Read Rongmei Naga LEVITHOUC 5 Bible Online

LEVITHOUC 5 - Rongmei Naga bible

LEVITHOUC 5

¹Kabangc khou hyloumei paap guay khang hei khaeng khang kage nai e. Thowkumhmei ta latzan kai khou sakhi khang kaw guang tina kamei rui how kanmei, chu kanmei tei dinc mak ge thei, hei tuang dandi tei kamei phungc nina e.

²Thowkumhmei rui kariak theilayna nthan makmei khouringh — theihmei kumhmei ta thay makna kahilou maanv e thei kamei hei tei kahi the twmei thay patpui lev kamei tei nthan mak khe khatni kakhuay nai the.

³Thowkumhmei rui thay makna tabui bui pwni maansei tuang nthan makmei kahi maanvlou e thei, kamei hei tei kahi the twmei thay patpui lev kamei nthan mak khe.

⁴Thowkumhmei rui ramh kakhanh makna, simei lam pwni, gaymei lam pwni latryan swlou e thei, kamei rui hei tei swlou kan the twmei thay patpui lev kamei nkhuay the.

⁵Thowkumhmei rui nkhuailou e thei, kamei kapaap kalauh nina e.

⁶Kumna kapaap khang tei kamei rui lauziunay hamh e thei ziuhnay phungc guangna RINGHPOUC khang khaeng nina e. Amuh rui mipu paap khang khaeng nina e.

⁷Thowkumhmei rui lauziu hamh e thei ziuh khaeng ngam mak ge thei kamei rui kapaap khang RINGHPOUC khou aphyna kanei hamh e thei akhouhna kanei phungc guang nina e. Akhat rui paapc khang khaeng khang akhat rui rawna khaeng khang e.

⁸Hei tei kamei rui amuh khou phungc guang nina e, kumna kamei rui nruay tei paapc khang khaeng rey puni. Kamei rui kapy thaek pat makna kaguang karai bau puni.

⁹Kumna kamei rui kazei tei ravchapaeng naek khou kazinhlou puni, nsaekcloumei zei guay tei ravchapaeng tuang kabamv khou rui kachaeng kasiamhna riat ganc puni. Mi hei paapc laa ganh khang khaeng nimei kiu the.

¹⁰Mi tangv tei amuh rui akhat ta tei kariak theilayna rawna khaeng puni. Heikumna amuh rui gaanv khat paap khang khaeng pwkhou paapc tei kuaklou puni.

¹¹Thowkumhmei rui aphyna kanei hamh e thei akhouhna kanei tei sini khaeng ngam mak ge thei kapaap khang khaeng khang ntyan buay handwang akhat phungc guang nina e. Kamei rui khou tei Olive thauc khatni agaw lou kazauh nuh mak ge, kalam thu hei tei ntyan katmei tuang hamh e, paapc khang khaengmei tuang de.

¹²Kamei rui hei tei amuh khou phungc guang pwkhou, kamei rui baankiu akhat ruai lana kaguayna tei RINGHPOUC khang katlou the twmei lyanna kamei rui hei tei ravchapaeng khou rawna khaeng puni. Mi hei paapc laa ganh khang khaeng nimei kiu the.

¹³Heikumna amuh tei rui mipu paap khang tei khaeng puni kumna kapaap tei kuaklou puni. Ntyan khaengmei khou tei nsaekcloumei ntyan buay tei amuh khang e.

¹⁴RINGHPOUC rui mi hei Mousi khou sa guangmei lat re.

¹⁵RINGHPOUC khang katloumei puat tei tiilou makna thowkumhmei rui maanvna paapc taanclou e thei, hei tei khaeng datmei tuang puatkat swna hiaksuimei lauziuchic hamh e thei ziuchic RINGHPOUC khang phungc guang nina e. Mi tuang puatkat manv tei Ravkai khou tat bammei manv chaengc khou ding puni.

¹⁶Kamei rui tii kan makmei zaeng khang tei rui 100 khou 20 louhaapna tii dat nina e. Kamei rui amuh khou tiilou puni, kumna amuh tei rui mipu paap khang tei mi khouringc tei khaeng puni, kumna mipu ta tei kuaklou puni.

¹⁷Thowkumhmei rui thay makna RINGHPOUC tuang latdanv swbakna paapc taanc e thei, kamei nkhuai the kumna mi paap khang tei kamei khap nina e.

¹⁸Kamei rui amuh khou tei khapmei puatkat swna hiaksuimei lauziuchic hamh e thei ziuchic phungc guang nina e. Mi tuang manv tei thu Ravkai khou tat bammei manv chaengc theilayna ding key nina e. Mipu paap khang tei amuh tei rui khaeng nina e kumna kapaap tei kuaklou puni.

¹⁹Mi hei RINGHPOUC ruc khou taancloumei paap tuang khaengmei puatkat re.