Read Rongmei Naga JEREMIA 17 Bible Online

JEREMIA 17 - Rongmei Naga bible

JEREMIA 17

¹RINGHPOUC rui sa e, “Judameile, nangniw tuang paap tei ntanh rui hylou kan the; tanhmei hira twan rui nangniw lungthw khou hianna hylou the khatni nangniw tuang ravchapaeng guay khou hylou the.

²Thingbang bangc kathuic khou chyngtwan chyngtwan khou, luanghbut luanghbut khou khatni ramvpuk khou Ashera ravpui tuang ravchapaeng khatni mi tuang ravmaengc lingclouna nangniw kalum the.

³Nangniw rui mi kandic kapwm khou taancna bammei paap guay zaeng rui nangniw tuang lanv khatni khiukhingh guay tei zauczihmei nunc ta tilaa puni the.

⁴Ai rui nangniw khang tiiloumei ramv tei nangniw mpatlouna nangniw thayhow zat makmei kandic thangc nangniw tatna nangniw ta zauczihmei nunc bangc tisw puni the, kalam thu alungpuam hei mai kumc the, mi hei amit dat ni tuang hamh the.”

⁵RINGHPOUC rui sa e, “Akhou rui tat patna maansei khou, maansei tuang pumtan khou lwmlou bampui mei ta tei ai rui sianglou puni the.

⁶Kamei tei kanghmei dihkaengv khou, ramh thau makmei ntey ramv khou thau bammei thingphwam kumc puni the. Kakhou tei ramh gaymei tabui nungcna sini pat lak khe.

⁷“RINGHPOUC khou lwmloupui mei khatni kakhou rigwnmei naipui mei tei sangaymei e.

⁸Kamei hei duibaek daeng khou thauna kamaan dui zangc tangcna bammei thingbang kumc puni. Hei tei suhmei ganv ta ni ping mak ge, kanwang ndiakc tan bam puni; tingdui key makmei khang ni lungh geic lak ge; kathai nthai tan bam puni.

⁹“Maanseina lungning hei guatmei rui padikmei khatni kanganv tangcna simei ti hei thow rui thay ngam ni cho?

¹⁰RINGHPOUC ai rui maansei nunc lungning ta kathai e, maansei nunc lung ta nchanv e. Meic kathuicna ta kamei kamei lungc bammei khatni taanc bammei theilayna ai rui kaphy tii e.”

¹¹Mphuamna syandui laa bammei nunc tei kamei rui nduihlou makmei duy bwm kak patmei nruayna nac kumh tuang e. Kapanty karin gay khou kalanv guay tei amaan puni, kumna nkhamh khou kamei mpangmei sw puni.

¹²Aniu tuang Ravkai hei katik kagunc daihmei guangc bamvpaeng kumh tuang e. Thaurey na khou rui mi hei chyng kauhmei ruc khou dingna bam e.

¹³He RINGHPOUC, nang hei Isaraelmei rui lwmgay bammei kiu the; nang ta mpatlouna tatmei guay tei thu zak puni. Kaniw tei sypung khou zanh hyloumei kumcna amaan puni, kalam thu kaniw rui ringhmei duipuakckai RINGHPOUC nang ta mpatlou the.

¹⁴He RINGHPOUC, ata tigaylou o, kum e thei ai gay nthan thiakh puni the; ata kan patlou o, kum e thei ai giuga tuang nai dat lak khe. Nang hei ai thuanc bammeipu kiu e!

¹⁵“RINGHPOUC rui aniu ruc khou ryanramei tiguang puni twna sa bammei kiu tabui thangc tha? Mi guay kiu kamei rui ntaw tiguang pw di tho!” twna meic nunc rui akhou sana bam the.

¹⁶Tiki, He RINGHPOUC, kaniw ruc khou swkamut kamaimei tiguanglou khang ai sa mak ge; kaniw ruc khou ryanra ryanriumei tikeylou pwmei ta ai kahaw mak ge. He RINGHPOUC, mi guay hei nang rui thay e; ai rui sa kanmei tei nang thay e.

¹⁷Nang rui ata tipinglou rio; ryanramei ganv khou nang hei duploupui bamv e.

¹⁸He RINGHPOUC, ata rairiu bammei nunc ta tizaklou o, tiki ata thu kanlou o. Kaniw khou pingmei tipadiklou o, tiki ata thu tipinglou rio. Kaniw ruc khou swkamut kamaimei tiguangna kaniw ta swpuat paruatlou o.

¹⁹RINGHPOUC rui akhou sa e, “Jeremiale, Juda tuang guangc nunc tat pat tat gut bammei Kandihmei tuang Raengckat khou tei tatna alat hei kauc ndauhlou o, mi tangv tei Jerusalem tuang baih baihmei raengckat guay khou tei ni tat ro.

²⁰Ai rui samei hei Juda tuang guangc nunc, Judamei nunc khatni Jerusalem khou bammei meic katana khatni mi tuang raengckat guay khou tei tat bammei guay ta tei nking o twna sa o.

²¹Kumna sa tio twmei thu nang panty khang rui ramh thay o Sabbathneic kaniw puat phungc lak nina e; mi nungc hei Jerusalem tuang raengckat guay khou rui puatc phungc gut nuh mak ge

²²khatni kaniw kai khou rui ramhkhat na sini phungc pat nuh mak ge. Ai rui nangniw pupouc nunc khou latdanv swna saloumei kumcna Sabbathneic taanvtaanc nuh mak ge; mi tingmik hei nthanmei tingmik swna ngaek nina e.

²³Kaniw pupouc nunc tei samei tei nkinglou mak ge tiki mi phaan kaniw nu tanc the; kumna kaniw alat piu mak khe khatni ai rui nchamloumei ta thay zat mak khe.

²⁴“Kaniw hei alatdanv kaguayna piu nina de twna kaniw khou sa tio. Kaniw Sabbathneic Jerusalem tuang raengckat khou rui puatc akhat na sini phungc gut nuh mak ge. Kaniw mi nungc hei nthanmei tingmik swna ngaek nina e kumna mi nungc hei taanv khat na sini taanc nuh mak ge.

²⁵Kum pw e thei kaniw guangh nunc khatni guangh nac nunc Jerusalem raengckat guay khou rui gut bam puni kumna Guangh David khou naimei guangh ngamv tei kaniw khou nai puni. Juda khatni Jerusalemmei nunc lev twna kaniw takuanh gari khatni takuanh tuangc puni.

²⁶Meic nunc tei Juda tuang kaidai guay khou rui khatni Jerusalem daeng khou naimei namv guay khou rui guang puni; kaniw tei Benjamin ramv, chyngphay ramv, chyngramv khou rui khatni Juda tuang dihba ramv khou rui guang puni. Kaniw rui guangna atuang Ravkai khou khaengmei zaat guay rawna khaengmei, nap-bi katmei, agaw katmei, khatni thuanckumei puatkat guay hei ntanghna guangna khaeng puni.

²⁷Tiki kaniw alat piu nina e kumna Sabbathneic hei nthanmei tingmik swna ngaek nina e. Mi nungc hei kaniw Jerusalem tuang raengcmun khou rui puatc phungc gut nuh mak ge, kaniw hei tei liam pw e thei ai rui Jerusalem tuang raengcmun guay mai ntei puni. Jerusalem tuang guangckai tei mai raw puni, kumna hei tei meic gaanv khat na rui sini swmit dat ngam lak khe.