pumc khou naimei hiw guay tei guat nkuakc duaklou puni.

²¹“Mi ganv kiu guang pwkhou, lau taanhmeipu akhat rui guaihkui akhat lev ziuhkui kanei na nsaekclou e thei,

²²hei tei noucdui heidikamv pat geicna kamei mi khou tei rui lungc biucna lungc puni. Ngguay, mi kandic khou meic katit na theic nsaekcloumei nunc tei guaihnoudui khatni nkhuaihdui tuna lungc puni.

²³“Mi ganv kiu guang pwkhou, drakhalau gaymei guay tei, kalau akhat khou kabangc 1000 naimei khatni kamanv daandi paek 1000 tii biuhmei lau guay tei sauhraengh rui thau padik puni.

²⁴Meic nunc rui sauhpai sin lana hei bamv khou tei khouringh guic puni. Ngguay, ramv kapwm tei sauhraengh rui thau padik puni the.

²⁵Nap-bi thau padikna bammei luanghbut guay tei sauhraengh rui thau padik tina khou tei meic gaanv khat na sini tatlou dat pw lak khe. Hei tei guaih khatni lauziu nunc byn sw puni the.”