Read Rongmei Naga LEVITHOUC 24 Bible Online

LEVITHOUC 24 - Rongmei Naga bible

LEVITHOUC 24

¹RINGHPOUC rui Mousi khou sa the,

²Thauhmai guay tei chuangc tanh tanna bam khang Olive thauc nthanmei phungc guang khang Isaraelmei guay khou latdanv tii khang sa the.

³Nthan Liangmei bamv khou naimei Latdyng Khuk hu khou, khamthinghphey pang khou tei RINGHPOUC hu khou tingzyn kathuic Aron rui mi guay tei ntoulou lana tinggaanh mak saanv chuangc thangc bam khang e. Mi hei thei thangc nganvna tat bam nina e.

⁴Kachaekc nthanmei rui kasiamhmei thauhmai hyang khou loubammei thaucmai guay tei Aron rui zauc nina e, kumna mi guay tei RINGHPOUC hu khou chuangc bam tanh tan khang sw nina e.

⁵Ntyan buay kaduk 12 laa lana ntyan dwm 12 kasiamh o.

⁶RINGHPOUC hu khou naimei kachaekc nthanmei rui lupmei ntyanpaeng khou tei mi ntyan tei charuk charuk louna karyan kanei khang tamclou o.

⁷Mi ntyan phaan tei RINGHPOUC khang taektw katmei swna ntyan phaan karyan kanei khou tei agaw nthanmei lou o.

⁸Thei thangc nganvna, Sabbathneic kathuih mi ntyan tei RINGHPOUC hu khou lou nina e. Mi hei Isaraelmei rui tingsaengzaeng taanc bam nimei taanv e.

⁹Mi ntyan tei Aron khatni kakikta guay khang e, kaniw hei tei nthanmei bamv khou tei tu nina e. Kalam thu mi hei amuh nunc khang RINGHPOUC khou katloumei nthan dianghmei taektw e.

¹⁰Kapu rui Izipmei kapui rui Isaraelmei twmeipu gaanv khat nai khwan e. Mipu tei rui zypui kailuangc khou Isaraelmei gaanv khat lev agay khwan e.

¹¹Isaraelmeipui nac tei rui Ravguangc ta sa kasic the kumtina kaniw rui Mousi daeng khou phungc guang the. Kapui tei Dan kaikhwangmei Dibri nac aluh Shelomit twna kaw khwan e.

¹²Mipu ta tei tabui sw nina cho twmei RINGHPOUC rui dinclou mak saanv bangclou the.

¹³Khoutei RINGHPOUC rui Mousi khou sa the,

¹⁴“Mipu ta tei zypui kailuangc paengc thangc zay pat tho. Kamei rui sa kanmei tei chumei kathuic rui kapy khou kaniw baanc mbaenglou lana meic guayna rui kata tei ntauh nkwam luai nina e.

¹⁵Ravguangc ta sa kasicmei kathuicna ta tei heikumna swluai puni twmei Isaraelmei guay khou sa o.

¹⁶Isaraelmei khatni Isaraelmei pang khou khuam bammei thowkumhmei rui Ravguangc ta sa kasic e thei meic guayna rui kumhpui mei ta tei ntauh nkwam luai nina e.

¹⁷“Meicdowpui mei ta tei swluai nina e.

¹⁸Meickai tuang khouringc sw luaipui mei tei kakaipouc khang khangc dat nina e. Kalam thu meic gaanv khat ta swluaipui mei ta tei swluai dat nina e.

¹⁹“Meic gaanv khat rui thowkumhmei ta kabiulou e thei, kamei rui swlou loumei tei karuc khou swlou dat puni.

²⁰Kamei rui meickai rou swbau e thei karou tei ni swbau dat puni; kamei rui meickai mik akhat sw tiat re thei kamik ni swtiat dat puni; kamei rui meickai huc swbau e thei kahuh ni swbau dat puni. Kamei rui meickai khou swkabiu loumei tei kakhou ni sw kabiulou dat puni.

²¹Khouringh swluaipui mei tei khangc dat nina e, tiki maansei swluaipui mei ta tei thu swluai puni.

²²Mi riak hei Isaraelmei khou ni Isaraelmei pang khou lungc bammei zaatc baih baihmei khou ni tat nina e, kalam thu ai hei RINGHPOUC nangniw tuang Racguangc e.”

²³Mi hei Mousi rui Isaraelmei khou salou pwkhou, kaniw rui mipu ta tei zypui kailuangc paengc thangc zaypatna ntauh nkwam luai the. Heikumna RINGHPOUC rui Mousi khou tii guangmei latdanv tei Isaraelmei rui taanc the.