Read Rongmei Naga JEREMIA 23 Bible Online

JEREMIA 23 - Rongmei Naga bible

JEREMIA 23

¹RINGHPOUC tuang mei nunc ta swkamut kamailoumei khatni zin phakloumei kandih kaipouc nunc khou tei katuang latzan adih meic pingmei tuang puni cho!

²Mi hei RINGHPOUC Isaraelmei Racguangc rui, kamei nunc ta kadanlou nimei kandih kaipouc nunc lam khou samei lat re: “Nangniw amei nunc ta kadanlou mak ge; nangniw rui kaniw ta zin phaklou the khatni nthau ganclou the. Ntaw thu nangniw rui taanv simei taanclou kanmei guay khang tei ai rui nangniw ta dandi tii puni the.

³Ai rui amei nunc ta zin phaklou kanmei kandic guay khou tei rui ai rui khuam kaduai dat lana kaniw kandic khou phungc guanglou dat puni. Kaniw nac nunc lungckingc lungckiuc pat dat puni the.

⁴Kaniw ta makalou khang kandih kaipouc nunc tiguang dat puni. Amei nunc tei pingna khatni kaluang nraamna bam dat lak khe, khatni ai rui kaniw ta dandi tii dat lak khe. RINGHPOUC ai rui sa the.”

⁵RINGHPOUC rui sa e, “Ai rui ravchaptatmei David kikta gaanv khat ta guangh khang kadahlou nimei ganv guang puni. Mi guangc tei rui ningtyngna dihsin puni kumna kandih kapwm khou nchumhmei khatni nzihmei taanc puni.

⁶Kamei guangh sw pwkhou, Judamei nunc giuga makna lungc puni khatni Isaraelmei nunc nchu-nzaenghna lungc puni. Kata tei ‘RINGHPOUC aniu ta kanloumeipu’ twna kaw puni.

⁷“Meic nunc rui ata Isaraelmei ta Izip khou rui phungc guangloumeipu ringhmei Racguangc twna sa taanna

⁸Isaraelmei ta dihpy kandic thangc rui khatni kamei rui zin phakloumei kandic guay khou rui phungc guanglou datmeipu Ringhmei Racguangc twna latdyng sw dat nimei ganv guang puni. Hei ganv khou kiu kaniw tuang kandic khou lungc dat puni.”

⁹Alung hei bak ngam the, kumna ai hei kadunh the. RINGHPOUC zaeng rui katuang nthanmei lat zaeng rui, ai hei zouh zangv mbamei kumc the, zouh zangv geic langvmei mei kumc the.

¹⁰Mi kandic hei RINGHPOUC khang lwmnuh makmei maansei rui padik the; kaniw meicsimei panty khou lungc the kumna kaniw pumtan sinsw kadat the. RINGHPOUC tuang syang zaeng rui kandih phui ngam the, khatni khouringh bynbamv guay kangc ngam the.

¹¹RINGHPOUC rui sa e, “Muhzwng nunc khatni amuh nunc hei ravning mak khe; kaniw Ravkai khou simei taanv taanc bam khou baanhtyang sin the.

¹²Kaniw tat bammei chaeng tei ani puni the khatni zingc puni the; ai rui kaniw ta tiphaysuy puni the khatni tibow puni the. Ai rui kaniw ruc khou kamut kamaimei tiguang puni the, kaniw ta riap nimei ganv guang pw the. RINGHPOUC ai rui sa the.

¹³Samaria tuang muczwng nunc tuang paap ai how the: kaniw Baal tuang lat dinc the kumna amei nunc ta chaengzay mbiangh the.

¹⁴Tiki Jerusalemmei muhzwng nunc rui heisuangc simei taanv taanc bammei ta how the; kaniw lungcmaanv lungcmow the khatni saraamhmei lat sa the; simei taanh khang kaniw rui meic nunc ta nkhavlou the, heikumna meic nunc tei simei taanv taanc nthaekc mak khe. akhang, kaniw hei Sodom khatni Gomoramei kumc the.

¹⁵“Kumhpui zaeng rui, Ngamparymei RINGHPOUC ai rui Jerusalem tuang muhzwng nunc lam khou kumna sa e: Ai rui kaniw ta nkhucmei nwang titu puni the khatni khay dui tizangv puni the, kalam thu kaniw rui kandih kapwm khou ravchap tat makmei zin liklou the.”

¹⁶Ngamparymei RINGHPOUC rui Jerusalemmei nunc khou sa e, “Muhzwng nunc rui samei lat tei nking riu; kaniw rui nangniw khou guang tangc lakmei rigwn rana tipadiklou e. Kaniw tei ai rui samei hamhna kaniw rui ningmei dinc the.

¹⁷Ai rui samei lat chu zihmei nunc khou tei simei guang ni tuang hamh e twna sana bam e. Kaniw rui kanu tanhmei nunc khou tei kamut kamaimei rui kaniw ta kahitow ni tuang hamh e twna sana bam e.”

¹⁸Ai rui sa the, “Kaniw gaanv khat na sini RINGHPOUC tuang nkamhmei lungning tei thay tangh mak ge. Kaniw gaanv khat na sini kalat tei chu zat kan mak ge khatni kabah thay zat kan mak ge. Kamei rui samei lat tei nkinglou zat kan mak ge khatni lungh gutlou zat kan mak ge.

¹⁹Kalungpuam hei pwanzingh kumcna meicsimei nunc py ruc khou kanuaih katungh guang puni the.

²⁰Kamei rui taanclou niimei guay tei taanclou tangh mak saanv hei tei luai ni tuang hamh e. Thei thangc rui kamei nunc rui mi hei nthanna kabah thay puni.”

²¹RINGHPOUC rui sa the, “Ai rui mi muhzwng nunc ta tei thouclou mak ge, tiki kaniw tat kan the. Ai rui kaniw khou lat akhat na sini dinclou mak ge, tiki kaniw azanc khou rui sana bam e.

²²Kaniw rui atuang ryloumei lungning tei thay bam khwan e thei kaniw rui amei nunc khou atuang lat dinclouna kaniw ta kaniw tuang simei panty tei khatni kaniw tuang simei taanv taanc bammei guay tei tikalaiclou ni tuang e.

²³“Ai hei kabamv kathuicna khou bammei Racguangc e, kabamv akhat na khou bam mak ge.

²⁴RINGHPOUC sa e, meic gaanv khat na rui sini akhou rui nkamh ngam mak ge. Ai tingpuk kandih kabamv kathuicna khou bam e twmei nangniw thay makna cho?

²⁵Saraamc bammei muhzwng nunc, kaniw mang khou kaniw khou dinclou the twna saraamhmei nunc rui sa kanmei guay tei ai thay e.

²⁶Mi muczwng nunc tei kaniw khubut khou rui kazwm patmei saraamhmei lat rui amei nunc ta asaanh zay mbianghna bam nina cho?

²⁷Kaniw pupouc nunc rui ata amuclouna Baal rav ta kalum tat kanmei kumcna amei nunc ta kaniw mang pary tei rui ata ti-amuclou pwng e twna kaniw ning e.

²⁸Mang manvmei muhzwng tei rui mang de twna sa nina e, tiki akhwan chumei muhzwng tei thu mi lat tei suai makna sa ndauh nina e. Napguy lev kida pwkhou napgou tei tabui tuang gaymei naina cho?

²⁹Alat hei thu mai kumhmei tuang e, khatni tautuangcbut ta siauc paruatlou ngammei tandiak kumhmei tuang e.

³⁰Kaniw khat khat lat chu kary lana alat the twna sa bammei muhzwng nunc ta tei ai nuh mak khe.

³¹Kaniw khou rui patmei lat tei sa lana akhou rui e twna sa bammei muhzwng nunc ta tei ai nuh mak ge.

³²RINGHPOUC ai rui samei hei nking o! Saraamhmei rui padikna kaniw mang racna bammei muhzwng nunc ta tei ai nuh mak khe. Kaniw rui mi mang guay tei rac lana kaniw tuang saraamhmei rui khatni gaengh swmei rui meic mpeyna ta zay mbiangh the. Ai rui kaniw ta thouclou mak ge, hamh e thei tat ro twna ni sa mak ge; kaniw tei meic nunc khang khat na sini gaeng mak khe. RINGHPOUC ai rui sa the.”

³³RINGHPOUC rui akhou sa the, “Jeremiale, amei akhat rui, hamh e thei muhzwng akhat rui, hamh e thei amuh akhat rui ‘RINGHPOUC tuang puatrith kiu tabui tei cho?’ twna thanv pw e thei, ‘RINGHPOUC tuang puatrith kiu nangniw hei the, kamei rui nangniw ta mpatlou puni the,’ twna sa ti tho.

³⁴Amei gaanv khat rui pwni, muhzwng gaanv khat rui pwni, amuh gaanv khat rui nganvna muhzwng gaanv khat rui pwni, amuh gaanv khat rui nganvna ‘RINGHPOUC tuang puatrith’ twmei lat hei sa e thei ai rui kata khatni kakai kaikhunc ta dandi tii puni.

³⁵Mi phaan tei meic kathuicna rui kapammei khou hamh e thei kariang kaluaic khou ‘RINGHPOUC rui tabui lat dinclou bu cho? RINGHPOUC rui tabui lat salou bu cho?’ twna thanv nina e.

³⁶Kumhpui zaeng rui kaniw ‘RINGHPOUC tuang puatrith’ twna sa dat taan nina the, kalam thu kaniw rui kum pw e thei alat hei ai rui kaniw khang puatrith ling tiswlou puni. Meic nunc rui Ngamparymei, RINGHPOUC kaniw tuang Racguangc lat ta sw mbiangh the.

³⁷Muhzwng nunc khou mi kumna thanv o, ‘RINGHPOUC rui nangniw khou tabui lat dawlou bu cho? RINGHPOUC rui tabui lat salou bu cho?’

³⁸kaniw rui alatdanv liamna ‘RINGHPOUC tuang puatrith’ twmei lat hei sa pw e thei

³⁹ai rui kaniw ta khuaic thauna akhou rui ndat ganc puni, kaniw ta ni kaniw khatni kaniw pupouc nunc khang tiiloumei kaidai ta tei ndat ganc puni.

⁴⁰Ai rui kaniw ruc khou amuc dat thui lakmei zakmei khatni zawsimei tiguang puni.”