Read Rongmei Naga LEVITHOUC 19 Bible Online

LEVITHOUC 19 - Rongmei Naga bible

LEVITHOUC 19

¹RINGHPOUC rui Mousi khou sa the,

²“Nangniw nthan o, kalam thu RINGHPOUC ai hei nthanmei e” twna Isaraelmei kapwm khou sa o.

³Nangniw meic kathuicna kapui kapu ta chakhwang sw nina e, khatni Sabbathneic ngaek nina e. Ai hei RINGHPOUC nangniw tuang Racguangc e.

⁴“Ata ganclouna rav baihmei ta kalum riu; ntanh rui ravmaengh kasiamhna kalum riu. RINGHPOUC ai hei nangniw tuang Racguangc e.

⁵“Alamvpuatkat khaeng pwkhou ai rui nangniw khou tiilou kanmei kariak guay tei ngaekna khaeng o. Kum e thei ai rui laalou puni.

⁶Zanh tei khaengmei nungc tei hamh e thei nthuanh thauna tu nuh e. Zaeng neih thumhmei nungc nsaekcloumei zanc tei thu mai ntei nina e,

⁷Kalam thu hei tei nthan mak khe, kumna hei tei thowkumhmei rui tulou e thei mi puatkat tei ai laa dat lak khe.

⁸Hei tei tupui mei ta tei dandi tii puni, kalam thu Ravguangc tuang nthanmei puat ta swtanaclou e; mi kumhpui mei ta kiuc kamei pang khou rui alay ganc puni.

⁹“Nangniw lautaypui kaanc khou lautaengh tay tangh riu, khatni tay nsaekcloumei tei tay dat riu.

¹⁰Nangniw tuang drakhalau khou rei amucloumei tei rei dat ri tho, kandih khou kathyng keymei tei ni khuaic dat ri tho; hei tei lungcsi-lungcroucmei khatni gin nunc khang ganclou o. RINGHPOUC ai hei nangniw tuang Racguangc e.

¹¹“Kaihouh riu, meicguat riu, lat saraamh riu.

¹²Nangniw nkhuaimei khou azanc saancna latdyng sw riu; hei tei rui azanc sw kasic e. RINGHPOUC hei nangniw tuang Racguangc e.

¹³“Meickai ta guat riu khatni meickai tuang asut laa riu. Nangniw rui meic gaanv khat tuang zaengphy tei zingbangc akhat na sini lou zip riu.

¹⁴Kanu ndymei ta siang riu khatni miktiatmei hu khou kalanv nuhmei puat lou riu. Ata ping o; RINGHPOUC ai hei nangniw tuang Racguangc e.

¹⁵“Nangniw latzan sw pwkhou lungning nthanna khatni nchumhna sw o; lungcsi lungcgay zaucna latzan sw riu.

¹⁶Kathuatcpui lat nangniw khat khat ta sa tat riu, kaigei kainingmei ta tikabiu nimei taanv khat sini taanh riu.

¹⁷“Meic gaanv khat ta zauczihna bam riu; kazaeng rui nang paapc khou keylou mak khang kamei lev lat gay dat ro.

¹⁸Meic gaanv khat na ta sini khwm khangh riu, karaengna ni bam riu, tiki nang rana nang ta nzianmei kumcna nang kainingmei ta nzian o. Ai hei RINGHPOUC e.

¹⁹“Atuang latdanv guay hei piu o. Khouringh kazaat baih baihmei ta tichakariu riu; laupuk akhat na khou phunling kazaat kanei lingc kariu riu. Langh kazaat kanei kariumei phey piu riu.

²⁰“Meic gaanv khat rui kabangcpui ta meic gaanv khat now khang zuanclou khang lat luailouna kamanv tei tii mak khou nreylou e thei kaney lam khou zauc nthanna dandi thu tii puni tiki swluai nuh mak ge kalam thu mi pui ta nyng tiswlou mak-he.

²¹Mipu tei khuay khang khaeng khang lauziuchic akhat atuang kalummei pheykai kaimav khou phungc guang nina e.

²²Kumna amuh tei rui kata sw nthanmei tuang thouh swlou e thei Ravguangc rui kapaap kuaklou dat puni.

²³“Nangniw rui Kanaan kandic khou guangna tingthai pwanpiu lingclou e thei tingkwm kathumh nganv tuang thai guay tei thu nthan makmei e twna laa nina e. Mi ganv lungc khou tuang thai guay nangniw tu lak nina e.

²⁴Padeihmei kwm tingthai guayna tei thuanckumei tuang puatkat swna RINGHPOUC khou katlou nina e.

²⁵Kumna panguhmei kwm tingthai tei tu nuh the. Nangniw rui mi hei piuna taanc e thei thingbang guay kathai nthai geic puni. Ai hei RINGHPOUC nangniw tuang Racguangc e.

²⁶“Zei naimei zanc tu nuh mak ge. Duaih-raengh ni sin nuh mak ge.

²⁷Nangniw py rap kari duangc nuh mak ge, nangniw mwanghiw ni tiap nuh mak ge.

²⁸Theic kanmei khang meic pumc khou hiak bammei khatni sw zamh bammei guay tei sw nuh mak ge. Ai hei RINGHPOUC e.

²⁹“Nangniw aluh nunc ta tei Isaraelmei tuang mangcsangmei nunc tisw riu; kumna sw e thei nangniw kandic khou mangcsangmei khatni kheiliak simei rui padik puni.

³⁰Sabbathneic tei ngaek go, ata kalummei bamv ta tei chakhwang sw o. Ai hei RINGHPOUC e.

³¹“Nangniw ravtow amuc ta kachuc tat nuh mak ge. Kachuc e thei nangniw mphuam puni. Ai hei RINGHPOUC nangniw tuang Racguangc e.

³²“Gaanvsuh gaanvthaih nunc ta chakhwang sw o. Ata ping o. Ai hei RINGHPOUC e.

³³“Nangniw tuang kandic khou lungc bammei zaatc baih baihmei nunc ta sina sw riu.

³⁴Nangniw chana punav Isaraelmei nchamc ta kumcna sw o, khatni nangniw khat khat ta nzianmei kumcna kaniw ta ni nzian o. Kalam thu nangniw Izip khou gin swna lungclou bam khwan e. Ai hei RINGHPOUC nangniw tuang Racguangc e.

³⁵“Kasaanv pwni, karith pwni, kasing pwni ndath pwkhou nchumh makna ndat riu.

³⁶Nchumhmei tuang duh, ndath ryan, khatni handuk sin sw o. Ai hei RINGHPOUC nangniw tuang Racguangc e, kumna ai rui nangniw ta Izip khou rui phungc guangloumei tuang e.

³⁷Atuang latdyn khatni latdanv guay tei piu o. Ai hei RINGHPOUC e.”