Read Rongmei Naga LEVITHOUC 3 Bible Online

LEVITHOUC 3 - Rongmei Naga bible

LEVITHOUC 3

¹Thowkumhmei rui alamvpuatkat swna guaih kat nii e thei, hiaksuimei guaituamchic hamh e thei guaituamnay kat nina e.

²Mipu tei rui guaih py khou tei kabaanc mbaenglouna hei tei RINGHPOUC tuang pheykai kaimun khou tei dowluai nina e. Aron kiktamei amuh nunc tei rui zei tei ravchapaeng naek padeih khou tei kazinhlou nina e.

³Alamvpuatkat swna khaengmei ganv khou kalungcna guay ta duammei karav guay khatni

⁴kaki kanei khatni mi khou tei naimei karav guay khatni kathyn khou gay liangmei langv tei RINGHPOUC khang rawna katlou nina e.

⁵Rawna khaengmei puat pang khou tei mi guay hei ni amuh nunc tei rui raw kazauh nina e. Kumna rawna khaengmei rym rui RINGHPOUC ta tipian e.

⁶Lauziu hamh e thei ziuh rui alamvpuatkat khang khaeng e thei, hei tei hiaksuimei kakui pwni kachic pwni nuh e.

⁷Thowkumhmei rui lauziu khaeng pwkhou,

⁸kamei rui kabaanc lauziu py khou tei mbaenglouna kalummei pheykai kaimav khou tei dowluai nina e. Amuh nunc tei rui zei tei ravchapaeng naek padeih khou tei kazinhlou nina e,

⁹kumna kabangc khou naimei saram guay twmei thu kathav, thahmei kalingkuakrou daeng khou kamai zuansaeng, kalungcna khou naimei karav guay,

¹⁰kaki kanei khatni mi khou tei naimei thav guay khatni kathyn khou gay liangmei langv tei rawna RINGHPOUC khang katlou nina e.

¹¹Thouh swmei amuh tei rui mi guay tei ravchapaeng khou rawna khaeng nina e.

¹²Thowkumhmei rui ziuh khaeng e thei,

¹³kamei rui kabaanc ziuh py khou tei mbaenglouna hei tei kalummei pheykai kaimav khou tei dowluai nina e. Aron nac nunc tei rui kazei tei ravchapaeng naek padeih khou tei kazinhlou nina e,

¹⁴kumna kabangc khou naimei guay hei taektw puatkat swna RINGHPOUC khang katlou nina e, kalungcna guay tei,

¹⁵kaki nei khatni mi khou naimei thav guay khatni kathyn khou gay liangmei langv guay tei rawna RINGHPOUC khang kat nina e.

¹⁶Amuh tei rui mi guay tei ravchapaeng khou tei rawna kat nina e, hei tei rui RINGHPOUC ta tipian e. Kathav guay tei RINGHPOUC tuang saram e.

¹⁷Isaraelmei gaanv khat na sini kathav lev zei tu nuh mak ge; mi hei tabui bui bamv khou pwni bammei Isaraelmei kaguay ngaek nimei riak ge.