Read Rongmei Naga JEREMIA 20 Bible Online

JEREMIA 20 - Rongmei Naga bible

JEREMIA 20

¹Immer rui puanhmei amuh Pashhur, Ravkai khou tei kapy swmeipu rui ai rui mi guay hei sa bammei ta chu lana

²ata baina kangriang rui nta lana Ravkai khou karucmei Benjamin Raengckat daeng khou bangclou o twna latdanv dan pat the.

³Nthuanh thauna Pashhur rui ata kanglou bammei khou tei rui riclou dat pwkhou ai rui kakhou heikumna sa the, “RINGHPOUC rui nang zanc Pashhur twna kaw mak ge. Kamei rui nang khang tiiloumei zanc thu ‘kabamv kathuicna khou pingmei,’ twmei tuang de.

⁴RINGHPOUC kamei kahak rui kumna sa the, ‘Ai rui nang ta khatni nang pammei nunc ta tipinglou puni the. Kumna zauczihmei nunc tuang buy-baeng rui kaniw kaguayna ta swluai bammei ta nang how puni the. Ai rui Judamei guayna ta Babilonmei guangc bangc khou lou puni the; kamei rui meic gaanvsaekc ta kangmei swna kakandic thangc zay tat puni the khatni gaanvsaekc ta swluai puni the.

⁵Ai rui mi kaidai tuang lanv, puatchei khatni khiukhingh guay, Judamei guangc tuang lanv guay nganvna zauczihmei nunc ta ti-asut laa kan puni the kumna mi guay tei Babilon kandic thangc tiphungc tat puni the.

⁶Pashhurle, nang lev nang kai kaikhunc ta ni nym lana Babilon thangc phungc tat puni the. Hei khou tei nang theiclou puni the, kumna nang rui saraamhmei lat mpeyna dinclou kanmei nang pammei nunc tei lev twna hei khou tei phuplou puni the.’ ”

⁷He RINGHPOUC, nang rui ata kaduaih the, kumna ata guatlou the. Nang akhang suangc tanc e, kumna nang rui ata ngam the. Meic kathuicna rui ata nuic the; neihmaryn kaniw ata sinnui the.

⁸Ai rui lat samei kathuic kapna “Sw kasic karoucmei! Swkamut kamaimei!” twna kauc the. He RINGHPOUC, nang lat sa bam timei zaeng rui ata sinnuina khatni luhna bam e tingmik kathuic.

⁹“Ai RINGHPOUC ta amuc kan ni the kumna kazanc khou lat sa dat lak khe,” twna sa pwkhou nang lat tei alung khou mai chuangh kumc bam the. Ai rui hei tei khaamv key khang karamc e, tiki hei tei kakym key ngam mak khe.

¹⁰“Pingmei rui kabamv kathuic padik the! Kata ngamv phunghmei nunc khou dinclou di tho!” twna meic kathuicna tanglum bammei ta ai chu the. Ai bow key kanmei ta aduang dianghmei rui nganvna nkhwan bam e. “Kata guat nuh pwng de, kumna kata nym lana khwm khangc di kho,” twna kaniw sa bam e.

¹¹Tiki tancbauhmei, RINGHPOUC nang rui ata nkhavlou bam e, ata rai khang sw bammei nunc ngam ni tuang hamh e. Kaniw tingsaeng zak kan ni the, kaniw ngam ni tuang hamh the. Kaniw zakmei tei amuc dat ngam ni tuang hamh the.

¹²Tiki, He Ngamparymei RINGHPOUC, maansei nunc ta nchumhna nchanv e kumna kaniw lung khou khatni kaniw lungning khou nai bammei tei nang thay e. Kumhpui zaeng rui ata zauczihmei nunc ta nang rui khwm khangcloumei ta ata tihowlou o, kalam thu atuang lam hei nang baanc khou tiilou the.

¹³RINGHPOUC khou suanlou o! RINGHPOUC ta thuanc o! Kamei rui rairiu khang meic nunc ta meicsimei nunc baanc khou rui kanlou e.

¹⁴Ata puanc patloumei tingmik tei syang mphang kan diu! Apui rui ata puancloumei tingmik ti hei amuc kan diu!

¹⁵“Mpouh puanc the!” twmei chamv apu khou phungc guangna apu ta tineihlaloumeipu tei ni syang mphang kan diu.

¹⁶Kamei tei RINGHPOUC rui zauzian maekna swkamut kamai kanmei kaidai guay kumc kan diu! Kamei tei sucna kapmei khwan lauthwan chu thuan kan diu, kalaanv rui rih kauhmei khwan chu kan chu,

¹⁷kalam thu ata puanclou mak khou rui ata swluailou mak ge. Swluailou bam khwan e thei apui nacbamv tei atuang tarou sw bam kan nimei tuang e.

¹⁸Tabui swna ata puanclou tu cho? ryanra ryanriuna lungh khang cho, zakna Apanty luailou khang cho?