Read Rongmei Naga JEREMIA 22 Bible Online

JEREMIA 22 - Rongmei Naga bible

JEREMIA 22

¹RINGHPOUC rui kumna sa e, Judamei guangckai thangc tei tatna mi lat hei sa o,

²David tuang guangc bamvpaeng khou dungc bammei nang nangbangc nunc khatni raengh khou tat kalw bammei nunc RINGHPOUC lat hei nking o.

³“Nangniw nchumhmei khatni nzihmei taanh khang RINGHPOUC ai rui nangniw khou latdanv pat kan tuang the. Meic nunc rui guat tuna bammei nunc ta tei kaniw ta guatmei nunc khou rui kanlou o. Gin-ga, nruna nunc, khatni amaypui nunc ta sina sw riu hamh e thei sintu riu, khatni mi nthanmei bamv khou hei khuay maekmei ta swluailou riu.

⁴Ai rui tiimei latdanv hei nangniw piu e thei David kikta rui guangh swna bam puni. Kaniw tei kaniw tuang meicdaihmei nunc khatni kaniw mei nunc lev twna takuanh gari khatni takuanh tuangcna mi tuang guangckai raengcmun guay khou hei tatna bam puni.

⁵Tiki nangniw alatdanv guay piu mak ge thei mi kaidai hei tilungctaeklou puni the. RINGHPOUC ai kahak rui syangdyng sw the.

⁶“Akhang thu, Juda tuang guangckai hei Gilead kandic kumc khatni Lebanon chyngbut kumc gay e; tiki ai rui mi ti hei meic lungctaekna gancloumei bamv tiswlou puni the.

⁷Mi ti hei swkamut kamai khang ai rui meic thouclou kan the. Kaniw rui kaniw tuang baansyn sin guangna, mi tuang gay kanmei sidar tiangc guay tei gai bau lana mai khou phaiclou puni the.

⁸“Katang thangc kandih baihmei meic mpeyna tat ruanlouna mi kaidai daihmei khou hei RINGHPOUC rui tabui zaeng rui heikumna swlou bam tu cho twna kaniw nchamc thanvna bam puni.

⁹Mi hei nangniw rui nangniw Racguangc ai lev swloumei latdyng ta ganclouna rav baih baihmei ta kalum tat dat kan tina the twna kaniw daw puni.”

¹⁰Judamei nuncle, Guangh Josia khang kaplou riu. Kamei theic kanmei khang huay riu. Tiki kanac mpouh Joahaz khang kap ranvna kap bo; kaniw rui kata zay tat puni the, hanc guang dat ni tuang hamh the, kamei puanhmei kandic ta kamei how dat ni tuang hamh the.

¹¹Josia rui puanhmei mpouh Joahaz, kapu phaan Judamei guangc nsinmeipu lam khou RINGHPOUC rui kumna sa the, “Kamei mi khou rui tat kan the, hanc guang dat ni tuang hamh the.

¹²Kata phungc tatmei kandic thangc tei kamei theiclou kan ni the, kamei mi kandic ti hei how dat ni tuang hamh the.”

¹³Nchumh makna kakai swmei khatni lungning nthan makna kakai tidaic pat bammei, kaphy kadam tii makna namna meic nunc ta taanv titaanc bammei meic nunc tei sansi e dav!

¹⁴“Ai lunghpui kai kasiamh ni the, kauhmei kai sw ni the,” twna sa bammeipu tei san si e dav! Kumna kakai tei mpwan kailat dowlou the, sidar thing rui kasiamhlou the, kumna howgay khang puc haenghmei rui teylou the.

¹⁵Nang rui thing baihmei gaymei sidar thing rui swlou kantu hamhna cho? hei tei rui nang ta guangh gaymei tiswlou puni dina cho? Nang pu tei tuna zangvna amanvna lungc kan tu hamhna cho? Kamei tei nchumh nzihna lungc kan e, kamei karamhmei guay kathai gayna laatu kan e.

¹⁶Kamei rui lungcsimei nunc khang latzan sw chuyna swlou kan e, kumna ramh guayna gayna bam khwan e. RINGHPOUC ta thaymei twmei kiu hei tei the.

¹⁷Nang thu nang khang na ningna lungc the; khuay maekmei ta swluai swtiat the khatni meic nzina nang mei nunc ta rai the. RINGHPOUC rui sa the.

¹⁸Kumna mi tangv tei RINGHPOUC rui Josia rui puanhmei mpouh Jehoiakim, Judamei guangc lam khou kumna sa the, “Meic gaanv khat na rui sini kamei theih khou kaplou lak ge, ‘Achampanvle! Asuanreyle!’ twna ni huaylou ni tuang hamh e. Meic gaanv khat na rui sini ‘Akaipouc! Aguangc!’ twna kaplou ni tuang hamh e.

¹⁹Kuanniam ta ram mphum kumc kata mphumhlou puni the, kata tei zay patna Jerusalem raengc paengc thangc ganclou puni the.”

²⁰Jerusalemmei nuncle, Lebanon thangc tatna kauc tho, Bashan kandic thangc tatna kap tho; Moab tuang chyng twan khou kuna kauc tho, kalam thu nangniw rui giang khanvloumei ta tei zaw tisilou kan the.

²¹Nangniw chingkhiuhna lungc bammei douc tei RINGHPOUC rui nangniw khou samei lat tei nangniw nkinglou mak khe. Nangniw panty saanvsaengh heikumna lungc kan the; nangniw RINGHPOUC lat piu zat mak khe.

²²Nangniw tuang kapy swmei nunc ta mpwan rui aliu ganc puni the, nangniw rui giang sw bammei nunc ta tei rih khou nym puni the, nangniw tuang kaidai zak puni the, mi hei nangniw rui simei taanv taanc bammei guay zaeng tei rui e.

²³Lebanon tuang sidar thing pang khou nangniw giuga makna nthaekc bam e; tiki suhmei guang pwkhou, nahbam nimei ramsu kumc suc guang pwkhou adih ryanra puni cho?

²⁴Judamei guangc Jehoiakim rui puanhmei Guangh Jehoiakin khou RINGHPOUC rui kumna sa the, “Ai Ringhmei Racguangc swmei suai makmei kumcna, nang hei abaanzat khou guangh baanrwn swna bam sini, ai rui nang ta thaek pat puni the

²⁵kumna nang ta swluai khang sw bammei nang pingna bammei mei nunc baanc khou tiilou puni the. Ai rui nang ta Guangh Nebukadnezar khatni katuang ricmei nunc baanc khou tiilou puni the.

²⁶Ai rui nang khatni nang pui ta ginramdic thangc tinym tat puni the. Nangney ta puanclou makmei kandic thangc nangney tat puni the, mi khou tei nangney theiclou puni the.

²⁷Nangney mi kandic ti hei how dat nii bam sini nangney hanc guang dat ngam ni tuang hamh the.”

²⁸Ai rui sa the, “Guangh Jehoiakin hei bakmei, meic kahaw makna gancloumei lai kumc thena cho? Hei kumc tina cho kamei khatni kanac nunc ta kaniw thayhow makmei kandic thangc nym tat kanmei kiu?”

²⁹He kandihle, kandihle, kandihle! RINGHPOUC rui kumna samei hei nking o:

³⁰“Mipu ti hei kanac amaan ngammeipu, kaphaan lyn dat nimei maekmeipu twna hylou tho. David phaan lynna Juda khou guangh sw khang kakikta nai ni tuang hamh the. RINGHPOUC ai rui sa the.”