Read Rongmei Naga LEVITHOUC 21 Bible Online

LEVITHOUC 21 - Rongmei Naga bible

LEVITHOUC 21

¹RINGHPOUC rui Mousi khou sa the: Tingkuh Aron nac nunc khou tei kumna sa o: Tingkuh gaanv khat na rui sini kariang kaluaic theihmei zaeng rui kapumc sw mphuam lak nina e.

²Kamei tei ana liangmei riangluaic kapui kapu, kanac mpouh, kanac aluh, kachana

³khatni liuchang kamei lev mpeyna anamei riangluaic, kalam thu kamei hei kagaanv maek ge, hei nunc khang hamhna thu kapumc sw mphuam nuh mak ge.

⁴Theihmei mei tei now nac biak thangc rui riangluaih swpui zaeng rui pumh sw mphuam nuh mak ge.

⁵“Amuh gaanv khat na sini kapy guat nuh mak ge, kamwanghiw tiap nuh mak ge khatni zaengsimei lyanna meicpumc khou hiakmei tei ni hiak nuh mak ge.

⁶Kamei tei nthan nina de kumna azanc sw kasic nuh mak ge. Kamei hei akhang kat guangmei taektw katmeipu e, kumhpui zaeng rui kamei hei nthan nina de.

⁷Amuh akhat tei mangcsangmei luc swloumei, liuchang hamhmei, hamh e thei meickai rui muloumei mi kumhmeipui ta kanow khang laa lak nina e; kamei hei thu nthanmei de.

⁸Meic nunc rui amuh ta nthanmei e twmei laa nina e kalam thu kamei akhang taektw puatkat katmeipu e. Ai hei RINGHPOUC e; ai hei nthanmei e, hei zaeng rui ai amei nunc ta sw nthanlou e.

⁹Amuh nac aluh akhat rui kapumc zuanhmei sw e thei, kamei rui kapu ta tizak ge; kumna kata tei mai ntei luai nina e.

¹⁰“Tingkuh tei kapy khou teymei thauc bunlou kanmei tuang e khatni amuh nunc tuang pwan piu khang katpatlou kanmei tuang e. Kumhpui zaeng rui kapy tei thauh tey maekna bam nuh mak ge, kaphey ni siat kaek nuh mak ge.

¹¹Meic theihmei naipui bamv khou tei tat lak nina e, kapui kapu theihmei khou nganv tatna kapumc sw mphuam nuh mak ge.

¹²Nthanmei Ravkai lungc khou tei rui tatpat lana kaRacguangc tuang nthanmei ta sw mphuam nuh mak ge. Tingkuh tei thu akhou katloumei di the. Ai hei RINGHPOUC e.

¹³Kanow khang liuchang ta laa nina e.

¹⁴Amaypui ta, meickai rui muloumeipui ta khatni kapumc zuanhmei swloumeipui ta kaw nuh mak ge. Kamei tei kakai kaikhwangmei liuchang ta na kaw nina e.

¹⁵Kum mak ge thei kanac nunc tei mphuam puni. Ai hei RINGHPOUC e kumna ai rui kata tingkuh swna kadahpatloumei tuang di the.”

¹⁶RINGHPOUC rui Mousi khou sa the,

¹⁷Aron khou kumna sa o: “Kapumc nthuih makmei nang kikta gaanv khat na rui sini akhang taektw tei kat nuh mak ge. Mi hei thei thangc nganvna tat bam nina e.

¹⁸Thow pwni kapumc hiaksui makmei, miktiatmei hamh e thei katan baumei,

¹⁹phaybaanh chuanchaymei,

²⁰kangumc nkuanmei, kalwnlung tuang saengdai makmei, kamik karyngmei, asuh naimei hamh e thei kapumc siammei hei kumhmei nunc rui khaengmei thouc sw nuh mak ge.

²¹Amuh Aron kikta gaanv khat na sini kapumc nthuih makpui mei rui akhang taektw puatkat kat nuh mak ge.

²²Mi kumhmei nunc tei akhang katloumei nthanmei khatni nthan dianghmei taektw tei kaniw tu nuh e,

²³tiki pumh khou nthuih makpui zaeng rui kamei tei nthanmei khamthinghphey daeng khou khatni ravchapaeng daeng khou guang nuh mak ge. Kamei rui mi kumhmei nthanmei puat ti hei sw mphuam nuh mak ge. Kalam thu ai hei RINGHPOUC e kumna ai rui mi guay tei sw nthanlou the.”

²⁴Mi guay hei Mousi rui Aron khou, Aron nac mpouh nunc khou, khatni Isaraelmei guayna khou salou the.