Read Rongmei Naga LEVITHOUC 25 Bible Online

LEVITHOUC 25 - Rongmei Naga bible

LEVITHOUC 25

¹RINGHPOUC rui Mousi ta Sinai chyng khou sa the,

²Isaraelmei guay khou kumna sa o: RINGHPOUC rui tii nimei kandic khou kiu nangniw gut pwkhou tingkwm chanei pum nangniw lau taanh makna kandih ta tii nthaekcna RINGHPOUC ta chakhwang sw nina e.

³Tingkwm charuk tei nangniw tuang laupuk, khatni drakhalau tei taancna kathai laa tu o.

⁴Kum e tiki chaneimei tingkwm tei thu kandih ta tei ti-nthaekclou nina e, hei tei RINGHPOUC khang katloumei tingkwm e. Nangniw tuang laupuk khou phunling loukey nuh mak ge, drakhalau ni rap nuh mak ge,

⁵Lingclou makmei ramv napthai tei ni tay nuh mak ge, khatni raplou makmei drakhaluai khou rui nthaimei thai tei ni rei nuh mak ge; mi kwm hei kandih khang nthaekcmei kwm e,

⁶Nthaekcmei tingkwm khou tei kailau taanh mak sini nthaimei phunling tei nangniw tuang bangc nunc taanv phihmei nunc nangniw lev khuam bammei nunc rui tu nuh e.

⁷Nangniw tuang khouringh khounah khatni nwmbangc khouringc guay khang nganvna nang laupuk khou nthai bammei tei rui kaniw taek sw puni.

⁸Tingkwm chanei tei chakliang chanei o, kumna hei tei tingkwm 49 puni the.

⁹Mi kwm tuang chaneimei bw tuang zaeng ruh mei nungc, paapc Kuakloumei Tingmik nungc mi kandic kapwm khou tei lauziu chei amuan khang meic gaanv khat thouc o.

¹⁰Heikumna 50mei tingkwm tei reicpatlouna mi kandic khou lungc bammei meic katana khou nyngswmei kauc pat ro. Mi hei nangniw khang Jubili the. Zuancloumei ramvdui guay tei mi tingkwm lungc khou hei kakaipouc khou hamh e thei kakai kaikhuncmei khou hanclou dat nina e, khatni bangh swna zuancloumei guay tei kakai kakai khou guang dat nina e.

¹¹50 tanghmei tingkwm tei nangniw khang Jubili the. Nangniw nap-bi lingc key nuh mak ge, raplou makmei drakhathai ni rei tu nuh mak ge.

¹²Mi tingkwm tei Jubili nangniw khang nthanmei tingkwm e; ramvpuk khou rui patmei na tei nangniw tu nina e.

¹³Zuancloumei ramvdui guay tei mi Jubili kwm hei thu kakaipouc khang hanclou dat nina e.

¹⁴Kumhpui zaeng rui nangniw Isaraelmei nchamc khou ramvdui zuanhmei khatni liumei hei khat khat khou guatna sw nuh mak ge.

¹⁵Nang rui kainingmei khou rui ramvdui liu e thei Jubili khou rui tingkwm sing chuath na tei tii nina e, zuanhmeipu tei rui phunling thai nimei tingkwm chuath na tei kamanv ney nina e.

¹⁶Tingkwm geic e thei kamanv geic khang e, tingkwm rui rau e thei kamanv ni rau khang e. Kalam thu nangniw rui zuanc nimei hei phunling tuang kasing theilaypui zaeng rui e.

¹⁷Nangniw Isaraelmei nchamc khat khat ta guat riu, RINGHPOUC nangniw Racguangc ta ping o.

¹⁸Mi kandic khou hei giuga makna lungc bam khang nangniw RINGHPOUC tuang latdanv guay tei piu o.

¹⁹Kum pwkhou, mi kandic khou rui nap-bi pat geic puni kumna nangniw tu niimei kamv tuna lungc puni kumna giuga makna lungc puni.

²⁰Kailau taanh makna, nap-bi lingh makna mi chaneimei kwm hei tabui tu nina cho twna meic gaanvsaekc rui thanv nuh e.

²¹Charukmei kwm tei RINGHPOUC rui suaihiamlouna nap-bi thuih puni kumna tingkwm kathumh bung khang taanc guang puni.

²²Tachatmei kwm tei ni nangniw rui lingckeyna nap-bi laaguang puni kum sini charukmei kwm tuang napguangc tei rui biucna chakiumei kwm nganv nai bam puni.

²³Nangniw tuang ramvdui tei tingsaengzaeng khang zuanclou nuh mak ge, kalam thu hei tei nangniw tuang hamh e; hei tei Ravguangc tuang de, nangniw hei lau ngena lungc bammei gin nunc kumh tuang de.

²⁴Ramvdui tei zuanc thau pwkhou, kakaipouc rui thuak dat nuhmei ngamv naimei tei thaylou o.

²⁵Isaraelmei gaanv khat rui lungcsi keyna katuang ramv zuanh mak nuh mak guangna zuanclou pwkhou, hei tei kariang kaluaic anamei gaanv khat rui thuak dat nina e.

²⁶Hei tei thuak dat khang kariang kaluaic maekna ganclou sini, mipu tei lungc thau datna mi ramv tei thuak dat ngam e thei,

²⁷Jubili tingkwm guang makmei dak khou taanc pat nuhmei chakh tei chak lana ramv liumeipu khang tei hanclou dat nina e.

²⁸Kum e tiki hei tei thuak dat ngam mak ge thei thu Jubili guang tangh mak saanv mipu tuang tei sw bam kan nina the.

²⁹Thowkumhmei rui raengh raengloumei kaidai akhat khou kai zuanclou e thei, zuancloumei tingmik khou tei rui pac thauna tingkwm akhat lungc khou mi kai tei thuak dat nuh e.

³⁰Mi tingkwm lungc khou tei thuak dat ngam mak ge thei, kamei hei tei thuak dat nuhmei ngamv maek khe, hei tei liumeipu khatni katou kanac nunc khang di the; hei tei Jubili kwm ni hanc lou dat khang hamh the.

³¹Kum e tiki raengh raeng makmei namv tuang kai ta thu ramvdui ta kumcna sw nina de, kakaipouc tei rui hei tei thuak dat nii nii khou thuak dat nuh de, khatni hei tei Jubili kwm hanclou dat nina e.

³²Tiki Levimei nunc thu kaniw khang tiiloumei kaidai guay khou tuang zuancloumei nai e thei kaniw rui thuak dat nii nii khou thuak dat nuh de.

³³Levimei rui kaniw tuang kaidai khou naimei kai akhat zuanclouna hei tei thuak dat mak ge thei, hei tei Jubili kwm hanclou dat nina e, kalam thu Levimei akhat rui kaniw tuang kaidai khou naimei kai tei tingsaengzaeng katuang de.

³⁴Levimei nunc tuang kaidai guay daeng khou naimei khouringh byn ramv guay tei zuanc nuh mak ge; hei tei kaniw tuang tingsaeng ramv de.

³⁵Nangniw daeng khou lungc bammei Isaraelmei gaanv khat rui lungcsi keyna lungc ngam makna bam e thei nangniw tuang niakloumei meic akhat ta zaucloumei kumcna nangniw daeng khou lungc bam nuh khang swlou nina e.

³⁶Kakhou tei rui kathuay laa nuh mak ge, nang Racguangc ta ping o kumna kata nangniw daeng khou tilungc bam nina e.

³⁷Syandui thuay ni nap-bi thuay ni kakhou rui laa nuh mak ge.

³⁸Mi hei nangniw khang Kanaan kandic tiilou khang khatni kamei rui nangniw tuang Racguangc sw bam khang nangniw ta Izip khou rui kaw patmeipu RINGHPOUC nangniw Racguangc tuang latdanv e.

³⁹Nangniw lungc nchamc bammei Isaraelmei gaanv khat tei lungcsi keyna karana kata nangniw khou bangh swna zuanclou e thei, nangniw rui kata tei bangh akhat taanv titaanc nuh mak ge.

⁴⁰Kamei rui nang daeng khou phihmei akhat kumcna bam nina e, kumna Jubili guang dat tangh mak saanv nang tuang siamruai sw bam kandiu.

⁴¹Jubili khou tei kamei tei kanac nunc ta nduanghna kakai thangc kapu-kapouc tuang kaiphwn lauphung khou hanc dat kandiu.

⁴²Isaraelmei hei RINGHPOUC tuang bangc nunc e, khatni Izip khou rui thuakpatlou datmei nunc e. Kumhpui zaeng rui kaniw ta bangh swna zuanc dat nuh mak khe.

⁴³Kaniw ta tei sin binna sina sw nuh mak ge, nangniw Ravguangc ta ping nina e.

⁴⁴Nangniw bangh kage nai e thei nangniw daeng khou bammei zaatc baih baihmei khou rui liu nina e.

⁴⁵Nangniw khou khuam bammei zaatc baih baihmei nac nunc ti hei ni liu nuh e. Kumna nangniw kandic khou puancloumei nac nunc hei nangniw tuang sw nuh e.

⁴⁶Kaniw ta tei nangniw nac nunc tuang siamruai kaniw ringh saanv sw bam khang ganclou nuh e. Kum e tiki nangniw Isaraelmei nchamc thu sin binna sw nuh mak ge.

⁴⁷Nangniw khou khuam bammei zaatc baihmei gaanv khat rui lungcgay thauna Isaraelmei gaanv khat rui lungcsi keyna kata mipu khang tei hamh e thei mipu kai kaikhuncmei akhat khang zuanclou the.

⁴⁸Mipu ta tei zuanclou tang bam sini thuak dat nuh de. Kachana akhat rui,

⁴⁹kapu chana akhat rui hamh e thei kariang kaluaicmei gaanv khat rui thuakpat dat nuh de. Hamh e thei kamei lungcgay dat re thei ni karana kata thuak dat nuh de.

⁵⁰Kata liumeipu tei lev kakhanh kariu nina e, kumna kata zuanclou khou tei rui thauna Jubili nganvmei lungc khou taanv phihmei gaanv khat tuang phy khou rui chak nina e.

⁵¹Kaniw rui tingkwm kasing geicna bamlou e thei liumeipu rui tiiloumei manv chuath theilayna tiina thuak dat nina e,

⁵²akhatni Jubili khang tingkwm ana dutna bam e thei kaniw rui taancloumei chuath theilayna tii nina e.

⁵³Tingkwm phy swna phihmei gaanv khat ta kumcna laa nina e, khatni zaatc baihmeipu ngamv bangc khou tei bam nina e. Kakaipouc rui kata tei sina sw nuh mak ge.

⁵⁴Mi ganv lungc khou thuak ngam mak ge thei kamei khatni kanac nunc tei Jubili khou rui tiduak nina the.

⁵⁵Isaraelmei hei RINGHPOUC tuang bangc nunc e. Kamei rui kaniw ta Izip khou rui thuakpatlou the. Ai hei kaniw tuang RINGHPOUC Ravguangc e.