Read Rongmei Naga LEVITHOUC 26 Bible Online

LEVITHOUC 26 - Rongmei Naga bible

LEVITHOUC 26

¹RINGHPOUC rui sa the, “Nangniw rui ravmaengc kasiamhna, ramhmaengc lingcthauna, hamh e thei swangtauc lingcthauna kalum nuh mak ge. Ai hei RINGHPOUC nangniw tuang Racguangc e.

²Azaengthaek guay tei ngaek nina e ata kalummei bamv tei chakhwang sw o. Ai hei RINGHPOUC e.

³“Nangniw rui atuang latdanv theilayna lungcna atuang latdanv guay piuna bam e thei,

⁴kandih rui nap-bi tipat geih khang thingbang guay rui kathai nthai khang ai rui tingdui kaganv chana tii guang puni.

⁵Nangniw tuang nap-bi heidikamv geicna drakha thai reimei ganv tanghmei nganvna lautay luai ngam key mak puni the khatni phunling lou keymei ganv khou nganvna drakha thai rei kim dat zat lak khe. Nangniw rui tu niimei guay tu khang nai puni the. Kumna nangniw kandic khou hei nangniw giuga makna lungc puni the.

⁶“Ai rui nangniw kandic khou nchu-nzaenghmei tiilou puni kumna nangniw ramh ping tuang maekna zip bam puni. Mi kandic khou rui khoumang laa ganclou puni, kumna suc-rih ni nai dat lak khe.

⁷Nangniw hei zauczihmei nunc ta ngamna lungc puni.

⁸Nangniw meic gaanv panguh rui meic 100 ta khatni meic 100 rui meic 10,000 ta ngam puni.

⁹Ai rui suaihiamlouna nangniw kikta tikingckiuclou puni; kumna ai rui nangniw khang swlou kanmei latdyng tei taanclou puni.

¹⁰Nangniw tuang napguangc tu patna napthanc loulyn dat khang napguangc taan ganc puni the.

¹¹Ai rui atuang kalummei pheykai khou rui nangniw pang khou bamlou puni, kumna ai nangniw khou rui tat patlou dat lak khe.

¹²Ai rui nangniw ta nduanghlou puni; ai rui nangniw tuang Racguangc sw puni; kumna nangniw amei nunc sw puni.

¹³Nangniw hei bangh sw dat mak khang rui RINGHPOUC nangniw tuang Racguangc ai rui nangniw ta Izip khou rui phungc patloumei tuang the. Nangniw tuang guangkhap tei ai rui swbau ganc the kumna nangniw ta nangniw zaw puanc kauhna titatlou the.”

¹⁴Kum e tiki nangniw rui alat piu makna khatni latdanv guay tei piuna taanc pat mak ge thei

¹⁵alatdanv guay ta nuh muna gancpatna alatdanv guay ta piuna taanh mak ge thei khatni hei tei rui ai lev swloumei alatryan sw bak ge thei

¹⁶mi hei kumcna ai rui nangniw khou taanlou puni. Ai rui nangniw khou ryanramei tiguang puni gaydat ngam lakmei ravpuat, ravmanhmei ravpuat hei tei miknac sw kasicmei ravpuat tiguang puni. Nangniw nap-bi lingckeymei tei nsa khang de kalam thu zauczihmei rui tu ngam kan ni de.

¹⁷Ai rui nangniw ta zauczih puni the, kumna nangniw ta zauczihmei nunc rui nangniw ta sin puni the; nangniw hei ping langvna meic rui nthau mak khou rui sini pak puni the.

¹⁸“Mi guay hei tiguang bam tisini nangniw alat piu mak ge thei, ai rui nangniw tuang dandi tei kadam chanei tii mbu ku puni.

¹⁹Nangniw lung tancna liam syam siam bammei tei riambau key puni; tingriu dat lak khe, nangniw tuang tingpuk tei ntanh kumc tanc puni the khatni kandih tei tanzinc kumc puni the.

²⁰Nangniw rui taanc ranvna taanhmei tei nsa khang di the, kalam thu nangniw tuang kandic khou nap-bi nthai dat lak khe, thingbang guay ni kathai nthai dat lak khe.

²¹“Nangniw ata liamna alat piu makna bam e thei, nangniw tuang dandi tei kadam chanei ti-mbulou dat puni he.

²²Ai rui nangniw kandic khou khoumang thouc guang puni, hei tei rui nangniw nac nunc, nangniw tuang kiruai guay ta swluai puni, kumna nangniw meic katit na ta ganclouna nangniw tuang chaeng guay sini meic tatmei maekna ganclou puni.

²³“Kum bam tisini nangniw alat chu makna alat liam bam e thei,

²⁴ai rui nangniw ruc khou taanv sw puni, kumna dandi kadam chanei mbu puni khatni kahu nungc suangc ranv puni.

²⁵Nangniw alatryan sw bakmei zaeng rui nangniw ta dandi tii khang rih phungc guanglou puni, kumna nangniw tuang kaidai guay khou pak guang kaduai pw e thei, hei khou tei gay dat lakmei ravpyan tiguang puni, kumna nangniw ta zauczihmei baanc khou tigutlou puni.

²⁶Nangniw tuang taektw guangmei chaeng tei thingc puni, kum pwkhou meic pui gaanv ruh rui kaniw khou naimei ntyan buay guay tei maimangh akhat na khou ntyan raw puni. Kaniw kadath karyan swna nzanh tu puni, kumna hei tei tu ngam sini nggu lak ge.

²⁷“Mi tangv tei nganvna nangniw ata thouh sw makna alat piu mu pw e thei,

²⁸alungpuam khou nangniw tuang dandi tei kahu nungc suangc kadam chanei mbulou puni.

²⁹Nangniw ndaapc langvna nangniw nac nunc ta sini tu puni.

³⁰Chyngbut chyngbut ruc khou swlou bammei ravbamv guay tei ai rui swmaan puni, agaw nteimei tuang ravchabamv guay tei swra key puni, bow keylou bammei ravmaengc guay khou tei nangniw tuang theihmei pumc nunc tei ganclou puni. Karaengmei lev kazauhna

³¹ai rui nangniw tuang kaidai guay tei sw kamut kamailou puni, nangniw tuang ravbamv guay tei sw kasiclou puni, kumna nangniw tuang khaengmei puatkat tei laa dat lak khe.

³²Nangniw tuang kandic ramsu kasi tei how pwkhou nangniw kandic khou guang lunghmei zauczihmei guay sini hahlala puni.

³³Ai rui nangniw ruc khou rih tikeyna nangniw ta zaatc baihmei kandic guay thangc zinphaklou puni. Nangniw tuang kandic meic lungc taeklou puni khatni nangniw tuang kaidai guay sw kasic karoucna ganclou puni.

³⁴Nangniw rui tilungc taekloumei kandic tei ntaw thu zaeng thaekmei tingkwm nai puni the nangniw rui zauczihmei ramc thangc bam kanmei saanv tei nthaekcna bam puni the.

³⁵Nangniw rui mi kandic tei ganclou bam saanv nthaekcmei naina bam puni the. Sabbath neic tuang zaengthaek nangniw rui nthaekc kanmei tei hamhmei zaengthaek nai puni.

³⁶“Ai rui ginramdic thangc meic bangc bam tatmei nunc lungc khou tei pingmei tipadiklou puni, kumna kaniw tei mpwan rui thingnuy aliu kalungmei na ta sini kaluangna pak puni. Rih rui nthau kumc nangniw pak puni the, khatni nangniw ta meic nthaumak sini kaniw bow puni the.

³⁷Meic nthaumei maek sini nangniw khat khat ta pak kalanvna bow puni the, kumna nangniw zauczihmei ta adow dat ngam lak khe.

³⁸Nangniw ginramdic thangc theiclou puni the, kumna nangniw ta zauczihmei kandic thangc nangniw amaanlou puni the.

³⁹Zauczihmei kandic khou ringc bam duhmei meic katit na tei sini nangniw tuang paap khatni nangniw tuang pupouc nunc tuang paap zaeng rui nsuan key puni the.

⁴⁰“Kum e tiki nangniw tounac nunc rui kaniw tuang paap guay khatni alat liamna ata athwngmei kaniw pupouc nunc tuang paap guay kalauh e thei,

⁴¹kaniw ruc khou ai rui azaw puanc ntheilouna zauczihmei kandic thangc meic bangc tibam tatmei paap guay tei kaniw rui kalauh e thei, thei thangc nangniw tounac nunc rui niamhkeyna kaniw tuang paap khatni meicliammei tuang dandi tei phungclou tang pwkhou,

⁴²ai rui Jakob, Isak khatni Abraham khou swlou kanmei latdyng guay tei ai ningtow dat puni, kumna kaniw khang mi kandic hei tiilou nimei tuang latdyng tei ningtowlou dat puni.

⁴³Tiki, reymei khou mi kandic khou rui meic nunc ta tei laa ganc puni, kumna mi kandic ta ti-nthaekclou puni, kumna kaniw rui atuang latdanv khatni latdyn laalou makmei tuang dandi phungc puni.

⁴⁴Kum bam sini, kaniw rui zauczihmei kandic khou bam khou tei nganvna kaniw ta mpat dwang dwanglou lak ge khatni swmut sutlou lak ge. Kalam thu ai rui atuang latdyng tei kak lak ge. Ai hei RINGHPOUC ai hei kaniw tuang Racguangc e.

⁴⁵RINGHPOUC ai hei kaniw tuang Racguangc sw diu khang Izip khou rui amei nunc ta phungc patna kandih zaatc guay khou angamv lyanloumei ganv khou kaniw pupouc nunc lev swlou kanmei latdyng tei ai rui ningtowlou dat puni.”

⁴⁶Mi guay hei Isaraelmei khang RINGHPOUC rui Mousi khou Sinai Chyng khou rui tiiloumei latdanv khatni latdyn guay e.