Read Rongmei Naga JEREMIA 12 Bible Online

JEREMIA 12 - Rongmei Naga bible

JEREMIA 12

¹“He RINGHPOUC, ai rui atuang latbamv hei nang lev agi pwkhou, nchumh e twmei thay puni de. Tiki nchumhmei latbamv khou ai nang khou lat akhat thanv nii e. Tabui swna meicsimei nunc heidi daicthau bam tu cho? Tabui swna lungh nthan makmei rui karamhmei guang tangc bam tu cho?

²Nang rui kaniw ta lingclou the, kumna kaniw maan zangc key the; kaniw daic thauna kathai nthai the. Kaniw kaganv kathuicna khou nang ta sa chuyna sa e, kaling thu kaniw nang ta thouh sw mak ge.

³Tiki, He RINGHPOUC, nang ata thay e, ai rui taanhmei nang how e, ai adih nang ta nzian cho twmei nang thay e. Mi meicgay makmei nunc ti hei lauziu ta dowluai khang zay pat kumc zay pat kan o, kaniw ta swluai nimei ganv tangh mak saanv bangclou o.

⁴Asaanh tingsaengcna aniu kandic hei kangcna bam nina cho, mphuaih guay hei theic ngamna bam nina cho? Khouringh khounah, nruay thauruay guay hei theic bam the, aniu mei nunc paap zaeng rui, ‘aniu taanv hei Ravguangc thay mak ge’ twna sa bammei zaeng rui.”

⁵RINGHPOUC rui kumna sa the, “Jeremia, nang maansei lev pak akhyam khou lak ge thei thu, akumhna nang takuanh lev pak akhyam nina cho? Nang laupuk khou nganvna ding thau ngam mak ge thei, Jordan tuang ngouc khou thu akumh nina cho?

⁶Nang chana punav nunc, nang kai kaikhuncmei rui nganvna nang ta sw kasic khang sw the, kaniw kariuna nang ta sw kasic khang sw the. Kaniw latgay sa bam sini kaniw ta lwm riu.”

⁷RINGHPOUC rui sa e, “Ai rui Isaraelmei ta ganclou the; ai rui kadahloumei zaat ta ai rui ganc pat the. Ai rui nzianmei mei nunc ta kaniw ta zauczihmei nunc baanc khou tiilou kan the.

⁸Ai rui kadahloumei nunc rui ata akhangv the; nwmbangc khou kamangliangpui nin kumcna kaniw ata nin the, hei zaeng rui ai kaniw ta karaeng the.

⁹Ai rui kadahloumei nunc hei mouc langdia rui baanzat baandau kadakc guangmei nruayna nunc kumc the. Kaniw ta tu nimei khumngai khou tei nwmbangc khouringc guay ta kabai tho!

¹⁰Kandih baihmei guangc nunc rui atuang drakhalau swkamut kamai ngam the; kaniw rui atuang laupuk kadym puat ngam the; atuang gay kanmei kandic ta kaniw rui sypungramv ti-mbaihlou the.

¹¹Kaniw rui mi hei meic lungh makmei ramv ti-mbaihlou the; mi hei sw kasic karoucna ahu khou ganclou bam the. Mi kandic kapwm hei tazikramv mbaih the, meic gaanv khat na sini kadanlou mak khe.

¹²Kauhmei sypungramv khou swkamut kamaimei nunc guang the; mi kandih kapwm tei swkamut kamailou khang ai rui rih tiguang the; gaanv khat na sini nchu-nzaenghna lungc dat pw lak khe.

¹³Amei nunc gehu lingc keyna napriak tay dat the; kaniw taanc ranvna taanc the, tiki ramhkhat na sini laatow mak khe. Alungpuam zaeng rui kaniw tuang phunling nthai mak khe.”

¹⁴RINGHPOUC rui sa e, “Ai rui Isaraelmei, amei nunc khang tiiloumei ramv ta sw kasic karoucloumei Isaraelmei kainingmei guay khou lat akhat sa khang nai e. Kumna ai rui mi meicsimei nunc ta tei kaniw kandic khou rui phuai pat puni the kumna ai rui Juda ta kaniw baanc khou rui kan duaklou puni.

¹⁵Tiki ai rui Juda ta laa pat dat kanmei tangv thu, ai rui kaniw ta zauc nzianlou dat puni, ai rui kaniw zaatc kathuicna ta kakandih dih, karamv ramv khou phungc guanglou dat puni.

¹⁶Kaniw lungsyng thangc rui amei nunc tuang ravriak tei laalouna, kaniw rui kaganv akhat khou amei nunc ta Baal zanc saancna latdyng swkhang nchamloumei kumcna ‘RINGHPOUC ringc bammei kumcna’ twna azanc saancna latdyng sw pw e thei kaniw ni amei nunc sw puni, kumna daicthauna bam puni.

¹⁷Tiki alat piu makmei zaat ta thu ai rui kamaan phukna swmutlou puni. RINGHPOUC ai rui sa the.”