Read Rongmei Naga JEREMIA 18 Bible Online

JEREMIA 18 - Rongmei Naga bible

JEREMIA 18

¹“Jeremia khou RINGHPOUC lat guang khwan e.

²Lai kasiamhmei kai thangc tei key o; hei khou tei ai rui lat sa puni,” twna RINGHPOUC rui akhou sa the.

³Ai khou tei key the kumna lai kasiamhmeipu rui katuang kapinhmei haengv khou louna kapinhna taanc bammei ta how the.

⁴Lai khang taanc bammei tei kasic ti thei kamei rui hei tei baihmei lai akhat khang kasiamh dat the.

⁵Khoutei RINGHPOUC rui akhou sa the,

⁶“Lai kasiamhmeipu rui katuang gambic ta kamei rui sw niimei thiak khou sw bammei kumcna ai rui ni Isaraelmei ta sw khang angamv maekna cho? Gambic tei lai taanhmeipu baanc khou naimei kumcna nangniw ni abaanc khou nai e.

⁷Tabui bui ganv khou pwni zaatc akhat ta hamh e thei guangh akhat ta phuai ganc puni the, sw bak key puni the, hamh e thei sw kamut kamai puni the twna sa pwkhou,

⁸mi zaat tei kaniw tuang simei khou rui lunghlaic guang dat re thei ai samei tei ai taanc ni tuang hamh e.

⁹Hei tei kumc muayna zaatc akhat hamh e thei guangh akhat ta ai rui lingclou puni the hamh e thei kasiamh thau puni the twna salou sini,

¹⁰mi zaat tei rui alat piu makna simei taanv taanc tat re thei, ai rui taanc ni twna saloumei tei ai taanclou ni tuang hamh e.

¹¹Kumhpui zaeng rui ntaw, ai rui Judamei khatni Jerusalemmei nunc ruc khou riapmei tiguang khang swlou bammei tei kaniw khou salou tiu. Kaniw rui paapc tuang panty khou lungc bammei khou tei rui kalaic pat khang—kaniw tuang panty khatni kaniw tuang taanv guay tei kalaih khang kaniw khou sa tio.

¹²‘Aniw kalaic lak ge, tabui swna kalaic bam nina cho? Aniw rui kahawmei theilayna aniw nu tanc bam kan ni de,’ twna kaniw daw puni.”

¹³RINGHPOUC rui sa e, “Isaraelmei nunc rui si kanmei taanv taanc the! Hei kumhmei hei pat kanmei tuang nai bu ny zaatc kathuicna khou thanv zauc o.

¹⁴Lebanon chyng twan hei gunh maekna bammei ganv nai bu cho? Mi chingcbut tuang nchumei duithuak guay tei thipmei ganv nai bu cho?

¹⁵Tiki amei nunc rui ata amuclou the; kaniw ravmaengc nunc khou agaw ntei the. Kaniw tat nimei chaeng khou tat mak khe, kaniw ningmei reynungc chaeng khou tat kan the; nchumhmei chaeng khou tat mak khe.

¹⁶Kaniw rui mi kandic ti hei meicpingmei lwn tipatlou the, tingsaengzaeng malamei bamv tiswlou the. Khoutei tat ruanloumei guay rui mi tei howna hahlahla puni the; kaniw ngakna kaniw zaw puanc nthei karihlou puni the.

¹⁷Neihpat pwan rui mbut hunh kumc hunc ganh khang ai rui amei nunc ta kaniw ta zauczihmei nunc hu khou zin phaklou puni the. Ai rui kaniw khou athei karihlou puni the; kamut kamaimei guangpui ganv khou ai kaniw ta nkhavlou lak ge.”

¹⁸Khoutei meic nunc rui kumna sa the, “Aniu Jeremia lam khou ramhkhat sw di kho! Aniu ta nchamlou khang amuh nunc, chaengzaylou khang ningtyngmei nunc khatni Ravguangc lat dinclou khang muhzwng nunc nai tanh tan bam puni de. Aniu karuc khou ramhkhat taanc di kho kumna kamei samei tei nking taan di kho.”

¹⁹Kumhpui zaeng rui ai kumna kalum the, “He RINGHPOUC, ai rui sa bammei hei chulou o kumna alam khou ata zauczihmei nunc rui sa bammei hei nkinglou o.

²⁰Gaymei khang simei khangcloumei cha dina cho? Tiki ai taek keylou khang kaniw rui kwam chaulou the. Nang rui kaniw ta lunghpuamcna riaplou mak khang ai rui nang khou guangna akumhna sa kan tu cho twmei ningtowlou o.

²¹Tiki He RINGHPOUC, kaniw nac nunc ndaapcna theic kan di tho; kaniw tei suc-rih mun khou theic kan di tho. Meicpui nunc tei kaniw gaanv nac nunc mak kan di tho; nggaanvmei nunc tei ravpyan khou theic ngam kan di tho khatni chabwan nunc ta rihbamv khou swluai ngam kan di tho.

²²Mang kumna meic pang guangna kaniw kai kwam laa ngam khang thouclou o; kaniw pingna kap kan diu. Kaniw rui akhang kwam chaulou the khatni akhang phah zawlou the.

²³Tiki, He RINGHPOUC, ata swluai khang kaniw rui nkamhna sw bammei guay tei nang thay e. Kaniw tuang simei guay tei amuclou rio, kaniw paap ni kuaklou rio. Kaniw ta zaw tisilouna phaic keylou o kumna nang lungpuam khou kaniw ta riaplou o.”