Read Rongmei Naga JEREMIA 11 Bible Online

JEREMIA 11 - Rongmei Naga bible

JEREMIA 11

¹RINGHPOUC rui akhou kumna sa e,

²“Mi tuang latdyng lat guay ti hei nking o. Kumna Juda khatni Jerusalem khou lungc bammei nunc khou salou o.

³Mi latdyng lat guay piu makmei nunc tei syang phunghmei nunc the twna Isarael Racguangc rui sa e twna salou o.

⁴Hei tei ai rui kaniw pupouc nunc lev twna kaniw ta Izip kandic, kaniw khang chuangc bammei maimangh kumhmei khou rui laapatloumei ganv khou tei rui swloumei latdyng e. Ai rui kaniw ta alat piu khang khatni ai rui taanc o twna samei guay taanh khang kadylou khwan e. Kaniw rui hei tei piuna bam e thei kaniw tei amei nunc sw puni khatni ai rui kaniw Racguangc sw puni.

⁵Kaniw pupouc khou ntaw kaniw lungc bammei kandih gaymei ramvnga ramvngu hei tii puni twna nrianhloumei latdyng tei taanclou puni.” “Nchumh the, RINGHPOUC,” twna ai rui daw the.

⁶Khoutei RINGHPOUC rui akhou sa the, “Nang Juda tuang kaidai guay thangc khatni Jerusalem tuang chaengluang chaengluang khou tatna ai rui samei lat hei sa tho kumna latdyng swloumei lat guay tei nking khang khatni piu khang sa tho.

⁷Ai rui nangniw pupouc nunc ta Izip khou rui nduangh patmei douc tei kaniw alat piu mak maanv lam e twna sa ranvna salou kanmei tuang e, kumna ntaw nganv heikumna sa guangmei tuang the.

⁸Tiki kaniw chulou mak ge, piu ni piu mak ge. Kumna kaniw kathuicna kaniw nu tanc the khatni si taan zat mak khe. Latdyng hei ngaek go twna ai latdanv tiina bam e tiki kaniw piu zat mak ge. Kumna tii ni twna saloumei dandi guay tei ai rui kaniw khou tiguang the.”

⁹Khoutei RINGHPOUC rui akhou sa the, “Jerusalemmei khatni Judamei rui ata sw kasic khang sw bam e.

¹⁰Alat piu makmei kaniw pupouc nunc tuang paap khou kaniw hanc gut dat kan the; kaniw rav baih baihmei ta kalum tat kan the. Ai rui kaniw pupouc nunc lev swloumei latdyng tei Isaraelmei khatni Juda rui sw bak the.

¹¹Kumhpui zaeng rui, kaniw ruc khou swkamut kamaimei tiguang puni the, hei tei kaniw duak dat ngam ni tuang hamh the twna RINGHPOUC ai rui kaniw khou samei tuang e. Kaniw rui nkhavlou khang kauc pwkhou, ai rui kaniw khwan tei chulou lak ge.

¹²Hei khou kiu Juda khatni Jerusalemmei nunc tei kaniw rui khaeng bammei rav nunc khou tei tatna nkhavlou khang kaniw khou kauc puni, tiki mi swkamut kamaimei hei guang pwkhou mi rav nunc hei rui kaniw ta kanlou ngam ni tuang hamh e.

¹³Judamei nunc tei kaniw tuang kaidai zu rav ni nai e khatni Jerusalemmei nunc rui chanymei Baal rav khang khaengmei ravchabamv kaniw kaidai tuang chaengdai zu kasiamh thaulou the.

¹⁴Jeremiale, mi mei nunc khang rui akhou sa dat ri tho khatni huayney dat ri tho. Kaniw ryanramei khou keylouna nkhavlou o twna kauc pwkhou, ai rui kaniw samei tei nking lak ge.”

¹⁵RINGHPOUC rui sa e, “Ai rui nzianmei nunc rui simei taanv taanc bam e. Kaniw atuang Ravkai khou bam bam khang tabui thouc naina cho? Latdyng swloumei paan rui hamh e thei khouringh mpeyna katmei paan rui swkamut kamaimei guang nimei hei khaam ngam puni twna kaniw ningna cho? Hei tei rui kaniw ta tineihlalou puni dina cho?

¹⁶Kaganv akhat khou ai rui kaniw ta kanuy geihmei, kathai gaymei nthai guih guimei Olive bang twna kaw bam khwan e; tiki ntaw thu tingthinh kumcna ai rui kaniw ta tei mai raw puni the kumna kachy guay bangv key puni the.

¹⁷“Ngamparymei RINGHPOUC, Isaraelmei ta lingcloumeipu ai rui, kata swkamut kamailou dat khang kauc pat the. Mi hei kaniw rana rui kaniw ruc khou tiguangmei tuang e, kalam thu kaniw nkhuaimei taanv taanc the. Kaniw Baal khang khaengna alung tipuamc the.”

¹⁸Ata zauczihmei nunc rui ata swluai khang sw bammei ta RINGHPOUC rui akhou dinclou the.

¹⁹Ai hei swluai khang zay patmei reih reina tat bammei lauziunac kumc the. Aruc khou ata sw kasic khang sw bam e twmei ai thay mak khwan e. “Mi thingbang tei kathau gay bam khou gai bau key di kho; kata meic gaanv khat na rui sini ningtow bam dat mak khang aniu kata swmaan di kho,” twna kaniw sa bam e.

²⁰Khoutei ai rui kumna huayney the, “He Ngamparymei RINGHPOUC, nang hei nchumhmei latzanpouc e; nang rui maansei tuang lung khatni chwn kaguay tei zauc e. Aruc khou taanclou bammei guay hei nang khou poulou the. Nang rui kaniw ruc khou khwm khangcloumei ta ai nkhwanna bam e.”

²¹Ata swluai kanmei ta Anathotmei nunc rui kahaw the, ai rui Ravguangc lat heikumna sa bam e tw e thei swluai puni twna kaniw rui akhou sa e.

²²Kumhpui zaeng rui Ngamparymei RINGHPOUC rui kumna sa e, “Ai rui kaniw ta riap puni! Chabwan nunc suc-rih khou theic puni, alauc nunc ndaapcna theic puni.

²³Anathotmei nunc ruc khou swkamut kamaimei tiguang nimei ganv ai rui tiilou kan the, kumna mi ganv kiu guang pwkhou, kaniw gaanv khat na sini ringc pat dat ni tuang hamh the.”