Read Rongmei Naga JEREMIA 14 Bible Online

JEREMIA 14 - Rongmei Naga bible

JEREMIA 14

¹Tingkaenghmei lam khou tei RINGHPOUC rui akhou kumna sa e;

²“Juda hei kapna bam the; katuang kaidai guay theic bam the, kamei guay kandih khou zipna zaengsi bam the, nkhavlou o twna Jerusalem rui kauc bam the.

³Lungcgaymei nunc rui kaniw bangc nunc ta dui laa khang thouclou the; tiki dui ariw mak khe; kaniw lairaeng zayna guang dat the. Ningmei guang tangh mak khe, swangmav maek khe, kaniw zaw nkamh the.

⁴Ting riu key makna kandih kangc ngam the, lau taanhmei nunc lungh ryanra the; kaniw zaw nkamh the.

⁵Ramvpuk khou asanh kui rui kanac ta ganclou the, binctulou khang ramh bwan maek khe.

⁶Nwmbangc kuanniam nunc chyng twan chyng twan khou asacsi nunc kumc kathiu hohona ding bam the; ndaapcna kamik sini rak ngam mak khe.

⁷Amei nunc rui akhou kumna kauc the, ‘Aniw paap rui aniw hei nkhuai e twna sa bam sini RINGHPOUCLE, nang latdyng theilayna aniw ta nkhavlou o. Aniw nang khou rui katupcna thei hanc the, aniw nang hu khou paapc taanc the.

⁸Isaraelmei rui lwmgaymei kiu nang na de; kamut kamai nimei khou rui aniw ta kanloumei kiu nang e. Nang tabui swna aniw kandic khou gin kumc bam tu cho, zingbangc zynw na bangvloumei gin kumcna?

⁹Tabui swna nang ramh sw la khang thay makmei kumc bam tu cho, nkhavlou ngam makmei rihmei kumcna? He RINGHPOUC, nang hei aniw pang khou bam bam de! Aniw hei nang tuang mei nunc de; aniw ta ganclou rio.’ ”

¹⁰RINGHPOUC rui mi mei nunc lam khou kumna sa e, “Kaniw akhou rui pak tat nii e, kaniw rana kaniw ta sinriap mak khe. Kumna ai kaniw ta pian mak khe. Kaniw rui taanc nkhuailoumei guay tei ai amuclou lak khe kumna kaniw tuang paap zaeng rui kaniw ta dandi tii puni the.”

¹¹RINGHPOUC rui akhou sa e, “Mi nunc ti hei nkhavlou khang akhou sa dat ri tho.

¹²Kaniw rui munthiangcna nkhavlou o twna kauc bam sini ai nkinglou lak ge; kaniw rui rawna khaengna khatni nap-bi katna kalum bam sini ai kaniw ta pianlou dat ni tuang hamh the. Ai rui kaniw ta suc-rih rui, nkow- ndaapcmei rui, khatni ravpyan rui swluai puni.”

¹³Khoutei ai rui sa the, “He Kauh Liangmei RINGHPOUC, muhzwng nunc rui meic nunc khou suc-rih ni nkow- ndaapcmei ni nai lak ge, mi kandic khou hei nchu-nzaenghna bam puni de twna RINGHPOUC tuang latdyng nai de twna sa bammei tei nang thay e.”

¹⁴RINGHPOUC rui kumna daw the, “Muhzwng nunc rui azanc khou saraamcna sa the; ai rui kaniw ta thouclou mak ge, ai rui kaniw ta sa o twna ni sa mak ge khatni kaniw khou lat akhat na sini salou mak ge. Kaniw rui sa bammei ndawman guay tei akhou rui guangmei tuang hamh e; kaniw tuang dinckasuakcmei tei kaniw tuang makumc nsa tuang rana de.

¹⁵RINGHPOUC ai rui thouclou mak sini azanc khou rui mi kandic khou hei suc-rih ni nkow-ndaapcmei ni guang ni tuang hamh e twna sa bammei muhzwng nunc ta tei suc-rih rui khatni nkow- ndaapcmei rui swluai puni the.

¹⁶Kaniw rui mi lat hei salou bammei nunc ta tei hei tei kumcna swluai muay puni. Kaniw pumc guay hei Jerusalem chaengluang chaengluang khou, ryloumei maekna ganclou bam puni. Mi hei kaniw nownac nunc khatni meic kaguayna khou patlou puni. Kaniw tuang simei phy tei ai rui tiilou puni the.”

¹⁷RINGHPOUC rui azaengsi tei meic nunc khou kumna salou o twna kumna sa e: “Ai zingbangc kalaanv mikdui aluan bam ni the, kap nthaekc zat makna kap bam ni the, amei nunc zam hei nthuk the, kaniw hei zamh kasicna zamh the.

¹⁸Ai ramvpuk khou tat pat pwkhou phouh rana how the, ai kaidai khou guang pwkhou ndaapcna theic bammei nunc ta how the. Muhzwng nunc ni amuh nunc ni kaniw taanv tat keyna bam e, tiki kaniw rui taanc bammei tei tabui cho twmei kaniw thay mak khe.”

¹⁹He RINGHPOUC, nang rui Juda ta ganc pat nthan thiakh thena cho? Nang Zaionmei nunc ta karaeng thena cho? Tabui swna tigay dat nuh mak biuc aniw ta tizamhlou bam tu cho? Nchu-nzaenghmei ta aniw machunh e, tiki ramh gaymei guang maek ge; tigaylou khang aniw lwmgayna bam e, tiki meicpingmei tuang guang hay hay the.

²⁰He RINGHPOUC, aniw nang ruc khou paapc taanc the; aniw rui aniw paap khatni aniw pupouc nunc paap kalauh the.

²¹Nang tuang latdyng guay tei ningtowlou o kumna aniw ta ganc patlou rio; Jerusalem ruc khou, nang tuang hymdaihmei guangcbamv naimei kaidai ruc khou zakmei tiguanglou rio. Aniw lev swloumei latdyng tei swbaklou rio.

²²Zaatc baihmei nunc tuang ravmaengc akhat na rui sini ting tii key ngam mak ge; tingpuk karana rui ni ting tiriu ngam mak ge. He RINGHPOUC aniw Racguangc, aniw nang khou lwmgay e, kalam thu mi guay hei nang rui tiiloumei tuang e.