Read Rongmei Naga JEREMIA 2 Bible Online

JEREMIA 2 - Rongmei Naga bible

JEREMIA 2

¹RINGHPOUC rui akhou sa the:

²mi lat hei Jerusalem khou bammei meic kathuicna khou sa o, “Nang alauc bammei douc tei nang adihkamv lwmnuhmei swbam khwan cho; reynungc tei nang ata adih nzian bam khwan cho twmei ai ningtow e; tazikramv khou, phunling phunlu lingc key makmei ramv khou athei lay tat bam khwan e.

³Isaraelmei nang hei atuang nareimei sw bam khwan e; nang hei atuang nthanmei mei sw bam khwan e. Nang ta swkasicmei nunc ta ai rui tiryanra bam khwan e khatni swkamut kamai bam khwan e. RINGHPOUC, ai rui mi hei samei tuang the.”

⁴RINGHPOUC tuang lat hei nking o, Jakob kikta nuncle, Isaraelmei kaikhwangmei nuncle.

⁵RINGHPOUC rui sa e: “Nangniw pupouc nunc rui aruc khou tabui khuay phu patna cho? Tabui zaeng rui kaniw akhou rui ducna tat kan tu cho? Kaniw gaeng makmei ravmaengc nunc ta kalumna kaniw tei gaeng makpui mei nunc sw the.

⁶Ai rui kaniw ta Izip khou rui zay kaanpatlouna, theic maan swmaan nuhmei ramv meic lungh makmei, ngginmei nunc nganvna tatlou makmei tazikramv khou zay kaanlou tisini kaniw ata thouh sw mak ge.

⁷Ai rui kaniw ta ramv gaymei kandic khou phungc guanglouna, mi kandic tuang phunling khatni nap-bi titu-tizangvlou the, tiki kaniw rui atuang kandic ta sw kasic the, ai rui kaniw khang tiiloumei kandic ta swtanac the.

⁸Amuh nunc rui ata phu mak khe, atuang amuc nunc rui ata thay mak khe. Dihsinpouc nunc rui alat liamna paapc sw the; muhzwng nunc rui Baal zanc khou lat dinc the, kumna nsa racmaengc nunc ta kalum the.

⁹“Kumhpui zaeng rui, RINGHPOUC ai rui amei nunc tuang khuay kalauh dat puni. Nangniw kikta guay khou khuay mphunlou puni.

¹⁰Neihkey thangc Saipras kandic thangc tei zauc o, neihpat thangc Kedar kandic thangc meic thouclouna zauc o, mi kumhmei hei pat kanmei ta nangniw how pw lak ge.

¹¹Zaatc baihmei akhat na sini kaniw rav tei kaling hamh sini kaniw tuang rav kalaic bam zat kan mak ge. Tiki amei nunc rui thu kaniw ta tichingkhiuhloumei Ravguangc ata ganclouna kaniw khang ramhkhat na sini swlou makmei rav ta laa kan the.

¹²Pingna kadunh khang, charynna hahlahla khang ai rui tingpuk khou latdanv tii the.

¹³Kalam thu amei nunc rui paapc kanei taanc the: kaniw rui duithan duipuakckai ata ganclouna, dui chungc nuh makmei bakmei duikuak kasiamh the.

¹⁴“Isaraelmei hei bangh hamh e; kamei hei bangh swna puancloumei tuang hamh e. Kum e thei tabui swna zauczihmei nunc rui kata khouringh alay kumc alay bam tu cho?

¹⁵Kaniw rui kamangliangpui kumcna kata nin the; kaniw rui kakandih ta meic lungc taanmei kandic tiswlou the, kumna katuang kaidai guay tei meic lungctaekna, kasic karoucna ganclou the.

¹⁶Ngguay, Memphismei khatni Tahpanhesmei rui Isaraelmei pyrou bai bak the.

¹⁷He Isaraelmei, mi hei nang rui nang ruc khou tiguangmei tuang de. Ai rui nang ta chaengzaylouna tat bam khou, RINGHPOUC nang Racguangc ata nang rui ganclou the.

¹⁸Nail dui zangv dat khang Izip thangc key datmei rui nang khang tabui tuang gaeng puni twna cho? Euphratis dui zangv khang Asiria thangc tatmei rui nang khang tabui gaeng puni twna ningna cho?

¹⁹Nang tuang simei tei rui nang rana nang ta dandi tii puni the, nang ata ganclouna tatmei khuay nang ruc khou keylou puni the. RINGHPOUC, nang Racguangc khou bam ntipna bam makna, ata ganclouna tatmei hei adih si cho khatni nkhuai cho twmei nang thay puni the. Kauh Liangmei Ngamparymei RINGHPOUC ai rui mi hei samei tuang the.”

²⁰Kauh Liangmei RINGHPOUC rui sa e, “He Isaraelmei, reynungc nangniw abangc khou bam zihna; nangniw alat piu zihna khatni ata kalum zihna luanghbut kauh kauhmei ruc khou khatni ndiakcmei thingbang bangc khou nangniw nap-bi rav nunc ta kalumna nthah boulahmei taanv taanc the.

²¹Ai rui nangniw ta gay liangmei phwn khou rui nruamh satloumei drakha luai swna lingclou the, tiki ntaw nangniw tabui kumh tha zauc tho. Nangniw hei ntaw thu tamhmei gaeng makmei drakhaluai di the.

²²Nangniw tanc liangmei sabuan rui khiu geic bam sini nangniw tuang tanacmei tei ai howna bam de.

²³Nangniw rui nangniw ta sw mphuam mak ge, nangniw Baal ta kalum mak ge twna akumhna sa diwna cho. Nzaengc baek khou nangniw akumhna paapc taanc kan tu cho twmei zauc o; nangniw tabui taanc kan tu cho twmei kakhanh o. Nangniw hei kachic nduangh niina tazikramv khou saeng bammei nwmbangc guaikuan kumc the.

²⁴Hei kumhmei ganv khou tei thow rui kata tei khaamv dat ngam kan thena cho? Kachic rui kata phu khang kungc dat kan mak khe; kaganv kathuicna nkhwanna bam the.

²⁵Isaraelmeile, rav baihmei ta alayna nangniw phay gic pak luap ngam tat bam riu, nangniw ruak pak phui ngam tat bam riu, twna sa tikhou ‘Aniw hanc guang dat ngam mak khe. Aniw rav baihmei nunc ta nzianna di the, aniw mi nunc thei tei suic tat kan nina di the,’ twna nangniw sa kan the.”

²⁶RINGHPOUC rui sa e, “Kaihouhmei ta nymtow pwkhou zak kanmei tei kumcna Isaraelmei nangniw meic guayna guangh ni, saengcdaihmei nunc ni, amuh nunc ni, muhzwng nunc ni zak puni the.

²⁷Thingbang hei apu e, taudaic hei apui e twna sa bammei nangniw zak puni the. Nangniw akhou karih guangmei phaan akhou rui karih nthei tat kanmei zaeng rui mi hei guang puni the. Tiki ryanramei ganv khou thu kanlou o twna ney e.

²⁸“Nangniw rui nangniw khang kasiamhloumei rav nunc tei tabui thangc tat kan thena cho? Nangniw ryanramei ganv khou mi nunc tei rui nangniw ta kanlou kan di tho. Judale, nangniw tuang kaidai geihmei zu nangniw tuang rav nai dyng the cho!

²⁹Nangniw khang pian makmei kiu tabui tei cho? Tabui swna nangniw ata liam bam cho?

³⁰Ai rui nangniw ta riap be, tiki hei tei rui gaengmei tuang maek ge; nangniw kalaih mak ge. Kanin simei kamangliangpui kumcna nangniw rui nangniw tuang muhzwng nunc ta swluai the.

³¹Isaraelmeile, ai rui sa bammei hei nking o. Ai hei nangniw khang zinghmei, theic-suc nuhmei ramv, tazikramv kumc the na cho? Kum mak ge thei tabui swna akhou hanc guang dat lak khe, nangniw sw nii niimei thak sw tat kan ni the twna sa bam tu cho?

³²Tunac rui katuang ntuh-ntah piu amuc dina cho hamh e thei chamypeic rui katuang nowsuanh pwan karuh amuc dina cho? Tiki amei nunc rui thu tingmik kasing chak dat thay lakmei zu ata amuclouna tat kan the.

³³Nzianmeipu nunc ta lay nzwanmei thak nangniw thay dyng the. Meicsi nganvmeipui nunc rui nganvna nangniw thak tei nchamc the.

³⁴Nangniw tuang pheybaan tei nkhuaimei nunc zei hamhna lungcsi lungcroucmei kakhuay maekmei nunc zei rui swtanac the. “Heikum bam takhaanvna,

³⁵‘Aniw khuay maek ge, RINGHPOUC rui aniw ruc khou lunghpuamc bammei tuang maek ge,’ twna nangniw sa e. Nangniw paapc taanc the twmei nangniw nuh makmei zaeng ruina RINGHPOUC, ai rui nangniw ta dandi tii puni the.

³⁶Zaatc baihmei tuang rav nunc khou tei nangniw ta ti-malalou the. Asiriamei rui nangniw ningmei tei tiguang tangclou kan makmei tei kumcna Izipmei rui ni nangniw ningmei tei tiguang tangclou mak puni the.

³⁷Zakcna nangniw zaw sow nkhumna nangniw Izip khou rui karih pat dat puni the. Nangniw rui lwm bammei nunc ta tei RINGHPOUC, ai rui ganc pat kan the; kaniw khou rui nangniw ramh gaengmei laatow dat pw lak khe.”