Read Rongmei Naga JEREMIA 10 Bible Online

JEREMIA 10 - Rongmei Naga bible

JEREMIA 10

¹Isaraelmei nuncle, RINGHPOUC rui nangniw khang tii guangmei lat hei nking o.

²Kamei rui sa e, “Zaatc baihmei nunc chaeng tei nangniw lay tat riu; tingpuk khou kadath datmei tuang pat bammei tei rui swkaguakc riu, mi ta tei zaatc baihmei nunc rui pingna bam sini.

³Kaniw tuang ravriak tei nsa de. Hei tei nwmbangc thingbang dow key lana, thing taanhmei nunc rui ruaicna,

⁴kachaekc khatni daandi rui karuhloumei tuang de. Hei tei bow key mak khang zuatpi rui hian dingloumei tuang de.

⁵Mi kumhmei ravmaengc nunc hei laupuk khou lou bammei thai kumhmei tuang de; kaniw lat sa thay mak ge; tat thay mak ge maansei rui phungc tat bammei tuang de. Mi kumhmei ta tei nangniw ping riu; hei tei rui nangniw ta sw kasic ngam mak ge, ramh gaymei ni swlou ngam mak ge.”

⁶RINGHPOUC, nang kumhmei baihmei maek ge; nang hei ngammei e, nang zanc hei daic e khatni ngam e.

⁷Thow rui nang ta champouh lak nina cho, zaatc guayna guangcle? Nang ti hei champouh biuc e. Nang kumhmei maek ge zaatc guayna tuang ningtyngmei pang khou khatni kaniw tuang guangc pang khou.

⁸Kaniw kaguayna tei mpang nlomei nunc de. Thing tuang ravmaengc khou rui kaniw tabui thay nina cho?

⁹Kaniw tuang ravmaengc guay tei Spain[1] kandic tuang daandi, Uphaz tuang kachaekc rui duammei tuang de, baanhthaymei nunc rui kasiamhloumei tuang puat rana de; baanhthaymeipui nunc rui dakloumei nrymmei khatni haengcnrymmei phey rui karuhloumei tuang de.

¹⁰Tiki nang hei Ravguangc ling e, nang hei ringhmei Racguangc e khatni tingsaengzaeng guangc e. Nang lungpuamc pwkhou, kandih kadunh e; nang lungpuam tei zaatc nunc rui akhaengv ngam mak ge.

¹¹(Tingpuk kandih damh makmei rav nunc ta tei swmutlou puni, mi guay tei kandih nam ruc khou nai bam dat lak khe twna nangniw rui kaniw khou tei salou nina e.)

¹²RINGHPOUC rui kangamv rui kandih damhmei tuang e; kaningting rui mbaanv khatni karamthai rui tingpuk ta laamv ntyng patlou the.

¹³Kalatdanv khou tingpuk thangc ting thinc the; kamei rui tingpuk tin thangc rui muangh phungc guang the. Kamei rui ting khou rui ting tipaliklou the, mpwan kai khou rui mpwan ni tiguang the.

¹⁴Mi hei how pwkhou, meic nunc tei ramh thay makmei mpangmei sw the; ravmaengc kasiamhmei nunc ta tei kaniw tuang ravmaengc rui tizak the. Kalam thu kaniw tuang ramaengc nunc tei saraamhmei de, khatni ringhmei hamh e.

¹⁵Mi guay tei nsa de kumna malapui tuang de; RINGHPOUC rui kaniw ta dandi tii pwkhou mi guay tei sw kamut kamailou puni.

¹⁶Jakob tuang Racguangc thu hei tei kumhmei hamh e; kamei hei ramh katana damcloumeipu e, kamei hei Isaraelmei ta kamei khang kapahloumeipu e. Ngamparymei RINGHPOUC twmei hei kazanc e.

¹⁷Jerusalemmei nuncle, nangniw ta ding haengv ngam the! Nangniw tuang puat katiamh la di tho.

¹⁸RINGHPOUC rui nangniw ta mi kandic khou rui ganc pat puni the; nangniw ta kamei rui swmutsutlou puni the. RINGHPOUC rui sa the.

¹⁹Jerusalemmei nunc rui kumna kauc the, “Aniu hei kabiu kasic sihna kabiu the! Aniu zam hei gay dat ni tuang hamh the. Mi hei aniu rui khaengv ngam pwng de twna ning bam khwan e.

²⁰Aniu tuang pheykai guay hei sw kasic karouc ngam the; kariang guay swtap ngam the. Aniu nac guay ni tat ngam kan the; aniu tuang pheykai katinghlou dat nimei meic maek khe; khamthinghphey katinghlou dat nimei ni maek khe.”

²¹Ai rui kumna daw the, “Aniu tuang kapy nunc hei mpang the; kaniw RINGHPOUC chwn thanv mak khe. Hei zaeng rui kaniw daic thau ngam mak tuang the, khatni aniu mei nunc ti hei zin phakloumei tuang the.

²²Nking o! rih chamv guang the! Dihpy thangc meic zaatc akhat kachin karo bam the; kaniw tuang ricmei nunc rui Juda tuang kaidai guay ta ramvkaengvdic tiguanhlou puni the, asacsi nunc bamv tiswlou puni the.”

²³He RINGHPOUC, maansei gaanv khat na sini kapanty tei kamei rui zayna tat bam tuang hamh e twmei ai thay e, meic gaanv khat na sini kapanty ta sin mak ge.

²⁴He RINGHPOUC, nang mei nunc ta sw ntwnlou o; tiki aniw rui ngam lakmei khou thu riaplou rio, nang lunghpuamcna ni riaplou rio; kum e thei aniu mut puni the.

²⁵Nang lungpuam tei nang ta kalum makmei zaat khatni nang ta laalou makmei mei nunc ruc khou keylou kan o. Kaniw rui nang mei nunc ta swluai kan the, kaniw rui aniw ta swkamut kamailouna aniw kandic ti hei swmutsutlou the.