Read Rongmei Naga LEVITHOUC 23 Bible Online

LEVITHOUC 23 - Rongmei Naga bible

LEVITHOUC 23

¹RINGHPOUC rui Mousi khou sa the,

²Isaraelmei guay khou kumna sa o: mi guay hei RINGHPOUC tuang kapah patloumei khumngai the, kumna atuang khumngai guay ti hei nthanmei khumngai e twna kauc ndauh nina e.

³Nangniw taanvtaanh khang zaeng charuk nai e, tiki zaeng chaneimei, Sabbath tingmik tei thu zaeng nthaekcmei tingmik ge. Mi tingmik nungc tei taanvtaanh riu, tiki kalum khang guang kaduai o. Nangniw tabui bui bamv khou bam sini Sabbath hei thu RINGHPOUC khang e.

⁴Kaganv guang tangc pwkhou kabangc khoumei khumngai hei kauc pat ro:

⁵RINGHPOUC tuang Kaanpatmei Ngai hei reymei bw tuang zaeng 14mei nungc neih key khou rui ngay thau nina e.

⁶Zaeng 15mei nungc Khay loumakmei ntyan Ngai kahouh the, kumna khay loumei ntyan zaeng chanei nganv tulak nina e.

⁷Mi ngai tuang rey liangmei nungc hei nangniw kalum khang guang kaduai nina e, kumna nangniw taanvtaanc nuh mak ge.

⁸Zaeng chanei tei RINGHPOUC khang taektw katmei thouc tei sw nina e. Kumna zaeng chaneimei nungc kalum khang guang kaduai dat nina e. Mi nungc hei nangniw taanvtaanc lak nina e.

⁹RINGHPOUC rui Mousi khou sa the,

¹⁰Isaraelmei guay khou kumna sa o: RINGHPOUC rui nangniw khang tii nimei kandic khou kiu guang tangcna lau tay pwkhou rey liangmei napchu tei amuh khang phungc guang o.

¹¹RINGHPOUC rui laalou diu khang amuh tei rui nkunmei puatkat swna katlou puni. Hei tei amuh tei rui Sabbath tangv nthuanh thauna kat puni.

¹²Nangniw rui nap katpui nungc tei hiaksuimei tingkwm akhatmei lauziuchiclauna ni rawna kat ro.

¹³Hei tei lev kazauhna Olive thauc loumei ntyan buay handwang kanei taektw puatkat swna kat ro. Mi rym tei rui RINGHPOUC ta tipian e. Drakhadui ni handwang akhat kat kazauh nina e.

¹⁴Mi tuang puatkat hei RINGHPOUC khang kat mak saanv napthanc tei nzina pwni, saana pwni, ntyan swna pwni tu nuh mak ge. Mi hei thei thangc nangniw tou nac nunc zuk khou nganvna tat bam nina e.

¹⁵RINGHPOUC khang kat khang napchu phungc guangmei Sabbath neic khou tei rui thauna kanit dak chanei pac tho.

¹⁶Zaeng 50 nungc, twmei thu chaneimei Sabbath neic tangv nthuanh thauna napthanc RINGHPOUC khang kat dat nina he.

¹⁷Kaikhunh kathuic rui ntyan dwm kanei kanei phungc guangna nkunmei puatkat swna RINGHPOUC khang kat nina e. Ntyan dwm akhat tei ntyan buay kilogram kanei khou khay louna kasiamh nina e, kumna hei tei napthanc ntyan swna RINGHPOUC khang katlou nina e.

¹⁸Mi ntyan tei lev twna hiaksuimei tingkwm akhat mei lauziunac chanei, guaituamchic akhat khatni ziuh kanei Isaraelmei kapwm rui kat nina e. Hei tei ntyan katmei khatni drakhadui katmei tei lev kazauhna rawna RINGHPOUC khang kat nina e. Mi rym tei rui RINGHPOUC ta tipianlou e.

¹⁹Hei tei lev paapc khang ziuchic akhat khatni alamvpuatkat khang tingkwm akhatmei lauziuchic launa kanei twna ni kat nina e.

²⁰Amuh tei rui ntyan dwm tei lauziunac kanei tei lev nkunmei kaipat swna amuh nunc khang RINGHPOUC khang kat nina e. Mi puatkat guay hei nthanmei e.

²¹Mi nungc tei meic gaanv khat na sini taanvtaanc nuh mak ge, tiki kalum khang guang kariu nina e. Nangkik nangta guay tei tabui bui bamv khou bam pwsini thei thangc nganvna mi hei ngaek bam nina e.

²²Nangniw lautay pwkhou lautaengh tay tangh riu khatni tay nsaekcloumei tei laa dat riu, hei tei lungcsimei khatni gin nunc khang ganclou ti tho. RINGHPOUC hei nangniw tuang Racguangc e.

²³RINGHPOUC rui Mousi khou sa the,

²⁴Isaraelmei guay khou kumna sa o: Chaneimei bw tuang reymei tingmik nungc zaengthaek tingmik swna taanv khat sini taanh makna bam nina e, kumna bianggun amuan pwkhou kalum khang guang kariu nina e.

²⁵Mi nungc tei RINGHPOUC khang taektw puatkat kat ro, kumna taanv akhat na sini taanc nuh mak ge.

²⁶RINGHPOUC rui Mousi khou sa the,

²⁷Chaneimei bw tuang zaeng ruhmei tingmik hei meic nunc tuang paapc kuaklou khang tingkwm thouc sw nimei tingmik ge. Mi tingmik nungc hei ramh tu ramh zangv lak nina e. Kumna kalum khang guang kariu nina e khatni RINGHPOUC khang taektw kat nina e.

²⁸Mi nungc hei taanvtaanc nuh mak ge kalam thu mi nungc hei paapc kuaklou khang thouh swmei tingmik ge.

²⁹Mi nungc hei munthiangh makpui mei ta Ravguangc mei khang chaklou dat lak khe.

³⁰Mi nungc hei tingmik saanvsaengh taanvtaanhpui mei ta thu RINGHPOUC kamei kahak rui swluai puni.

³¹Mi riak hei nangniw kikta tabui bui bamv khou bammei khou pwni tat puni.

³²Mi bw tuang zaeng chakiumei nungc neih key rap khou rui thauna zaeng ruh mei nungc neih keymei nganvna zaeng nthaekcmei tingmik swna ngaek nina e, mi lungc khou tei ramhkhat na sini taanc nuh mak ge.

³³RINGHPOUC rui Mousi khou sa the,

³⁴Isaraelmei guay khou kumna sa o: Chaengkai ngai hei chaneimei bw tuang zaeng 15mei nungc rui ngay guangna zaeng chanei ngay nina e.

³⁵Reymei tingmik nungc tei kalum khang guang kariu nina e kumna taanv akhat na sini taanc nuh mak ge.

³⁶Mi zaeng chanei tei tingmik pum taektw kat bam nina e. Zaeng tachatmei nungc tei kalum khang guang kaduai datna taektw kat nina e. Hei tei kalummei tingmik ge kumna mi nungc tei nangniw taanvtaanc lak nina e.

³⁷(Mi hei nangniw rui kalum khang guang kaduaina tingmik tingmik khou taanc nimei, taektw katmei, rawna katmei, ntyan katmei, ravkhaengmei, khatni drakhadui katmei thouc swna RINGHPOUC ta kalum nimei ngai guay e.

³⁸Mi ngai guay hei sw tanh tan bammei Sabbath guay khou tei haaploumei tuang e, khatni mi puatkat guay hei nangniw tuang latdyng tiguang nthuihloumei, kat niina katmei, nangniw rui RINGHPOUC khang kat tanh tan bammei khou tei haaploumei tuang e.)

³⁹Nangniw lautay luai pwkhou mi ngai hei zaeng chanei ngay o. Mi hei chaneimei bw tuang zaeng 15mei nungc rui ngay thau nina e. Reymei tingmik tei zaeng nthaekcmei tingmik sw nina e. Khatni zaeng tachatmei nungc tei ni nthaekcmei tingmik sw nina e.

⁴⁰Mi nungc tei nangniw tuang thingbang khou rui kathai gay liang liangmei rei lana, tadanvchy khatni kanuang geihmei thingchy laa lana RINGHPOUC nangniw tuang Ravguangc ta chakhwang swmei tuang ngai tei kahouh tho.

⁴¹Hei tei zaeng chanei ngay nina e. Mi hei nangniw tounac guay thei thangc nganvna tat bam nina e.

⁴²Isaraelmei guayna zypui kai khou zaeng chanei bam nina e.

⁴³Mi hei RINGHPOUC rui Isaraelmei ta Izip khou rui nduangh pat khou tei kaniw ta zypui kai khou tilungclou khwan e twmei nangniw tounac nunc thay diu khang e. Kamei hei RINGHPOUC nangniw tuang Racguangc e.

⁴⁴RINGHPOUC tuang khumngai guay heikumna ngay nina e twna Mousi rui Isaraelmei guay khou kauc ndauhlou the.