Read Rongmei Naga ISAIA 9 Bible Online

ISAIA 9 - Rongmei Naga bible

ISAIA 9

¹Zebulun lev Naphtali kaikhwang tuang kandic tei kaganv akhat tizaklou khwan e, tiki theic thangc thu mi bamv khou hei, Mediterranean neihpat khou rui thauna Jordan duithuak paengc thangc kandic nganvna, gin nunc rui lungc bammei Galili khou hei nganvna kahym tidaiclou dat puni.

²Zinghmei khou tatna bammei nunc gaanh riw daihmei how the. Zingh zingmei lym khou lungc bammei nunc tei ntaw thu kaniw khou ganclou the.

³RINGHPOUC nang rui kaniw khou neihla daihmei tiilou the; nang rui kaniw ta tineihlalou the. Meic nunc rui lau tay guangna neihla kumc khatni rih khou laaguangmei lanv nzanh kumc kaniw nang hu khou neihla the.

⁴Kaniw guang khou phungc bammei guangkhap, kaniw bou khou puanc bammei thingbungc, khatni kaniw ta sinbin bammei nunc tuang builwang tei Midianmei nunc ta zaw tisiloumei nungc tei kumcna nang rui riambau ganclou the.

⁵Rihkeymei rihmei nunc tuang phaythuapc guay khatni kaniw tuang zei ranamei thiula guay tei mai rui raw maan puni the.

⁶Aniu khang ngana kiu puanclou the! Nac mpouh akhat tiguang the! Katuang dihsinmei tei kabou khou lou puni kata kiu “Charynmei Zayloumeipu,” “Ngamparymei Ravguangc,” “Tingsaengzaeng Pu,” “Nchu-nzaenghmei Guangh nac,” twna kaw puni.

⁷Kaguangc ngamv tei daic hay hay thau puni; kaguangc kandic tei nchu-nzaengh tanh tan bam puni, ntaw khou rui tingsaengzaeng. Kamei Guangh David phaan lynmei swna dih sin bam puni, nchumhmei khatni nzihmei khou rui kangamv sw bam puni. Mi guay hei taanc pat khang Ngamparymei RINGHPOUC kalung dinglou tang the.

⁸RINGHPOUC rui Isaraelmei guanghdic ruc khou, Jakob kikta ruc khou kalatzan kauc pat kan the.

⁹Isaraelmei kaguayna, Samaria kaidai khou lungc bammei kaguayna rui kamei rui mi hei taanclou the twmei thay puni the. Ntaw hei kaniw ramhkhe swna daic tuh tu bam e.

¹⁰“Niangtauc kai guay bow key kan sini ntauh kai swlynlou dat puni. Sikamor thing tuang thingluang dowbau kan sini, sidar thing rui lynlou dat puni,” twna kaniw rui sa bam e.

¹¹Kaniw ta adow khang RINGHPOUC rui kaniw ta zauczihmei nunc ta katiu thaulou kan the.

¹²Isaraelmei ta aluakc khang rui neihpat thangc rui Siriamei khatni neihkey thangc rui Philistinmei rui kaniw mwang hah pat the. Hei tei rui sini RINGHPOUC lungpuam tei luai mak ge; kaniw ta riap khang kabaanc haamv ntyng pat bam di he.

¹³Ngamparymei RINGHPOUC rui kaniw ta riaplou tisini, Isaraelmei nunc hei lunglaih mak ge, kaniw kakhou hanc guang dat mak ge.

¹⁴Zaeng neih khat na lungc khou rui RINGHPOUC rui Isaraelmei tuang kapy nunc khatni kamei nunc ta riap puni; kamei rui kaniw ta kapy kamai dan ganc puni.

¹⁵Gaanvthaih nunc khatni chakhwang champouh sw nuhmei nunc tei kapy nunc the-nkhuaina dinc bammei muhzwng nunc hei kamai nunc the.

¹⁶Mi nunc ti hei chaengzaymei nunc rui zay mbiangh ngam the khatni kaniw ta swkaguakc, kasuakclou ngam the.

¹⁷Kumhpui zaeng rui Kaipouc rui chabwan gaanv khat na ta sini tipak duak lak ge, khatni amaypui khatni nruna nac gaanv khat na ta sini zauc nzianlou lak ge, kalam thu meic kaguayna hei simei taanv taanhmei rana di the khatni si the khatni kaniw gaymei lat khat na sini sa mak khe. Hei kumc bam sini RINGHPOUC lungpuam luai mak ge, riap khang kabaanc ntyng patna bam puni di he.

¹⁸Meic nunc tuang simei tei sauh raengh phuam mai raw kumc chuangc thau the, khatni nwmbangc ramhac kumc maikhou padikna chuangc paengv pat bam the.

¹⁹Ngamparymei RINGHPOUC tuang lungpuam zaeng rui, katuang dandi hei mi kandih kapwm khou mai kumcna chuangc bam the kumna meic nunc hei mai taek swna theic kamut kamai ngam the, meic gaanv khat na sini kachana ta nganvna daek dat mak khe.

²⁰Meic nunc rui baanzat baandau asut tuna bam sini kaniw nggu zat mak ge. Kaniw nac nunc ta nganvna tu the!

²¹Manasemei nunc lev Ephraimmei nunc kaniw khat lev khat ta adow the, khatni kanei kariuna Juda ta adow the. Hei kum bam sini RINGHPOUC tuang lungpuam luai mak ge; riap khang kabaanc ntyng patna bam puni di he.