Read Rongmei Naga JEREMIA 13 Bible Online

JEREMIA 13 - Rongmei Naga bible

JEREMIA 13

¹Linen tuang siangiat liuna kagiatc ro twna RINGHPOUC rui akhou sa e; tiki hei tei dui khou thu lou riu twna sa e.

²Kumna ai hei tei liu lana kagiatc the.

³Khoutei RINGHPOUC rui akhou kumna sa dat re,

⁴“Nang Euphratis duiriang thangc tei tatna mi siangiat tei khowlang khou rylou o.”

⁵Ai tatna hei tei Euphratis duithuak daeng khou rylou the.

⁶Kaganv kanakmei tangv hei tei tatna laa dat tho twna RINGHPOUC rui akhou sa the.

⁷Kumna ai tatna hei tei nkamhloumei bamv khou tei guang pwki hei tei kasic ngam the, hei tei ramhkhat na khang sini gaeng mak khe.

⁸Khoutei RINGHPOUC rui akhou sa dat re,

⁹“Mi hei kumna ai rui Juda tuang guangc khatni Jerusalem rui kagaengh swna bammei guay ta tei swkamut kamailou puni the.

¹⁰Mi meicsimei nunc hei alat piu zih the. Kaniw nu tanc the khatni kaniw lung kalaic zat mak khe, khatni rav baih baihmei ta kalumna kasiamruai swna tat kan the. Kumna kaniw hei mi kasic ngammei siangiat hei kumc puni the.

¹¹Siangiat tei sian khou kamc ntipna kamc bammei kumcna Juda khatni Isaraelmei guay rui akhou pap ntipna pap bam khang swloumei tuang e. Heikumna kaniw hei amei nunc swna azanc thuancna azanc hym tidaicna bam khang ai mi hei swmei tuang e, tiki kaniw alat piu mak khe.”

¹²RINGHPOUC rui akhou sa e, “Jeremiale, drakhadui lai tei drakhadui lou padik nina e twna Isaraelmei nunc khou sa tio. Drakhadui lai guay tei drakhadui lou padik nina e twmei thay de twna kaniw sa puni.

¹³Kum pwkhou, RINGHPOUC ai rui mi kandic khou lungc bammei kathuicna ta David khou rui lungc guangmei guangh nunc, amuh nunc, muhzwng nunc, khatni Jerusalemmei kaguayna ta kaniw tei mba mak saanv drakhadui lic padiklou puni.

¹⁴Kum pwkhou drakhadui lai kapyang kumc kaniw meic kathuicna pu ni nah ni alauc ni gaanvthaih ni khat khat ta kapyang puni the. Nzianmei khatni zauzian maekna kaniw ta swluai key puni the.”

¹⁵Isaraelmei nuncle, RINGHPOUC rui sa the! Niamhkey o kumna kamei rui samei nking o.

¹⁶RINGHPOUC kamei rui zinghmei tii guangna nangniw luanghbut khou phay suy mak khou; nangniw rui lwmgayna bammei riw tei zingh zingmei ti-mbaih mak khou, RINGHPOUC nangniw Racguangc ta champouh o.

¹⁷Nangniw chulou mak ge thei, nangniw gaengh zaeng rui ai nkamhna kap puni the; ai kap ranvna kap puni the, kumna amikdui luangc puni the kalam thu RINGHPOUC tuang mei nunc ta tei bangh swna zay tat kan the.

¹⁸RINGHPOUC rui akhou sa e, “Guangh ta khatni Liammavpui ta guanghbamv khou rui key khang sa ti tho, kalam thu kaney tuang gay kanmei guangh pyrun kaney py khou rui key kan the.

¹⁹Juda tuang dihba khou naimei kaidai guay dingbin ngam the, meic gaanv khat na sini kaniw daeng khou guang dat nuh mak khe. Judamei maansei kaguayna ta rihnym tat ngam kan the.”

²⁰Jerusalemle, zauc lo! Zauczihmei dihpy thangc rui key pw the! nangniw rui zauclou khang tiiloumei maansei nunc tei tabui thangc tat kan thena cho, nangniw gaengh swna bammei nangniw tuang mei nunc tei?

²¹Nangniw rui nangniw champanv de twna ning bammei nunc tei rui nangniw ta kuakna nangniw ruc khou sin pwkhou nangniw tabui lat sa nina cho? Nangniw meicpui nah bam nimei kumc ryanra puni the.

²²Tabui swna hei guay hei nangniw khou patlou bam tu cho—nangniw tuang pheybaan siatkaekna nymna swzakclou bam tu cho twna nangniw rui thanv e thei, mi hei nangniw paapc geiclangvmei zaeng rui e.

²³Meicmiwmei Ethopiamei rui kagic mphwan dat nuh dina cho, alaih ni kahiak kalaic nuh dina cho? Hei tei nuh e thei thu simei hamhna ramh baihmei sw thay makna bammei nangniw ni nchumhmei taanc thay pwng e.

²⁴RINGHPOUC rui nangniw ta tazikramv mpwan rui napgung hunc ganh kumc zin phaklou puni the.

²⁵Mi hei nangniw ruc khou guanglou puni the twna RINGHPOUC rui sa e. Nangniw rui kata amuclouna nchumh makmei rav nunc ta lwm tat kanmei zaeng rui nangniw ruc khou mi hei taanclou khang kamei rui dinglou the.

²⁶RINGHPOUC kamei kahak rui nangniw tuang pheybaan kathangv gancna nangniw ta tizaklou puni the.

²⁷Kamei rui karaengmei taanv nangniw taanc bammei ta kamei how the. Nthahna meickai now ta suic bammei kumc, takuanhchic rui kanay thei lay kumc nangniw luanghbut luanghbut khou khatni ramvpuk khou rav baihmei thei lay bammei ta tei ai how the. Jerusalemmei nuncle, nangniw san si e dav! Nangniw tabui nungc rui nthan pat nina cho?