Read Rongmei Naga LEVITHOUC 17 Bible Online

LEVITHOUC 17 - Rongmei Naga bible

LEVITHOUC 17

¹RINGHPOUC rui Mousi khou sa the,

²Aron khatni kanac mpouh nunc khatni Isaraelmei guay khou mi hei RINGHPOUC tuang latdanv e twmei salou tio.

³Isaraelmei pang khou thowkumhmei rui guaih pwni, lauziu pwni, ziuh pwni khaeng khang zypui kailuangc khou hamh e thei zypui kai paengc thangc swluaina

⁴RINGHPOUC tuang pheykai khou RINGHPOUC mav khou phungc gut mak ge thei kamei tei zei tikeymei tuang khuay nai the, kata meic pang khou rui swluai ganc nina e.

⁵Mi tuang kabac kiu thu ntaw nangniw rui ramvpuk khou ravkhaeng bammei tei ntaw thu RINGHPOUC khou phungc guang dat nina the. Khaeng nimei khouringc tei pheykai kaimun khou amuh khou tei phungc guangna alamvpuatkat swna kat nina the.

⁶Amuh tei rui zei tei kalummei pheykai kaimun khou naimei ravchapaeng naek guay khou tei kazinhlouna kathav tei mai nteina karym tei rui RINGHPOUC ta tipianlou puni.

⁷Isaraelmei nunc rui ramvpuk khou ziuh ravsic nunc khang khaengna RINGHPOUC khou lwm nuh makmei lwnlung swna bammei tei sw taan nina e; Isaraelmei rui mi hei thei thangc nganvna ngaek bam nina e.

⁸Isaraelmei khatni Isaraelmei pang khou khuam bammei meic baihmei pwni rawna katmei hamh e thei khaengmei sw lana

⁹RINGHPOUC tuang kalummei pheykai khou RINGHPOUC khang khaeng khang phungc gut mak ge thei kata meic pang khou rui swluai ganc nina e.

¹⁰Isaraelmei pwni, kaniw pang khou khuam bammei zaatc baih baihmei pwni zei naimei zanc tu e thei RINGHPOUC rui kata tei ganc pat puni kumna kamei pang khou rui swluai ganc puni.

¹¹Ringhmei katana tuang ringhmei tei zei khou tei nai e, hei zaeng rui maansei tuang paap laa ganclou khang ravchapaeng khou tei zei kapwm tei bun keylou nina e twna RINGHPOUC rui latdanv tiimei tuang e. Ringhmei naimei zei tei rui paapc laa ganhmei tuang e.

¹²Hei zaeng rui Isaraelmei khatni kaniw khou khuamna bammei zaatc baih baihmei ni zei naimei zanc tu nuh mak ge twna ai rui samei tuang e.

¹³Isaraelmei khatni kaniw pang khou khuam bammei zaatc baih baihmei ni suc-zouc nrikna nthanmei nruayna pwni suc-zouc pwni swluai e thei kazei tei kandih khou bun keylouna hei tei taniang rui kagouh binlou dat nina e.

¹⁴Ringhmei katana tuang ringhmei tei zei khou tei nai e. Hei zaeng rui RINGHPOUC rui Isaraelmei ta zei kazauhmei zanc tu nuh mak ge, hei tei tu e thei kamei pang khou rui ganc pat puni twna samei tuang e.

¹⁵Isaraelmei pwni, zaatc baihmei pwni, karana theihmei hamh e thei khouringh rui swluailoumei zanc tu e thei kaphey kabaan souna khatni duilow lana tingzyn nganvna nthan makmei swna bam nina e. Hei tangv rui kamei nthan dat puni.

¹⁶Kamei hei tei sw mak ge thei mi tuang manv tei kamei nsingh puni.