Read Rongmei Naga LEVITHOUC 15 Bible Online

LEVITHOUC 15 - Rongmei Naga bible

LEVITHOUC 15

¹RINGHPOUC rui Mousi khatni Aron khou kumna sa the.

²Isaraelmei guay khou sa o: Nggaanvmei tuang khurou khou rui patmei tei nthan makmei e.

³Hei tei pat nthaekc pwni nthaekc makna pat bam pwni hei tei rui kata sw tanac the.

⁴Kamei rui dungcloumei khatni ziploumei laeng tei mphuam the.

⁵Katuang laeng tei kahipui mei tei

⁶hamh e thei kamei rui dungcloumei bamv khou dungcloupui mei tei kaphey kabaan souna duilow nina e kumna kamei tei tingzyn nganvna nthan mak ge.

⁷Mipu ta tei kahiloupui mei tei kaphey kabaan souna, duilow nina e, kumna kamei tei tingzyn nganvna nthan mak ge.

⁸Thowkumhmei mphuam makmei akhat khou mi kumhmeipu tei rui teih nsuklou e thei, kamei tei kaphey kabaan souna duilow nina e, kumna kamei tei tingzyn nganv nthan mak ge.

⁹Kumhmeipu tei rui dungcloumei bamv khatni takuanh bamv kaguayna tei mphuam e.

¹⁰Mi kumhmeipu tei rui dungcloumei bamv ta tei kahipui mei tei tingzyn nganvna nthan mak ge. Kamei rui dungcloumei bamv tei puanhpui mei tei kaphey kabaan souna duilow nina e, kumna kamei tingzyn nganv nthan mak ge.

¹¹Hei kumhmei tatpui mei tei kabaanc khiu dat makna meic gaanv khat ta kahilou e thei kahiloupui mei tei kaphey kabaan sou datna duilow nina e, kumna kamei tei tingzyn nganvna nthan mak ge.

¹²Kamei rui kahiloumei taniang lai guay tei swbak nina e khatni thing tuang kuak guay tei khiu dat nina e.

¹³Mipu tei karavpuat khou tei rui gay dat re thei zaeng chanei nkhwanna mi tangv tei kaphey kabaan souna, luanghmei duithan khou lou nina e, kum e thei kamei nthan dat puni.

¹⁴Zaeng tachatpui nungc aphina kanei hamh e thei akhouhna kanei phungcna RINGHPOUC tuang kalummei pheykai chaengmun khou amuh khou tei guang nina e.

¹⁵Amuh tei rui akhat tei paapc khang khaeng puni, kumna akhat rui rawna khaeng puni. Heikumna amuh tei rui kata sw nthanloumei tuang thouc tei swlou puni.

¹⁶Nggaanvmei akhat khou khurou dui tei tat re thei, kamei tei duilow nina e, kumna tingzyn nganvna nthan makna bam puni.

¹⁷Phey pwni, guaihgic tuang puat pwni mi khou tei mphuammei keylou e thei kahiloumei puat tei sou dat nina e, kumna tingzyn nganvna hei tei nthan makmei e.

¹⁸Ntumei lev nggaanvmei tei tatloumei tangv duilow dat nina e, kumna kaney tei tingzyn nganvna nthan mak ge.

¹⁹Ntumei akhat rui bwchaeng tat re thei, zaeng chanei kamei nthan mak puni. Kumhmeipui ta tei kahiloupui mei tei tingzyn nganvna nthan mak ge.

²⁰Mi ganv khou tei kamei rui dungcloumei khatni ziploumei puat guay tei nthan mak ge.

²¹Thow pwni kalaeng kahilou e thei kaphey kabaan souna khatni duilow nina e, kumna tingzyn nganvna nthan makmei e.

²²Thow pwni kamei rui dungcloumei puat ta kahi e thei kaphey kabaan souna khatni duilow nina e, kumna tingzyn nganvna nthan makmei e.

²³Zy laeng pwni hamh e thei kamei rui dungcloumei bamv pwni, kahiloupui mei tei tingzyn nganvna nthan makmei e.

²⁴Hei kumhmei bwchaeng tat bammeipui khou tatloumeipu tei mipui tuang mphuammei dam tei kamei laa the, kumna kamei tei zaeng chanei nthan makna bam puni. Mipu tei rui ziploumei laeng tei ni nthan mak khe.

²⁵Ntumei akhat rui kamei bwchaeng tatmei tei hamhna zei tat re thei kamei zei tat bam saanv tei bwchaeng tatmei ganv khou mphuammei tei kumcna mphuam puni.

²⁶Mi ganv khou tei kamei rui dungcloumei dungbamv khatni ziploumei laeng tei mphuam the.

²⁷Hei tei kahiloumei kathuic tei mphuam the. Kumna kamei tei kaphey kabaan souna duilow nina e, kumna tingzyn nganvna kamei tei nthan mak ge.

²⁸Hei tei tat taanmei tangv kamei zaeng chanei nkhwan nina e, kum e thei kamei nthan dat the.

²⁹Zaeng tachatmei nungc kamei rui akhouhna kanei hamh e thei aphyna kanei phungcna amuh daeng khou RINGHPOUC tuang kalummei pheykai kaimun khou tei guang nina e.

³⁰Amuh tei rui aphyna akhat tei paapc khang khaeng puni, kumna akhat tei rui rawna khaeng puni. Mi kumcna amuh rui kata sw nthanloumei tuang thouc tei swlou puni.

³¹Isaraelmei nunc kaniw tuang zypui kailuangc laa khou naimei RINGHPOUC tuang pheykai tei sw mphuamlouna theihmei pat mak khang rui Isaraelmei nunc tei nthanmei khatni mphuammei lam khou ramhthay khang sa o twna RINGHPOUC rui Mousi khou sa the.

³²Mi hei nggaanvmei akhat rui khurou dui hamh e thei kapumc khou rui mphuammei dui tatmei ganv khou,

³³ntumei bwchaeng tatmei, khatni ntumei mphuammei ganv khou tatloumei mi kumhmei tuang lam khou dincloumei tuang the.