Read Rongmei Naga LEVITHOUC 13 Bible Online

LEVITHOUC 13 - Rongmei Naga bible

LEVITHOUC 13

¹RINGHPOUC rui Mousi khatni Aron khou sa the.

²Thowkumhmei khou kagic khou puamhmei hamh e thei asuh daihmei hamh e thei ranh ranmei khatni hei tei rui mphaanhmei ravpuat guanh pat nuhmei tuang nai e thei kamei ta Aron hamh e thei kanac nunc amuh akhat khou phungc guang nina e.

³Amuh tei rui suhmei bamv tei zauc puni, kumna suhmei bamv khou naimei meic-hiw tei mphwan e thei khatni suhmei tei gidi lungc nganv suc e thei hei tei mphaanhmei ravpuat di the twna laa nina e kumna amuh tei rui mipu ta tei nthan makmei di the twna kauc pat puni.

⁴Kum e tiki kazanc tei mphwan sini suhmei tei gidi khou na kumlana kahiw tei mphwan mak tw e thei amuh tei rui kata zaeng chanei karana ta tibam puni.

⁵Zaeng chanei nungc amuh tei rui zauc dat lana hei tei si mbu mak ge thei thu, zaeng chanei karana ta tibam dat puni he.

⁶Amuh tei rui zaeng chaneimei nungc zauc dat lana gay maih e thei khatni paengv patmei tuang maek ge thei, amuh tei rui kata nthan the twna kauc pat puni. Hei tei asuh tina e. Mipu tei kaphey sou datna kariak khou kamei nthan dat puni.

⁷Amuh tei rui zauc lana nthan the twna saloumei tangv tei, suhmei paengv pat dat re thei, kamei amuh khou guangna lyan dat nina e.

⁸Amuh tei rui kata zauc dat pwkhou hei tei paengv pat re thei, amuh tei rui kata tei nthan mak khe twna kauc pat puni the, hei tei mphaanh pat nuhmei ravpuat di the.

⁹Thowkumhmei naengv nuhmei gih ravpuat naimei kathuicna ta tei amuh khou phungc guang nina e.

¹⁰Amuh tei rui kata tei zauc puni. Kagic tei mphwanna puamc e thei khatni kahiw tei mphwan dat re thei, katiat nai e thei,

¹¹hei tei tingsaenghmei gih tuang ravpuat re. Amuh tei rui kata tei nthan mak khe twna kauc patlou puni the. Kata tei karana ta louna zauc bam dat khang kage maek khe.

¹²Kagic ravpuat tei paengv patna kapy khou rui katan nganv padik pat re thei

¹³amuh tei rui kata tei zauc dat puni. Kumna kamei tei kapumc pwm lik ngam the twmei thay e thei thu, amuh tei rui kata tei nthanmei de twna kauc pat puni the. Kalam thu kapumc pwm tei mphwan ngam dat re thei kamei tei nthan de.

¹⁴Kum e tiki sw pat dat re thei thu kamei tei nthan mak puni the.

¹⁵Amuh rui kata zauc dat lana suc pat datmei ta how e thei thu, amuh tei rui kata tei nthan makmei e twna kauc patlou puni. Suc pat datmei tei rui lyanmei thu hei tei naengv nuhmei tuang e twmei tuang e, kumhpui zaeng rui kamei tei mphuam the.

¹⁶Kum e tiki kazam tei gay datna hei tei mphwan dat kan e thei, mipu tei amuh khou tei guang dat nina e.

¹⁷Amuh tei rui zauc pwkhou kazam tei mphwan dat kan e thei, amuh tei rui kata tei nthan the twna kauc patlou puni.

¹⁸Thowkumhmei rui asuh sucna gay datmei zam khou tei

¹⁹mphwanmei puamhmei hamh e thei haengc sih sina mphwanmei pat re thei kamei rui amuh khou tei tat nina e.

²⁰Amuh tei rui zauc pwkhou suhmei tei gidi lungc thangc e thei khatni kahiw tei mphwan e thei amuh tei rui kata tei nthan makmei twna kauc pat puni. Mi hei asuh khou rui patmei naengv nuhmei ravpuat the.

²¹Amuh tei rui hei tei zauc pwkhou mi khou naimei hiw guay tei mphwan mak, suhmei tei gidi lungc gut mak, khatni hei tei mphwan tw e thei amuh tei rui kata zaeng chanei khang karana ta lou puni.

²²Suhmei tei paengv patna, amuh tei rui kata tei nthan makmei di the twna kaucpatlou e thei, hei tei naengvmei tuang ravpuat di the.

²³Hei tei paengv pat thuai makna kumna bam e thei, hei tei achinh de, kumna amuh tei rui kata tei nthanmei de twna kauc patlou puni.

²⁴Thowkumhmei khou mai rawmei zam khou tei mphwan pat re thei hamh e thei haengc nnau nyanh nyan pat re thei,

²⁵amuh tei rui kata tei zauc puni. Kazam khou naimei hiw guay tei mphwan pat re thei khatni hei tei gidi lungc thangc suc gut re thei, hei tei mai zam khou rui patmei naengv nuhmei ravpuat the, kumna amuh rui kata tei nthan makmei e twna kauc patlou puni.

²⁶Kum e tiki kahiw tei mphwan pat mak, khatni gidi lungc suc gut mak, tiki kazam tei ndav maih tw e thei amuh tei rui kata tei zaeng chanei karana ta tibam puni.

²⁷Amuh tei rui zaeng chaneimei nungc zauc dat puni. Khoutei kazam tei paengv pat re thei naengv nuhmei ravpuat re, kumna amuh tei rui kata tei nthan makmei twna kauc patlou puni.

²⁸Kum e tiki hei tei kalaic thuai mak khatni paengv pat thuai mak ge thei hei tei naengv nuhmei ravpuat hamh e. Amuh tei rui kata nthanmei de twna kauc patlou puni, kalam thu hei tei mai rawmei tuang achinh na de.

²⁹Thowkumhmei ntumei pwni, nggaanvmei pwni kapy khou hamh e thei kabiangc khou suh pat re thei

³⁰amuh rui hei tei zauc puni. Hei tei gidi lungc gut tangc e thei khatni mi khou tei naimei hiw guay tei nzinhna nsu e thei, hei tei naengvmei tuang the, kumna amuh rui kata tei nthan makmei e twna kauc pat puni.

³¹Amuh tei rui kata zauc pwkhou suhmei tei gidi khou na e thei kumc e tiki mi khou naimei hiw guay ta thu kara sina how e thei, kata tei zaeng chanei lou langc puni.

³²Zaeng chaneimei nungc amuh tei rui zauc dat puni, kumna hei tei paengv pat mak ge thei, khoutei naimei hiw tei nzinh mak ge thei khatni hei tei gidi khou na kumc e thei,

³³suhmei daeng guay tei guat ganc puni. Mi tangv tei kata tei zaeng chanei karana ta ganclou dat puni.

³⁴Mi tangv zaeng chaneimei nungc amuh tei rui hei tei zauc dat puni, kumna hei tei paengv pat mak ge thei, khatni gidi khou na kumc e thei, amuh tei rui kata tei nthanmei de twna kauc pat puni. Mipu tei kaphey kabaan sou nthan lana nthanmei sw dat puni.

³⁵Kum e tiki kamei nthan de twna kauc patloumei tangv suhmei tei paengv pat dat re thei,

³⁶amuh tei rui kata tei zauc dat puni. Kazam tei paengv pat dat re thei thu, kahiw nzinhmei ta phu dat bam khang kage maek khe; kamei tei nthan makmei di the.

³⁷Kum e tiki amuh tei rui zauc pwkhou kazam tei paengv pat mak ge thei khatni khou tei thau bammei hiw guay tei miw mak ge thei, kazam tei gay dat tina the. Kumna amuh tei rui kamei tei nthan de twna kauc pat puni.

³⁸Thowkumhmei ntumei, nggaanvmei khou kagic khou mphwan patmei tuang bamv nai e thei,

³⁹amuh rui kata tei zauc puni. Hei tei mphwan nziuh thuth thut re thei, hei tei meicgic nziuh patmei tuang de; kumna kamei tei nthan de.

⁴⁰Thow pwni kapy khou rui kasam keypui mei tei kapy kymeipu e tiki kamei nthan de.

⁴¹Kasan piangc ruc khou rui keymei bamv puni kamei tei kapy kymei de khatni nthanmei de.

⁴²Kum e tiki kymei bamv khoutei haengc sih simei mphwanmei ramhkhat how pat re thei hei tei naengv nuhmei ravpuat re.

⁴³Kumna amuh rui kata zauc pwkhou haengc sih simei mphwanmei tuang nai e thei

⁴⁴amuh tei rui kata tei nthan makmei the twna kauc patlou puni, kalam thu kapy khou naengv nuhmei ravpuat nai the.

⁴⁵Hei kumhmei naengv nuhmei ravpuat phunghmei nunc hei pheybaan kaekmei piuna, kasam zay makna, kazaw kabangc langv tei gumbin lana “Nthan makmei, Nthan makmei!” twna kaucna tat nina e.

⁴⁶Mi tuang ravpuat tei kakhou nai saanv kamei tei nthan makmei sw puni kumna kamei tei raengh paengc thangc lungcna charuangc khou rui ducna bam nina e.

⁴⁷Ramh hiw tuang hamh e thei linen tuang pheybaan khou,

⁴⁸hamh e thei guaihgic tuang puat khou samhtowmei tuang nai e thei,

⁴⁹hei tei ndiakc ge thei hamh e thei haengc e thei, hei tei naengv nuhmei tuang samh the kumhpui zaeng rui hei tei amuh khou guang lyan nina e.

⁵⁰Amuh tei rui hei tei zauc lana mi puat tei zaeng chanei lou baicna lou nina e.

⁵¹Amuh tei rui hei tei zaeng chaneimei nungc zauc dat pwkhou, samh tei daic pat re thei, mi puat tei nthan mak khe.

⁵²Amuh tei rui hei tei mai ntei nina e, kalam thu hei tei paengv patmei samh towmei e, kumna hei tei mai ntei ganc nina e.

⁵³Kum e tiki, amuh tei rui hei tei zauc pwkhou, samh tei mi puat khou tei paengv pat kadai tuang maek ge thei,

⁵⁴hei tei souna zaeng chanei lou baicna lou o twna latdanv pat puni.

⁵⁵Kumna amuh rui zauc dat pwkhou hei tei paengv pat kadai mak sini karing tei kalaic mak ge thei, hei tei nthan mak ge; samhtowmei tei thei biak bam pwni hu biak bam pwni mi puat tei mai ntei ganc rap nina di the.

⁵⁶Kum e tiki amuh tei rui hei tei zauc dat pwkhou, samh tei kamv key e thei, mi samhtowmei langv tei siat ganc puni.

⁵⁷Mi tangv tei samh tei tow datna paengv pat re thei kakaipouc rui mi puat tei mai ntei ganc rap nina the.

⁵⁸Kamei mi puat tei sou tina samh tei amaan kan e thei, kamei rui mi puat tei sou dat kaluaihna hei tei kariak theilayna nthan dat puni.

⁵⁹Mi hei ramh hiw tuang hamh e thei linen tuang pheybaan hamh e thei guaihgic tuang puat khou samhtowmei khou sw nimei riak ge.