Read Rongmei Naga LEVITHOUC 9 Bible Online

LEVITHOUC 9 - Rongmei Naga bible

LEVITHOUC 9

¹Zaeng tachat tanghmei nungc tei Mousi rui Aron, kanac mpouh khatni Isaraelmei gaanvthaih nunc ta kaw guang the.

²Kumna kamei rui kaniw khou sa the, hiaksuimei guaituamchic launa khatni lauziuchic laa lana guaituamchic tei rui paapc khang khaeng tho kumna lauziuchic tei rui rawna RINGHPOUC khang khaeng tho.

³Mi tangv tei, paapc khang khaeng khang ziuchic akhat, rawna khaeng khang hiaksuimei tingkwm akhatmei guaituam launa akhat khatni tingkwm akhatmei lauziunac akhat

⁴khatni alamvpuatkat khang guaituamchic akhat lev lauziuchic akhat laaguang o twna meic nunc khou sa o. Thauh kazauhmei ntyan katmei lev twna kaniw hei tei kat nina e. Kalam thu aseic hei RINGHPOUC kaniw khou lyanlou puni.

⁵Mousi rui samei guay tei kaniw rui kalummei pheykai kaimav khoutei phungc guang the, kumna RINGHPOUC ta kalum khang meic kapwmna khoutei guang kaduai the.

⁶Khoutei Mousi rui sa the, “RINGHPOUC tuang hym tei nangniw khou lyanlou diu khang mi hei taanc o twna RINGHPOUC rui nangniw khou latdanv tiimei tuang the.”

⁷Khoutei kamei rui Aron khou sa the, “Nang tuang paap khatni meic nunc tuang paap kuaklou khang ravchapaeng khou tei guangna paapc khang khaengmei rawna khaengmei taanv tei taanc tho. Meic nunc tuang paap kuaklou diu khang, RINGHPOUC tuang latdanv theilayna mi hei kat tho.”

⁸Aron rui ravchapaeng khou guangna kapaap khang khaeng nimei guaituamchic launa tei dowluai the.

⁹Kanac mpouh nunc rui zei tei kakhou laaguang the, kumna kabaanczung zei khou tei ntin lana ravchapaeng chei guay khou tei teylou the, kumna nsaekcloumei guay tei ravchapaeng phaybi khou tei bunlou the.

¹⁰Mi tangv tei RINGHPOUC rui Mousi khou tiiloumei latdanv theilayna kamei rui kathav, kaki nei, khatni kathyn khou gay liangmei langv tei ravchapaeng khou kat the.

¹¹Kum e tiki kazanc khatni kagic tei thu kalummei pheykai paengc thangc laa patna ntei the.

¹²Kakhang rawna khaeng nimei khouringc tei ni kamei rui swluai the. Kanac mpouh nunc rui zei tei laaguang pwkhou kamei rui zei tei ravchapaeng naek padeih khou tei kazinhlou the.

¹³Kaniw rui kapy khatni baihmei zanc bangv guay tei ni kakhou tiilou the, kumna kamei rui mi guay tei ravchapaeng khou raw the.

¹⁴Kamei rui kalungcna khatni katan tei khiu lana ravchapaeng khou rawna khaengmei puat ruc khou tei louna ntei the.

¹⁵Mi tangv Aron rui meic nunc tuang puatkat tei kat the. Meic nunc tuang paap khang khaeng nimei ziuc tei kamei rui laana hei tei dowluaina, kapaap khang katmei thak tei kumcna hei tei kat the.

¹⁶Rawna khaeng nimei khouringc tei ni laaguangna hei tei dincloumei kariak thei suicna khaenglou the.

¹⁷Ntyan kat nimei tuang tei ni kamei rui laaguangna, ntyan buay baankiu akhat ruaina ravchapaeng khou tei ntei the. (Mi hei tingmik pum kat bammei tuang khou tei haaploumei tuang e.)

¹⁸Meic nunc khang rui alamvpuatkat kat nimei guaituamchic khatni lauziuchic tei kamei rui dowluai the. Kanac mpouh nunc rui zei tei kakhou laaguang the, kumna kamei rui hei tei ravchapaeng naek padeih khou tei kazinhlou the.

¹⁹Kumlana guaituamchic lev lauziuchic tuang thav, kamai bangbi, kalungcna guay ta duammei karavpaek, kaki kanei khatni mi khou tei naimei thav khatni kathyn khou gay liangmei

²⁰mi kathav guay hei kaphurou khou tei mbaenglouna Aron rui ntei the.

²¹Kumlana kaphurou kanei tei khatni baanzat theinaeng tei nkunmei kaipat swna RINGHPOUC mav khou Mousi tuang latdanv theilayna katlou the.

²²Aron kamei rui khaeng nimei tuang taanv guay taanc luailouna meic nunc ruc khou tei kabaanc zaythauna suaihiamlou the, kumna kamei tat key dat kan the.

²³Kumna Mousi lev Aron tei RINGHPOUC tuang kalummei pheykai lungc khou tei gut the, kumna kaney pat dat lana kaney rui meic nunc khou tei suaihiamlou the. Khoutei RINGHPOUC tuang chanh chanmei hym tei meic nunc khou lyanlou the.

²⁴Thay mak daek khou RINGHPOUC rui mai tikeyna ravchapaeng khou naimei rawna khaengmei tuang ravcha guay tei raw kan the. Hei tei meic nunc rui how pwkhou, kaniw tei kauc ranvna kauc thau the kumna kaniw zaw kandih khou sow nkhum key the.