Read Rongmei Naga LEVITHOUC 7 Bible Online

LEVITHOUC 7 - Rongmei Naga bible

LEVITHOUC 7

¹Mi hei nthan dianghmei khaengmei puatkat khou taanc nimei riak ge.

²Khaengmei khouringc tei khouringh dowluaimei bamv khou tei dowluai nina e, kumna mi zei tei ravchapaeng naek padeih khou tei kazinhlou nina e.

³Kathav guay tei laapatna ravchapaeng khou tei khaenglou nina e: thahmei kamai, karav guay,

⁴kaki kanei khatni kaki duammei thav guay, khatni kathyn khou gay liangmei langv tei kat nina e.

⁵Amuh tei rui kathav guay tei ravchapaeng khou tei rawna RINGHPOUC khang khaeng nina e. Mi hei khaengmei puatkat re.

⁶Amuh kaimei nggaanvmei guay hei tei tu nuh e, Kum e tiki hei tei Nthanmei bamv khou tu nina e, kalam thu hei tei nthan dianghmei e.

⁷Paapc khang khaengmei khatni khanghmei puatkat khou nchamcmei riak akhat kiu thu: Khaengmei zanc tei thouh swmei amuh khang tei e.

⁸Rawna khaengmei tuang khouringc gic guay tei thouh swmei amuh khang tei e.

⁹Ntyan puatkat khou maimangh khou rawmei, khaengclai khou kabicmei, hamh e thei laipaek khou kabicmei ntyan guay tei thouh swmei amuh khang tei e.

¹⁰Kum e tiki minh makmei guay tei, thauh kaniloumei pwni, phuimei pwni, Aron kaikhwangmei amuh guay khang e kumna hei tei kaniw khang nchamhna nzanh nina e.

¹¹Mi hei alamvpuatkat swna RINGHPOUC khang kat khou sw nimei thouc e.

¹²Thowkumhmei rui Ravguangc khang thuanckumei puatkat kat nii e thei, khaeng nimei tuang khouringc tei lev twna khay loumakmei ntyan: Olive thauc kanimei nsumei ntyan, Olive thauc teyloumei saa kangcloumei ntyan, khatni thauh kaniloumei nthiuminhmei ntyan phungc kazauh guang nina e.

¹³Hei ruc khou hei rui khay loumei ntyan dwm asaekc ni kat nina e.

¹⁴Kamei rui ntyan zaat kathuic khou rui akhat akhat nkunmei RINGHPOUC khang tii patmei tuang swna kat nina e, mi zei tei laana ravchapaeng khou kazinhloumei amuh khang tei tii nina e.

¹⁵Alamvpuatkat Khaengmei zanc tei mi nungc tei rui tu ngam nina e; katit na sini nthuanh khang daeklou nuh mak ge.

¹⁶Kum e tiki katuang puatkat tei kalatdyng ti-nthuihloumei tuang hamh e thei kat niina katmei tuang e thei khaengmei zanc tei mi nungc tei tu lana nsaekcloumei tei nthuanh thau datna ni tu nuh e.

¹⁷Zaeng neih thumh nganv nsaekcloumei tei thu mai ntei nina the.

¹⁸Hei tei zaeng neihthumh nungc tei tu dat re thei katuang puatkat tei Ravguangc rui laalou dat ni tuang hamh the. Khaengmeipu khang tei ni kataanv tei chaklou ni tuang hamh the, mi phaan tei hei tei mphuammei di the twna laa puni the, kumna hei tei tu tumei tei karana kakhuay phungc puni.

¹⁹Mi zanc tei kariak khou nthan makmei puat akhat lev twna kahilou e thei, hei tei tu dat lak nina the, mai ntei nina the. Kariak theilayna nthanpui mei tei rui mi zanc tei tu nuh e,

²⁰Nthan makmei mei rui alamvpuatkat Ravguangc khang katloumei tei tu e thei kamei pang khou rui swluai ganc puni.

²¹Khouringh ta pwni, maansei ta pwni kariak theilayna nthan makmei akhat ta kahiloupui mei tei rui hei tei tu e thei kamei pang khou rui swluai ganc puni.

²²RINGHPOUC rui Mousi khou sa the,

²³Isaraelmei khou heikumna sa ti tho twna sa the, Guaichic thav hamh e thei lauziuchic thav hamh e thei ziuchic thav tu nuh mak ge.

²⁴Karana theicloumei hamh e thei ramhkhat rui swluailoumei khouringc thav tei tu nuh mak ge, tiki hei tei ramh lam baihmei khang thu piu nuh e.

²⁵Rawna khaengmei khouringc thav tupui mei ta tei Ravguangc mei pang khou rui swluai ganc puni.

²⁶Isaraelmei ta tabui bui bamv khou bammei pwni, nruay thauruay khatni khouringh khounah zei tei taektw swna tu nuh mak ge.

²⁷Thow pwni mi riak hei twanlyampui mei ta tei Ravguangc mei pang khou rui swluai ganc puni.

²⁸RINGHPOUC rui Mousi khou sa the,

²⁹Isaraelmei khou heikumna sa ti tho, thowkumhmei rui alamvpuatkat RINGHPOUC khang kat re thei mi khou tei rui kalangv akhat nkunmei puatkat swna RINGHPOUC khang phungc guang nina e.

³⁰RINGHPOUC khang rawna khaeng nimei tuang tei kabaanc kahak rui phungc guang nina e. Kamei rui khouringh thav tei kaphurou lev twna phungc guangna hei tei nkunmei kaipat swna RINGHPOUC khang tiilou nina e.

³¹Amuh tei rui kathav tei ravchapaeng khou mai ntei puni, tiki laikhwm tei thu amuh nunc tuang e.

³²Alamvpuatkat khang khaenglou bammei khou tei rui nzat theinaeng tei amuh khang tei nkunmei dam swna tii nina e.

³³Aron nac pang khou alamvpuatkat khaenglou bammeipu khang tei nzat naeng tei nkunmei dam swna tii nina e.

³⁴Laikhwm tei nkunmei kaipat swna khatni nzat theinaeng tei nkunna tii nimei tuang dam swna RINGHPOUC rui Isaraelmei khou rui laa lana amuh nunc khang tiimei tuang e. Mi hei thei thangc ni Isaraelmei guay rui amuh nunc khang tii bam nimei tuang e.

³⁵Mi hei RINGHPOUC khang taektw puatkat dam swna Aron khatni kanac nunc khang kaniw ta amuh suanglou nungc tei rui tiiloumei tuang the.

³⁶Kumna khaengmei tuang dam tei amuh nunc khang tii nina e twna kaniw ta suangloumei nungc tei RINGHPOUC rui Isaraelmei khou latdanv swna tiiloumei tuang the. Mi hei thei thangc nganvna Isaraelmei rui tat bam nimei riak ge.

³⁷Mi riak hei rawna khaeng khou, ntyan kat khou, paapc khang khaeng khou, khaengmei puatkat kat khou, bamv suangmei puatkat kat khou tat nimei tuang e.

³⁸Mi hei Isaraelmei rui ravkhaeng nina e twmei tuang latdanv RINGHPOUC rui Mousi khou Sinai Chyng khou tii guang nungc tei rui mi latdanv hei tiilou kanmei tuang the.