Read Rongmei Naga JEREMIA 19 Bible Online

JEREMIA 19 - Rongmei Naga bible

JEREMIA 19

¹RINGHPOUC rui sa e nianglai liu o, gaanvthaih nunc khatni amuh nunc gaanvsaekcta nduanghna

²Hinnom nzaengc khou tei key tho kumna Laikiak Raengckat thangc tei tat tho. Mi bamv thangc tei tatna ai rui dincloumei lat guay tei kauc ndauh tho.

³Heikumna sa o twna kamei rui akhou sa the, “Judamei guangc nunc khatni Jerusalemmei nuncle, Ngamparymei RINGHPOUC, Isaraelmei Racguangc ai rui samei tei nking o. Chuloumei kathuic rui chu ruph rup nimei tuang swkamut kamaimei ai rui mi bamv khou hei tiguang puni the.

⁴Meic nunc rui ata ganclouna kaniw ni kaniw pupouc nunc ni, Juda tuang guangc nunc nganvna thay bam makmei rav nunc khang khaengna mi bamv hei swtanac bammei zaeng rui mi hei ai rui taanc puni the. Kaniw rui mi bamv khou hei kakhuay maekmei nunc zei tikey padiklou the,

⁵khatni kaniw rui Baal rav khang ravchabamv kasiamh thaulouna kaniw nac nunc ta rawna khaeng the. Mi hei taanc o twna kaniw khou ai latdanv khat na sini tii mak ge; mi hei ai tabui nungc na sini kakhanh pat mak ge.

⁶Mi bamv zanc hei Tophet hamh e thei Hinnom Nzaengc twna kaw taan nimei ganv guang pw the. Mi bamv zanc hei Dowluaimei Nzaengc twna kaw dat puni the.

⁷Mi bamv khou hei ai rui Judamei khatni Jerusalemmei tuang taanv raeng guay tei tiguang tangclou mak puni the. Ai rui kaniw ta zauczihmei nunc ta kaniw ruc khou rih tingamlou puni the kumna rihbamv khou swluai puni the. Ai rui kaniw pumc tei nruay khatni moucphow khatni nwmbangc khouringc taek khang tii puni the.

⁸Ai rui heidikamv simei kamut kamaimei mi kaidai ruc khou tiguang puni the kumna tatruanloumei kathuic rui howna ngak sakh sak bam puni the.

⁹Zauczihmei rui mi kaidai ti hei dingbinna meic nunc ta tei swluai khang sw puni the. Kaniw ta dingbinmei tei heidikamv ranv langv tina kaidai lungc khou bammei nunc tei kaniw khat khat zanc tu puni the kumna kaniw nac nunc ta nganvna tu puni the.”

¹⁰Nang rui nduangh patmei nunc hu khou tei mi lai tei bai bak tho.

¹¹Kumna kaniw khou sa tho twna RINGHPOUC rui sa the. “Ai rui mi mei nunc ta khatni mi kaidai ti hei bai baklou puni the kumna kaniw hei kasiamh dat nuh makmei mi lai hei kumc puni the. Meic nunc rui theihmei nunc ta Tophet khou nganvna phuplou puni the kalam thu kaniw ta phuplou khang kabamv baihmei nai dat lak khe.

¹²Ai rui mi kaidai khatni mi khou bammei nunc ta Tophet ta kumc tiswlou puni the.

¹³Jerusalem tuang kai guay, Juda tuang guangc nunc tuang kai guay, khatni kaniw kainam khou gaanchuangcna khang agaw ntei bammei khatni rav baih baihmei ta zouhpaanv keyna kalum bammei kai guay tei Tophet nthan makmei kumc puni the.”

¹⁴Mi tangv tei rui RINGHPOUC ata kalat guangna dinclou o twna samei bamv Tophet khou tei rui ai tat dat the. Kumna ai Ravkai lungc khou guangna, Isaraelmei Racguangc rui sa o twmei lat tei dingthauna meic nunc khou kumna sa the,

¹⁵“Ai rui tiguang puni twna sa kanmei dandi guay tei mi kaidai khatni mi daeng khou naimei kaidai guay khou tiguang puni the, kalam thu nangniw nu tanc the kumna ai rui samei tei nkinglou mak khe.”