Read Rongmei Naga LEVITHOUC 18 Bible Online

LEVITHOUC 18 - Rongmei Naga bible

LEVITHOUC 18

¹RINGHPOUC rui Mousi khou sa the.

²“Ai hei RINGHPOUC nangniw Racguangc e twmei Isaraelmei nunc khou salou o.

³Nangniw lungcloumei Izipmei nunc thak tei layluaih riu, ai rui nangniw ta nduangh guanglou pw nimei Kanaanmei nunc thak ni layluaih riu.

⁴Atuang latdyn guay piu o khatni alatdanv guay tei taanc o. Ai hei RINGHPOUC nangniw tuang Racguangc e.

⁵Ai rui nangniw khou tiiloumei latdyn khatni latdanv guay tei piu o, kum e thei nangniw ringc puni. Ai hei RINGHPOUC e.”

⁶Nangniw zei anamei khou tatlou lak nina e. Ai hei RINGHPOUC e.

⁷Nang pui khou tatlouna nang pu ta tizak nuh mak ge. Nang pui ta ni nang tizak nuh mak ge.

⁸Nang pu now nunc khou ni tatlouna nang pu ta tizak nuh mak ge.

⁹Nang kai akhat na khou lungc nchamc thaumei tanpui pwni lungc nchamc thau makmei tanpui pwni nang tanpui swmei khou tatlou nuh mak ge.

¹⁰Nang tanpui khou nang tatlou nuh mak ge; hei tei meiczakmei tuang e.

¹¹Nang pu now nac khou tatlou nuh mak ge, kamei ni nang tanpui muay de.

¹²Nang neic khou nang tatlou nuh mak ge; kamei nang pu lev anamei e.

¹³Nang pui suanrey khou tatlou nuh mak ge; kamei tei nang pui lev anamei e.

¹⁴Nang pu chana now khou nang tatlou nuh mak ge; kamei tei nang puilauc e.

¹⁵Nang mauc khou nang tatlou nuh mak ge.

¹⁶Nang chana now khou ni tatlou nuh mak ge.

¹⁷Ntumei akhat khou khatni kanac luhpui twmei thu kapui kanac khou tatlou nuh mak ge, hamh e thei kanac mpouh now khou ni khatni kanac luh pui rui puancpatmei kanac pui khou tei ni tatlou nuh mak ge kalam thu hei tei simei e.

¹⁸Nang now theih mak khou nang now suanrey ta kaw nuh mak ge.

¹⁹Bwchaeng tat bammei ntumei khou tatlou nuh mak ge, kalam thu kamei tei mphuammei e.

²⁰Meickai now khou tatlou nuh mak ge; hei tei rui nang ta swtanac puni.

²¹Molek rav ta kalummei taanv khang nangniw nac nunc ta tiipat nuh mak ge, kalam thu hei tei rui RINGHPOUC Ravguangc zaw sw kasic e. Ai hei RINGHPOUC e.

²²Nggaanvmei nchamc ntu nggaanv thiak khou zip kariu nuh mak ge; hei tei Ravguangc rui karaeng e.

²³Ntumei ni nggaanvmei ni khouringh lev ntu-nah nuh mak ge; hei tei rui nangniw ta sw mphuam puni.

²⁴Mi kumhmei tuang taanv hei rui nangniw rana nangniw ta swtanac riu. Nangniw gut nimei kandic khou rui RINGHPOUC rui nthau ganc pw nimei zaat nunc hei guay rui kaniw rana kaniw ta sw mphuamna lungc the.

²⁵Kaniw tuang taanv rui mi kandic ta tei swtanac the. Kumhpui zaeng rui RINGHPOUC rui kaniw ta dandi tii the kumna mi kandic khou tei rui alay pat the.

²⁶Tiki nangniw rui atuang latdyng khatni latdanv guay piu nina e, khatni sa bammei chanymei taanv khat sini nangniw lev khuam bammei zaatc baihmei nunc ni taanc nuh mak ge.

²⁷Mi sa bammei chanymei taanv guay hei nangniw hu khou lungclou duhmei kandih mei nunc rui taanc the kumna kaniw rui mi kandic ti hei sw mphuamlou the.

²⁸Nangniw hu khou lungclou duhmei zaatc baihmei nunc ta alay ganc kanmei kumcna nangniw ni karaeng chanymei thak khou lungc e thei alay ganc muay puni.

²⁹Hei kumhmei chanymei tuang taanv taanhmei guay ta thu kamei pang khou rui ganc pat puni.

³⁰Alatdanv guay hei piuna nangniw hu khou mi kandic khou hei lungclou kanmei nunc thei layluaih riu, mi guay hei taanc lana nangniw rana ta sw mphuam riu. Ai hei RINGHPOUC nangniw Racguangc e.