Read Rongmei Naga JEREMIA 1 Bible Online

JEREMIA 1 - Rongmei Naga bible

JEREMIA 1

¹Mi buk hei Hilkia nac mpouh Jeremia, Benjamin ramv khou naimei Anathot kaidai khou muhzwng akhat swna bammeipu rui saloumei lat re.

²Amon nac mpouh Josia rui Judamei guangc swmei 13mei kwm RINGHPOUC rui Jeremia khou lat tei tiguang the.

³Josia rui puanhmei Jehoiakim rui guangh sw bam datmei ganv khou ni kakhou sa guang dat muay khwan e. Mi tangv tei thu Josia rui puanhmei Zedekia guangh swmei tingkwm 11mei tangh mak saanv RINGHPOUC rui kakhou salou geic sih khwan e. Mi kwm tuang panguhmei bw khou tei Jerusalemmei nunc ta rihnym tat khwan the.

⁴RINGHPOUC rui akhou kumna sa the,

⁵“Nang hei zaatc nunc khou muhzwng swkhang nang ta nang pui bung khou damclou mak khou rui ai rui nang ta kadahlou the, nang ta puanclou mak khou rui ai rui kapahlou the.”

⁶Ai rui kumna daw the, “He Kauh Liangmei RINGHPOUC, ai thu lat sa thay mak ge; ai hei alauc di he.”

⁷Tiki RINGHPOUC rui akhou sa the, “Nang alauc di he twna sa riu. Ai rui dinclou o twna saloumei nunc khou tei tat tho kumna ai rui sa o twna samei lat guay tei kaniw khou salou o.

⁸Nang kaniw ta ping riu, ai rui nang ta nduanghlou puni khatni gaeklou puni. RINGHPOUC ai rui mi hei samei tuang the!”

⁹Khoutei RINGHPOUC rui kabaanc haamv patna achy khou kahilouna, akhou sa the, “Zauc lo, nang rui sa nimei lat tei ai rui nang khou tiilou kan the.

¹⁰Zaatc nunc ta khatni guanghdic guay ta phuai pat khang khatni swbau key khang, swkamut kamai khang khatni laaganh khang kasiamh thau khang khatni lingclou khang nang khou ngamv tiilou kan the.”

¹¹RINGHPOUC rui akhou sa the, “Jeremiale, nang tabui how bu cho?” “Almon thingchy phwam akhat how e” twna ai rui daw the.

¹²RINGHPOUC rui sa the, “Nchumh the, ai rui sa pat kanmei lat tei guang tangc pwmei ta zauc bammei tuang e.”

¹³“Baihmei ni nang tabui how dat bu cho?” twna RINGHPOUC rui akhou thanv the. Ai rui daw the, “Dui lai akhat batna bammei, kumna hei tei mi biak thangc karih key nina bammei ta ai how e.”

¹⁴Kamei rui akhou sa the, “Swkamut kamaimei hei mi kandic khou lungc bammei kaguayna ruc khou dui bun kumc bunkey puni the.

¹⁵Dihpy thangc bammei zaatc guayna ta ai rui kaw guang puni the. Kaniw tuang guangc nunc rui Jerusalem tuang raengcmun khou, mi raengh daeng nkuaymei khou, khatni Juda tuang baihmei kaidai guay daeng khou kaniw tuang guangc bamvpaeng duancthaulou puni the.

¹⁶Ai rui amei nunc ta dandi tii puni the, kalam thu kaniw rui paapc taanc the; kaniw rui ata ganclouna rav baih baihmei khang khaeng tat kan the, khatni kaniw rui ravmaengc kasiamh lana kalum tat kan the.

¹⁷Chamdaanv tho, Jeremiale; ai rui nang ta sa o twna samei lat tei kaniw khou tatna sa tho. Ntaw kaniw ta ping riu, ping e thei nang kaniw pang khou guang pwkhou ai rui tiping ranvlou puni.

¹⁸Nking o, Jeremiale, Judamei guangc nunc, meicdaihmei nunc, amuh nunc khatni meic nunc kaguayna rui nang ta nuh ni tuang hamh e. Tiki kaniw ta akhangv khang ai rui aseic nang khou pumtan tiilou puni the. Nang hei raengh raengloumei kaidai kumc puni the, ntanh tiangc kumc, tanzinc raengc kumc puni the.

¹⁹Kaniw rui nang ta akhangv ngam ni tuang hamh e, kalam thu ai rui nang ta lamluailouna gaeklou puni. RINGHPOUC ai rui mi hei samei tuang the.”