Read Rongmei Naga LEVITHOUC 2 Bible Online

LEVITHOUC 2 - Rongmei Naga bible

LEVITHOUC 2

¹Thow pwni RINGHPOUC khang ntyan kat pwkhou, kamei rui hei tei ntyan buay swlouna kat nina e. Kamei rui mi khou tei Olive thauc lev agaw lou kazauh nina e.

²Kamei rui hei tei Aron kaikhwangmei amuh nunc khou phungc guang nina e. Thouh sw bammei amuh tei rui ntyan buay khatni thauh tei baankiu akhat laana agaw kapwm tei lev ravchapaeng khou tei ntei nina e. Hei tei RINGHPOUC khang katlou the twmei hei tei rui lyanmei tuang e. Mi rym tei rui RINGHPOUC ta tipian e.

³Kumna nsaekcloumei ntyan buay guay tei thu amuh nunc tuang dam e; hei tei RINGHPOUC khang katloumei tuang swpui zaeng rui nthanmei e.

⁴Maimangh khou rawmei ntyan kat nii e thei, khay loumakmei ntyan nina e. Hei tei Olive thauc kaniloumei nsumei ntyan sw nuh e hamh e thei mpumei ntyan Olive thauc teyloumei nina e.

⁵Laikuak khou kabicmei ntyan kat nii e thei hei tei Olive thauc kanimei, kum e tiki khay loumakmei ntyan nina e.

⁶Hei tei kat ni khou by puatna Olive thauc liclouna kat nina e.

⁷Khaenglai khou suanghmei ntyan kat nii e thei, hei tei Olive thauc kaniloumei ntyan buay rui sw nina e.

⁸Hei tei RINGHPOUC khang puatkat swna phungc guangna amuh khou tei tiilou ti tho, kumna amuh tei rui ravchapaeng khou tei laaguanglou puni the.

⁹Mi kapwm tei RINGHPOUC khang katlou the twmei lyanmei swna amuh tei rui hei tei asaekc laana RINGHPOUC khang katlou puni, kumna kamei rui hei tei ravchapaeng khou tei raw puni. Mi hei rawna khaengmei e, mi rym tei rui RINGHPOUC ta tipian e.

¹⁰Nsaekcloumei guay tei Aron khatni kanac nunc khang e, hei tei nthanmei e, kalam thu RINGHPOUC khang mai rawna katloumei khou rui laa patmei tuang e.

¹¹RINGHPOUC khang katloumei ntyan akhat na sini khay kazauh nuh mak ge; RINGHPOUC khang tii nimei ntyan khou tei khay khatni nkhuaihdui kazauh nuh mak ge.

¹²Nangniw tingkwm khou tay reymei napthai tei RINGHPOUC khang katlou nina e, kum e tiki hei tei thu ravchapaeng khou rawna kat nina hamh e.

¹³Ntyan katmei kathuic khou tei ntey kazauh nina e, kalam thu ntey hei Ravguangc lev nangniw kak khou latdyng swloumei lyanmei tuang e. (nangniw tuang puatkat kaguayna khou tei ntey lou nina e.)

¹⁴Tayreymei nap tuang puatkat RINGHPOUC khang phungc guang e thei kanuaih tangkeyna sw nthanna khatni mai khou saana kat ro.

¹⁵Khoutei Olive thauc khatni agaw lou kazauh nina e.

¹⁶Amuh tei rui katloumei nap khatni Olive thauc asaekc tei, khatni agaw kapwm tei rawna katmei puatkat swna kat nina e.