Read Rongmei Naga LEVITHOUC 4 Bible Online

LEVITHOUC 4 - Rongmei Naga bible

LEVITHOUC 4

¹RINGHPOUC rui Mousi khou sa the,

²Isaraelmei khou heikumna sa o thowkumhmei rui maanvna khatni RINGHPOUC tuang latdanv taanc lak nimei tei taanc e thei

³Amuh rui paapc taancna kumna mi nwan tei meic nunc ruc khou phungc guangmei tuang nai e thei, kamei rui hiaksuimei guaituamchic launa phungc guangna kapaap khang rui RINGHPOUC khang khaeng nina e.

⁴Amuh rui guaichic tei kalummei pheykai chaengmun khou tei zay guangna, guaih py khou tei kabaanc mbaenglouna RINGHPOUC hu khou mi bamv khou tei dowluai nina e.

⁵Amuh kamei rui zei tei laana kalummei pheykai lungc khou tei phungc gut nina e.

⁶Zei khou tei kabaanczung ntin lana nthanmei khamthinghphey hu khou tei kazinh liang chaneilou nina e.

⁷Kalummei pheykai lungc khou naimei agaw ravchapaeng tuang chei guay khou tei zei tei teylou nina e. Nsaekcmei zei guay tei kalummei pheykai chaengmun daeng khou naimei ravkhaeng puat rawmei ravchapaeng phaybi khou tei bunlou nina e.

⁸Mi guaic tuang thav guay, karav guay,

⁹kaki nei khatni mi khou tei naimei thav guay, khatni kathyn khou gay liangmei langv guay tei laa pat nina e.

¹⁰Kumna alamvpuatkat khou katmei tei kumna kamei rui mi guay tei ravchapaeng khou tei rawna kat nina e.

¹¹Kamei rui kagic, katei guay, kapy, katan, kalungcna guay tei laana

¹²mbut bowloumei bamv Nthanmei bamv khou tei mi guay tei phungc pat lana thing tuang mai khou raw nina e.

¹³Isaraelmei zaat kapwm rui maanvna RINGHPOUC tuang latdanv piu makna paapc taancloumei tuang nai khwan e thei,

¹⁴mi paap tei thay patpui lev katumcna meic guayna rui paapc khang khaeng khang guaituamchic launa akhat phungc guang nina e. Kaniw rui hei tei RINGHPOUC tuang pheykai khou tei phungc guang nina e;

¹⁵kaniw tuang gaanvthaih nunc tei rui kaniw baanc mi guaichic py khou tei mbaenglouna hei bamv khou tei dowluai nina e.

¹⁶Amuh tei rui zei asaekc tei laana kalummei pheykai lungc khou tei gut nina e.

¹⁷Zei khou tei kabaanczung ntinna khamthinghphey hu khou tei kazinhlou liang chaneilou nina e.

¹⁸Kalummei pheykai lungc khou naimei agaw ravchapaeng tuang chei guay khou tei zei asaekc tei teylou nina e, kumna nsaekcloumei tei rui kalummei pheykai kaimun khou naimei rawna khaengmei ravchapaeng kabamv khou tei bunlou nina e.

¹⁹Hei tangv tei kamei rui kathav guay tei laana ravchapaeng khou tei raw nina e.

²⁰Kamei rui paapc khang khaengmei guay khou swmei thak kahak tei meic nunc tuang paapc khang rui khaengmei ganv khou ni sw nina e, kum pwkhou kaniw paap tei kuaklou puni.

²¹Mi tangv tei kamei rui mi guay tei kapaengc thangc laa patna kapaap khang khaeng khou swmei thak tei kumcna raw nina e. Mi hei kandihmei paap laa ganclou khang khaeng nimei tuang kiu the.

²²Thowkumhmei kandih kaipouc akhat rui maanvna Ravguangc latdanv swbakna paapc taanclou e thei,

²³kamei rui taancloumei paap tei tithay patpui lev kapaap khang khaeng khang katumcna hiaksuimei ziuchic akhat phungc guang nina e.

²⁴Kamei rui kabaanc ziuchic py khou tei mbaenglouna ravchapaeng tuang dihpy biak khou naimei rawna khaeng nimei khouringh dowluaimei bamv khou tei dowluai nina e.

²⁵Amuh tei rui zei khou tei kabaanzung ntin lana ravchapaeng chei khou tei teylou nina e kumna nsaekcloumei guay tei ravchapaeng phaybi khou tei bunlou nina e.

²⁶Alamvpuatkat khou khouringh thav rawmei tei kumcna kamei rui mi thav guay tei ravchapaeng khou raw nina e. Heikumna amuh rui kandih kaipouc tuang paap khang tei khaeng pwkhou kapaap tei kuaklou puni.

²⁷Thowkumhmei gaanv khat rui maanvna Ravguangc tuang latdanv swbakna paapc taanclou e thei,

²⁸kapaap tei tithayloupui lev khaeng khang hiaksuimei ziuhnay phungc guang nina e.

²⁹Kamei rui kabaanc ziuh py khou tei mbaenglouna ravchapaeng tuang dihpy biak thangc naimei rawna khaeng nimei khouringh dowluaimei bamv khou tei dowluai nina e.

³⁰Amuh tei rui zei khou tei kabaanczung ntin lana ravchapaeng tuang chei guay khoutei teylou nina e, kumna nsaekcloumei guay tei ravchapaeng kabamv khoutei bunlou nina e.

³¹Alamvpuatkat khou kathav laapatmei tei kumcna kathav guay tei laa pat nina e. Kumna karym tei rui RINGHPOUC ta tipianlou khang kamei rui mitei ravchapaeng khou tei raw nina e. Heikumna amuh tei rui meic akhat paapc khang khaeng pwkhou, paapc tei kuaklou puni.

³²Thowkumhmei rui kapaap khang lauziu phungc guang nii e thei, hei tei hiaksuimei lauziunay nina e.

³³Kamei rui mi lauziunay py khou tei kabaanc mbaenglouna ravchapaeng tuang dihpy biak thangc naimei, rawna khaeng nimei khouringc swluaimei bamv khou tei swluai nina e.

³⁴Amuh tei rui zei khou tei kabaanczung ntin lana hei tei ravchapaeng tuang chei guay khou tei teylou nina e, kumna nsaekcloumei guay tei ravchapaeng phaybi khou tei bunlou nina e.

³⁵Kumna alamvpuatkat khou kathav laapatmei tei kumcna kamei rui kathav guay tei laa pat nina e, kumna hei tei RINGHPOUC khang rawna khaengmei pang khou tei rawna khaenglou nina e. Heikumna amuh rui meic akhat paap khang khaenglou pwkhou, paapc tei kuaklou puni.