Read Rongmei Naga LEVITHOUC 20 Bible Online

LEVITHOUC 20 - Rongmei Naga bible

LEVITHOUC 20

¹RINGHPOUC rui Mousi khou sa the,

²Isaraelmei guay khou kumna sa o: Isaraelmei pwni, nangniw khou khuam bammei zaatc baihmei pwni Molek rav ta kalum khang kanac nunc ta tii pui mei ta tei kandihmei rui ntauh kwamluai nina e.

³Kanac nunc ta Molek rav khang katna atuang kalummei pheykai ta swtanacpui mei khatni nthanmei azanc ta swtanacpui mei ta tei amei nunc khou rui swluai ganc puni.

⁴Kum e tiki kandihmei rui mi ta tei thouh swlou makna kata tei swluai makna ganclou pwsini

⁵ai rui mi kumhmeipu khatni kakai kaikhunc kapwm khatni akhou lwm nuh makmei swna Molek ta kathei layna kalum tatmei guay ruc khou taanv sw puni. Ai rui kaniw ta amei swna laalou dat lak khe.

⁶“Ravtow amuc kachuc tatmei nunc ta ai taanv sw puni, kumna amei pang khou rui laa ganc puni.

⁷Nangniw meic nunc khou rui langv baicna nthanna bam nina e, kalam thu RINGHPOUC ai hei nangniw tuang Racguangc e.

⁸Atuang latdanv guay hei piu o, kalam thu ai hei RINGHPOUC e kumna ai rui nangniw ta sw nthanlou the.”

⁹RINGHPOUC rui mi tuang latdanv hei ni tii e. Kapui kapu ta siangpui mei ta tei swluai nina e. Kamei theihmei tei katuang khuay de.

¹⁰Isaraelmei akhat rui Isaraelmei nchamc now khou nkhuailou e thei, nggaanvmei lev ntumei gaanv nei ta tei swluai nina e.

¹¹Thowkumhmei rui kapu now ta nkhuailou e thei kamei kapu zaw sw kasic e, kumna nggaanvmei lev ntumei gaanv nei ta tei swluai nina e. Kaney theihmei tei kaney manv de.

¹²Thowkumhmei rui kamauc ta nkhuailou e thei, kaney gaanv nei ta tei swluai nina e. Kaney tei mphuammei taanv taanc the, kumna kaney khuay zaeng rui kaney theic nina e.

¹³Nggaanvmei nchamc chanymei tuang taanv taanc e thei, kaney gaanv nei ta tei swluai nina e. Kaney theihmei tei kaney manv de.

¹⁴Thowkumhmei rui kapui kanac ta kaw e thei, kaniw rui meiczakmei tuang taanv tei taanhmei zaeng rui kaniw ta tei mai ntei luai nina e. Hei kumhmei tuang taanv hei nangniw pang khou taanh khang nuhlou lak nina e.

¹⁵Thowkumhmei rui khouringh ta ntu-nahlou e thei, mipu khatni khouringh ta tei swluai nina e.

¹⁶Ntumei akhat rui khouringh lev ntu-nah khang sw e thei mipui khatni khouringh ta tei swluai nina e. Kaniw theihmei hei kaniw manv de.

¹⁷Thowkumhmei rui katanpui ta kawna nreylou e thei, hei tei meiczakpui tuang di the. Hei zaeng rui kaney ta meic pang khou rui swluai ganc nina e. Theihmei dandi tei kamanv di the.

¹⁸Thowkumhmei rui bwchaeng tat bammei ntumei khou tatlou e thei kaney gaanv nei ta tei meic pang khou rui alay ganc nina e, kalam thu kariak khou nthan makmei taanv kaney taanc the.

¹⁹Thowkumhmei rui kaneic khatni kapui suanrey khou tatlou e thei mi mphuammei taanv taanhmei tuang dandi tei kaney ruc khou tikeylou nina e.

²⁰Thowkumhmei rui kapu chana now lev zip kariulou e thei, kamei tei rui kapu chana ta tizaklou e, kumna mi tuang dandi tei kaney tunapuan maekna theic puni.

²¹Thowkumhmei rui kachana now ta kaw e thei, kaney nac maekna kaney tei theic puni. Kamei rui mphuammei taanv taancna kachana ta tizak the.

²²RINGHPOUC rui sa the, “Ai rui nangniw ta phungc guanglou pw nimei Kanaan kandic hei rui nangniw ta ganc pat mak khang atuang latdanv guay tei nangniw ngaek go.

²³Khoutei lungc bammei nunc thak tei layluaih riu; kaniw rui simei taanv taanhpui zaeng rui ai rui kaniw ta nthau ganhmei tuang e.

²⁴Guaihnoudui lev nkhuaihdui rui luanghpui ramc tei ai rui nangniw khang tiilou puni the kumna kaniw tuang ramv tei nangniw tuang sw puni the. Ai hei RINGHPOUC nangniw tuang Racguangc kandihmei zaatc azuh khou rui nangniw ta langv baicna kawpatloumeipu rui sa tuang the.

²⁵Kumhpui zaeng rui nruay thauruay pwni khouringh khounah pwni nthanmei nthan makmei kakhakh kalangv naina lungc nina e. Nthan makmei nruayna khatni khouringh zanc tu nuh mak ge. Ai rui mi guay tei nthan makmei e twna kauc patlou kan the, kumna hei tei nangniw rui tu e thei nangniw nthan mak puni the.

²⁶Nangniw hei nthan nina e khatni atuang na sw nina e, kalam thu ai hei RINGHPOUC e khatni ai hei nthanmei e nangniw hei atuang na sw khang rui ai rui nangniw ta zaatc baih baihmei pang khou rui baicna kadah langc patloumei tuang the.

²⁷“Thow pwni ravtow amuc kachucpui mei ta tei ntauh nkwam luai puni; hei kumhpui mei tei kamei theihmei tei kamanv de.”