Read Rongmei Naga LEVITHOUC 11 Bible Online

LEVITHOUC 11 - Rongmei Naga bible

LEVITHOUC 11

¹RINGHPOUC rui Mousi khatni Aron khou sa the,

²Kandih khou naimei khouringh pang khou mi hei tu nuh e,

³mi kiu thu kangianh bakmei khatni chalath khaihmei khouringc nunc hei e.

⁴Khouringh asaekc hei chalath khaic bam sini kangianh bak mak asaekc rui kangianh bak sini chalath khaih mak tw e, hei kumhmei tei nangniw tu nuh mak ge kumna guaikuan hei chalath khaic sini kangianh bak mak ge kumna nthan makmei e.

⁵Mbepui hei chalath khaic sini kangianh bak mak ge, kumna nthan makmei e.

⁶Achaw mphuanmei hei chalath khaic sini kangianh bak mak ge, kumna nthan makmei e.

⁷Guak zanc ni tu nuh mak ge. Hei tei nthan makmei e, kalam thu kangianh bak sini chalath khaih mak ge.

⁸Mi khouringc nunc zanc hei tu nuh mak ge, theicloumei pumc ta sini kahi nuh mak ge; mi nunc hei nthan makmei khouringc nunc e.

⁹Kasw khatni kalip naimei khav guay tu nuh e,

¹⁰tiki dui khou bammei kasw khatni kalip maekmei kui ta tu nuh mak ge.

¹¹Mi kumhmei kui guay hei nangniw khang nthan makmei e. Nangniw mi kumhmei kui nunc tei tu lak nina e, theicloumei pumc ta sini kahi nuh mak ge.

¹²Kasw khatni kalip maekmei dui khou bammei kui akhat na sini nangniw tu nuh mak ge.

¹³Kabangc khou naimei nruay nunc hei mphuammei khatni karaengmei nruay nunc e twmei thayna nangniw tu nuh mak ge, mi kiu thu mouckauh, Langdia, Langdia miwmei,

¹⁴mouc haenghmei, mouc miwmei zaat guay,

¹⁵agaekc zaat guay,

¹⁶puanmangh, puanmangh pareina, duipui nruay, mouclaengna zaat guay,

¹⁷puanmangh nthyammei zaat guay, duipui mou, puanmangh daihmei,

¹⁸puanmangh mphuanmei, sypungramv puanmangh, khav mou,

¹⁹aluakc, aluakc zaat guay, taruaih rampiu khatni laamtuaih hei guay hei the.

²⁰Kasw naimei nkav-nkit zaat guay nthan makmei e,

²¹kum e tiki kachakmei zaat tei thu hamh e.

²²Pyzinpui, nkit, khatni nap-nkav hei nunc hei thu tu nuh e.

²³Kum e tiki ramh kui nthyammei kasw naina guangcna tatmei zaat guay thu nthan makmei e.

²⁴Kabangc khoumei khouringc nunc tuang theihmei pumc ta kahiloupui mei tei tingzyn nganvna nthan mak puni:

²⁵thow pwni theihmei pumc ta sinthaulou e thei kaphey kabaan tei sou nina e, kamei tei tingzyn nganv nthan mak puni.

²⁶Kangianh bak ge tiki bakchuy makmei khouringc khatni chalath khaih makmei khouringc tei nthan makmei e, thow pwni mi kumhmei theihmei khouringc kahiloumei tei nthan makmei sw puni.

²⁷Katan padeih rui tatmei khouringc pang khou kaniw tin rui tatmei khouringc nunc tei nthan makmei e thow pwni mi kumhmei khouringc theihmei pumc ta kahilou e thei tingzyn nganvna nthan makmei sw puni.

²⁸Thowkumhmei gaanv khat rui theihmei pumc ta kahilou e thei kamei tei kaphey kabaan sou nina e, kamei tei tingzyn nganv nthan makmei e. Hei tei nangniw khang nthan makmei e.

²⁹Kandih khou tuihmei khatni kabou dwanmei khouringc pang khou mi guay hei nthan makmei e, apuakc, khatni chaky hei nthan makmei e.

³⁰Duanghkhwanpui thyammei, guali, duanghkhwanpui, sypungramv tuang duanghkhwanpui khatni zuangapui hei kumhmei hei nangniw khang nthan makmei e.

³¹Mi kumhmei kui nunc theihmei pumc ta kahiloupui mei tei tingzyn nganv nthan mak puni.

³²Mi nthan makmei kui nunc tuang theihmei pumc taek keyloumei puat guay tei nthan mak khe. Mi hei thing tuang, phey tuang, guaih gic tuang, khatni khamsei tuang puatc kaguayna kazauh the. Mi kumhmei puat tei dui khou ntinlou nina e kumna hei tei tingzyn nganvna nthan makna bam puni.

³³Mi kumhmei tuang theihmei kui tei nianglai khou keylou e thei, mi lungc khou naimei puat guayna tei nthan mak khe, kumna mi lai tei swbak ganc nina e.

³⁴Tu nuhmei puat khou tei sini mi kumhmei lai tuang dui tei bunlou e thei hei tei nthan mak khe, khatni mi kumhmei lai khou loumei zangv nuhmei dui guay tei ni nthan mak khe.

³⁵Mi kumhmei kui theihmei keyloumei puat guay tei nthan mak khe; maimangh khatni lai tei swbak nina di the,

³⁶hei kum e tiki nthan makmei kui tuang theihmei pumc rui kahiloumei guay tei nthan mak bam sini duithuak lev duikhunc thu nthan bam de.

³⁷Mi kui tei lingc nimei phwn khou keylou bam sini, mi phwn tei thu nthan de.

³⁸Tiki lingh khang ntinlou bammei phwn khou keylou e thei thu mi phwn tei nthan mak khe.

³⁹Tu nuhmei khouringc tuang theihmei pumc ta tei ni kahiloupui mei tei tingzyn nganvna nthan mak puni.

⁴⁰Hei tei tupui mei tei kaphey kabaan sou dat nina e; kum sini kamei tei tingzyn nganvna nthan mak ge. Mi kumhmei theihmei pumc ta phungcloupui mei tei kaphey kabaan sou dat nina e, kum bam sini kamei tingzyn nganvna nthan mak ge.

⁴¹Kandih khou guangcna tatmei ramh kui nthyammei nangniw tu lak nina e.

⁴²Tuicna tatmei, katan padeih rui tatmei khatni katan mpeyna rui tatmei ramh kui guay tei tu nuh mak ge.

⁴³Mi kumhmei kui nunc hei tu lana nangniw rana nangniw ta sw mphuam riu.

⁴⁴Ai hei nangniw tuang Racguangc e, kumhpui zaeng rui nangniw nthanna lungc nina e, kalam thu ai hei nthanmei e.

⁴⁵Ai hei nangniw tuang Racguangc sw diu khang nangniw ta Izip khou rui phungc guangloumei RINGHPOUC tei ai hei e. Kumhpui zaeng rui nangniw nthan nina e, kalam thu ai hei nthanmei e.

⁴⁶Mi hei nruay-thauruay, khouringh khounah, dui khou bammei, kandih khou guangcna tatmei katana pang khou tu nuhmei tu nuh makmei tabui tei cho twmei dincloumei tuang the.

⁴⁷Kariak theilayna nthanmei nthan makmei, tu nuhmei tu nuh makmei khouringc tabui cho twmei thaykhak thaylangcna lungc nina e.