Read Rongmei Naga JEREMIA 16 Bible Online

JEREMIA 16 - Rongmei Naga bible

JEREMIA 16

¹RINGHPOUC rui akhou sa dat re,

²“Mi kumhmei bamv khou hei nang now kawna nang tunapuan puancna bam lak nina e.

³Hei khou puanhmei nac nunc khatni kaniw puipu khou tabui guanglou puni.

⁴Kaniw tei siroucmei ravpyan guangna theic puni, meic gaanv khat na rui sini kaniw khang kaplou lak ge khatni kaniw ta mbeihlou lak ge. Kaniw pumc tei chaba khwan kumcna ganclou puni. Kaniw tei suc-rih mun khou hamh e thei nkow ndaapcna theic puni, kumna kaniw pumc tei nruay thauruay khatni nwmbangc khouringc nunc taek sw puni.

⁵“Zaengsina kap bammei kai khou nang gutlou lak nina e. Meic gaanv khat na khang sini zaengsilou lak nina e. Ai rui amei nunc khang nchu-nzaenghmei suaihiam tiilou dat lak khe khatni kaniw ta zauc nzianlou dat lak khe twna RINGHPOUC rui sa e.

⁶Lungcsimei ni lungcgaymei ni theic puni the, tiki kaniw khang meic gaanv khat na rui sini kaplou lak ge, meic gaanv khat na rui sini kaniw ta mbeihlou lak ge. Meic gaanv khat na sini zaengsina kapy guatna khatni karana kata kazam kazei swpatna huaylou lak ge.

⁷Theic-suhmei kai khou tuzangv nchamcna swmlou khang meic nai dat ni tuang hamh the. Kapui kapu theic kanmei nunc khang nganvna nzianmei lyanlou nimei meic nai dat ni tuang hamh the.

⁸“Khumngai kai khou tatlou lak nina e. Kaniw lev dungc keyna tuzangv kariu bam lak nina e.

⁹Ngamparymei RINGHPOUC, Isaraelmei Racguangc ai rui samei hei nking o. Neihla zaenggaymei khwan guay, nownah laaguangmei tuang neihlamei khumngai khwan guay tei tichulou dat ni tuang hamh the. Mi khou lungc bammei maansei guay hei mi hei patloumei ta how puni the.

¹⁰“Nang rui mi guay hei kaniw khou dinclou pwkhou, tabui swna ai rui heidi sina kaniw ta riap ni the twna dinglou bam tu cho twna kaniw rui thanv puni. Tabui tuang nkhuai mbamei taanv kaniw taanclou kan thena cho, RINGHPOUC kaniw Racguangc ruc khou tabui paap taanclou thena cho twna kaniw rui thanv puni.

¹¹Kum pw e thei RINGHPOUC rui heikumna sa e twna kaniw khou kumna sa tio, ‘nangniw pupouc nunc rui ata ganclouna rav baih baihmei ta kalum tat kan the. Kaniw ata ganclouna alatdyn guay piu makna tat kan the.

¹²Tiki nangniw hei kaniw suangc sini simei taanv taanc the. Nangniw meic guayna nangniw nu tanc the khatni si the, kumna nangniw alat piu mak khe.

¹³Kumhpui zaeng rui nangniw ni nangniw pupouc nunc ni thay zat makmei kandic thangc ai rui nangniw ta ganc patlou puni the. Khoutei nangniw zingbangc kalaanv rav baih baihmei siamruai swna bam puni the. Kumna ai rui nangniw ta zauc nzianlou dat ni tuang hamh the.’ ”

¹⁴RINGHPOUC rui sa e, “Meic nunc rui latdyng sw khou ata ‘Isaraelmei ta Izip khou rui nduangh patloumeipu ringhmei Racguangc’ twna saanc taan puni the.

¹⁵Mi phaan tei ata Isaraelmei ta dihpy ramv kandic khou rui khatni kaniw ta ai rui zinphakloumei kandic guay khou rui nduangh guanglou datmei ringhmei Racguangc twna saanc dat puni the. Ai rui kaniw pupouc khang tiiloumei, kaniw tuang kandic khou kaniw ta nduangh guanglou dat puni the. RINGHPOUC, ai rui sa the.”

¹⁶RINGHPOUC rui sa e, “Ai rui khav nymmei mpeyna thouc guangna mi mei nunc ti hei tinym puni the. Kumna ai rui khouringh alaymei nunc thouc guangna kaniw chyngbut khou, luanghbut khou, khowlang khou, khowtauh ramv khou kaniw ta khouringh alay kumc alay puni the.

¹⁷Kaniw tuang taanv guay tei ai how e. A khou rui ramh akhat na sini nkamhmei tuang maek ge; kaniw tuang paap tei amikzaw khou rui duak dat ngam mak khe.

¹⁸Kaniw tuang paap khatni simei khang tei kadam kanei khangclou puni, kalam thu kaniw tuang theihmei ravmaengc nunc tei rui akandih sw tanac the, kumna mi kandic hei nchumh makmei ravmaengc rui padik the.”

¹⁹He RINGHPOUC, nang hei ata gaekloumeipu khatni pumtan tiiloumeipu e; ryanramei ganv khou nang rui ata nkhavlou e. Zaatc nunc rui kandih tintou thangc rui guangna kumna sa puni, “Aniu pupouc nunc rav tei thu nchumh makmei rav nunc dyng e, nsa tuang ravmaengc nunc dyng e.

²⁰Maansei rui kakhang rav kasiamh nuh dina cho? Ngam mak ge, kaniw rui kasiamh bam sini hei tei rav changc hamh e.”

²¹RINGHPOUC rui sa e, “Hei zaeng rui, ai rui zaatc nunc khou apumtan khatni angamv lyanlou puni the; ai hei RINGHPOUC e twmei kaniw thay puni the.”