Read Rongmei Naga JEREMIA 15 Bible Online

JEREMIA 15 - Rongmei Naga bible

JEREMIA 15

¹RINGHPOUC rui akhou sa e, “Mousi lev Samuel dingna akhou huaychana bam sini ai mi nunc ti hei zauc nzianlou dat lak khe. Kaniw ta nthau ganc tho; kaniw ta ahu khou rui titat kan tho.

²Kaniw tabui thangc tat nina cho twna nang khou thanv pw e thei ai rui kumna sa e twna kaniw khou kumna sa o: Gaanvsaekc rui ravpyan khou, Gaanvsaekc rui suc-rih khou, Gaanvsaekc rui nkow ndaapcna, theic puni Gaanvsaekc ta kangmei swna zay tat puni— kaniw tat nimei bamv kiu hei tei the!

³Kaniw ruc khou si kanmei padeih tiguanglou khang RINGHPOUC ai rui dinglou the: kaniw ta suc-rih rui swluai puni the; kaniw pumc tei si nunc rui zay tat puni the; kauh samhmei nruayna rui kaniw ta tu puni the, kumna nsaekcloumei tei khouringh nunc rui tu puni the.

⁴Hezekia nac mpouh Manase rui kamei Judamei guangc sw bammei douc Jerusalem khou taancloumei taanv zaeng rui kandihmei kaguay hu khou kaniw ruc khou meicpingmei lwn tipatlou puni the.”

⁵RINGHPOUC rui sa e, “Jerusalemmei nuncle, thow rui nangniw ta nzianlou nina cho, thow rui nangniw khang zaengsilou nina cho? thow rui ding thaekna nangniw akumh bam tu cho twna thanvlou punina cho?

⁶Nangniw rui ata gancpat the; akhou nangniw thei karihlou the. Kumhpui zaeng rui abaancpwam ntyng patna nangniw ta sw katupc tuaylou puni the, alungpuam ta ai khaam liat lak khe.

⁷Mi kandic tuang namvdai kathuic khou ai rui nangniw ta napgung ta kumc mpwan khou phaic ku the. Nangniw simei taanc nthaekc makmei zaeng rui amei nuncle, ai rui nangniw ta swmutlou the, ai rui nangniw nac nunc ta swluai the.

⁸Nangniw kandic khou maypui rui duipui syniang suangc geic puni the. Ai rui chabwan nunc ta karin gay khou swluai the, kumna pui nunc ta tiryanralou the. Thay mak daek khou kaniw khou ryanra pingmei tiguang the.

⁹Kanac gaanv chanei puanhmei pui tei, thiusaengc zayna theic key the. Kakhang tei zingbangc mbaih the; kamei zak the khatni kalung kabiu the. Ringcna bammei nunc ta ni zauczihmei nunc rui swluai puni. RINGHPOUC ai rui samei tuang e.”

¹⁰Ai hei san simei e dav! Tabui khang apui rui ata kandih khou puanc keylou tu cho? Meic kathuicna ta agay agina tat bammei hei! Ai rui syandui tipou mak ge, meickai pow ni phungh mak ge; kumsini meic kathuicna rui ata siang bam e.

¹¹He RINGHPOUC, ai nang siamruai sw chuy mak bam khwan e thei, ata zauczihmei nunc kaniw ryanra ryanriuna bammei ganv khou ai rui kaniw khang huaychalou mak khwan e thei kaniw syang tei aruc khou keylou kan di tho.

¹²(Meic gaanv khat na sini ntanh ta riam bau ngam mak ge, tanzinc kariumei dihpy thangc tuang ntanh ta.)

¹³RINGHPOUC rui akhou sa e, “Amei nunc rui kandih kapwm khou taanc bammei paap zaeng rui kaniw ta riap puni the. Kaniw tuang lanv khatni khiukhingh guay phungc tat kan khang ai rui zauczihmei ta thouc guang puni the.

¹⁴Kaniw thay zat makmei kandic khou ai rui kaniw ta zauczihmei nunc bangc tiswlou puni the, kalam thu alungpuam hei mai kumc the, mi hei amit dat ni tuang hamh the.”

¹⁵Khoutei ai rui sa the, “He RINGHPOUC, nang rui thay e. Ata ningtowlouna nkhavlou o. Ata rai bammei nunc ti hei ata tina khwm khangclou o. Nang heikumna akhaengv saengc bam khou rui kaniw rui ata swluailou rio. Nang zaeng khang rui ata tizak bam tuang e twmei ningtowlou o.

¹⁶Nang rui akhou samei lat tei latkaeng kathuicna nking e. He Ngamparymei RINGHPOUC Ravguangc, ai hei nang tuang e; kumna nang lat rui alung khou neihla zaenggaymei tipadik the.

¹⁷Ai hei meic nunc lev bam kariuna nuicna kaganv swmaan mak ge. Nang lat piuna arana bamna lungpuamhmei rui padikna bam e.

¹⁸Tabui zaeng rui ai heikumna ryanrana bam tu cho? Azam guay hei gay dat ngam mak tu cho? Tabui swna tigaylou dat mak tu cho? Lauphwnswan duithuak kumcna phui ngamna ningmei guang tangh makna bam khang nang rui swlou thena cho?”

¹⁹RINGHPOUC rui daw e, “Nang rui hanc guang dat pw e thei, ai rui laalou dat puni, kumna asiamruaimei sw dat puni. Kabah maekmei lat tei sa bammei phaan kabah naimei lat tei nang dinc ndauh dat re thei nang atuang muhzwng sw dat puni. Meic nunc rui nang khou guang dat puni, nang kaniw khou tat bam khang kage maek ge.

²⁰Ai rui nang ta kaniw khang tanhmei tanzinc tuang raengh kumc lou puni. Kaniw rui nang ta adow bam sini, kaniw rui nang ta ngam dat pw lak khe. Ai rui nang ta gaeklou puni kumna tikabiu kabaenglou lak ge.

²¹Ai rui nang ta meicsimei, sw kasic karouc nimei nunc baanc khou rui gulou puni. RINGHPOUC ai rui sa the.”