Read Rongmei Naga ISAIA 8 Bible Online

ISAIA 8 - Rongmei Naga bible

ISAIA 8

¹RINGHPOUC rui akhou sa e, “Hy nimei paek daihmei akhat laana mi khou tei meic kathuicna pac pat nuh nimei hiak rui mi lat hei hylou o: ‘Katumcna asut laa tho, katumcna kwam laa tho.’

²Lwm nuhmei gaanv nei, amuh Uria lev Jeberekia nac mpouh Zekaria kaney ta sakhi khang kaw tho.”

³Kanakmei tangv anow kapumc nrit the. Nah mpouh gaanv khat puanc pwkhou RINGHPOUC rui akhou sa the, “Ngana zanc tei ‘Katumcna Asut Laamei, Katumcna Kwamlaamei,’ twna phuak go.

⁴Mi ngana hei ‘Apui, apu’ twna kaw pat thay mak khou Damaskas tuang lanv guayna khatni Samariamei rui kwam guangloumei kaguayna Asiriamei guangc rui laa tat kan puni the.”

⁵RINGHPOUC rui akhou sa guang dat re.

⁶Kamei rui sa e, “Kalam thu meic nunc hei rui Shiloa khou rui luangc rih rina luangc keymei duithuak ta laa zihna ganc patna Guangh Rezin lev Guangh Peka hu khou kadunhmei zaeng rui,

⁷RINGHPOUC ai rui Juda ta adow khang Asiriamei guanghdaihmei khatni karihmei nunc ta phungc guang puni. Kaniw tei Euphratis duithuak dui kakhuangc daic lyamna luangc patmei kumc guang puni.

⁸Kaniw rui meicguang mphumh phumhna Juda ta liak bin guangna ramh guayna mphumh puni.” Ravguangc aniu ta nduanghlou bam e! Kaswkaeng laamv ntyng patna mi kandic ti hei gaeklou puni.

⁹Zaatc guayle, nangniw pingna guang kachwn la tho! Nking o, nangniw kandih tin tou thangc bammei nunc. Adow khang chamdaanv la tho, tiki ping lo! Ngguay, chamdaanv la tho, tiki ping lo!

¹⁰sw nimei thak kakhanh la tho! Tiki hei tei ni nsa khang de. Nangniw rui sa nimei zu sa bam o! Tiki mi guay tei nsa de, kalam thu Ravguangc aniu ta nduanghlou bam e.

¹¹Tanhmei kabaanc aruc khou mbaenglouna RINGHPOUC rui ata meic nunc rui tat bammei chaeng tei ai lay tat mak khang sa the. Kamei rui sa the,

¹²“Meic nunc rui sw bammei tuang raeng khou tei lay kazauh riu khatni kaniw rui ping bammei ta tei ni ping riu.

¹³Ngamparymei RINGHPOUC, ai hei nthanmeipu e, nangniw rui ping nimei kiu ai hei e twmei ningtow o.

¹⁴Ai hei thu meic pingmei nthanmeipu e, kumhpui zaeng rui ai hei meic nunc khang phaysuy tauc e; Juda khatni Isaraelmei khang khatni Jerusalemmei khang ai hei phah kumhpui tuang e.

¹⁵Meic mpeyna rui kaniw phaysuyna bow puni khatni bow puat paruat puni. Kaniw tei phah khou manc puni.”

¹⁶Aziap nunc nangniw thu, Ravguangc rui akhou tiiloumei lat guay hei swmaan mak khang karak tiph tiplouna rylou o.

¹⁷RINGHPOUC kamei nunc khou rui nkamh kan the, tiki ai kakhou lwm e khatni ai kakhou lwmgay e.

¹⁸Ai khatni RINGHPOUC rui akhang tiiloumei alauc nei hei Zaion Chyng khou bammeipu Ngamparymei RINGHPOUC rui Isaraelmei khang tiiguangmei ringc bammei lat kahak kiu the.

¹⁹Tiki meic nunc rui nangniw khou tanglum tanglai bammei amuh nunc khatni rav nunc khou tabui kumh puni cho thanv o twna sa puni e. “Aniu rui rav nunc khou khatni theihmei bumaengc nunc khou aniu ringc bammei nunc khang thanv nimei tuang the,” twna katiu puni e.

²⁰Nangniw rui kaniw khou heikumna daw nina e, “RINGHPOUC rui nchamloumei tei nangniw nking o! Ravtow amuc nunc lat nking riu, kaniw rui nangniw khang gay khang swlou ni tuang hamh e.”

²¹Meic nunc tei ryanra ryanriuna khatni ndaapcna mi kandic khou kaphai kadung ruan bam puni. Kaniw ndaapcna khatni lunghpuamcna kaniw rui kaniw guangc khatni kaniw Racguangc ta siang puni. Kaniw rui tingpuk thangc zauc ku bam sini,

²²kandih khou zauc key bam sini ryanramei lev zinghmei hamhna baihmei how dat pw lak khe; kaniw ta meic pingmei zinghmei khou nthau gutlou puni the. Mi ramrianra khou rui duak nimei chaeng nai dat lak khe.