Read Rongmei Naga JEREMIA 25 Bible Online

JEREMIA 25 - Rongmei Naga bible

JEREMIA 25

¹Josia nac mpouh Jehoiakim rui Judamei guangc swmei tuang padeihmei kwm Juda lam khou RINGHPOUC rui akhou lat akhat tiguang the. (Mi hei Nebukadnezar rui Babilonmei guangc swmei reymei tingkwm the.)

²Ai rui Judamei khatni Jerusalemmei meic kaguayna khou sa the,

³“Judamei guangc, Amon rui puanhmei Josia guangh swmei tuang 13mei kwm tei rui thauna aseic nganv tingkwm 23 hei RINGHPOUC rui akhou sa guang the, kumna akhou kamei rui samei guay tei dinclou makna taanhmei tuang ni maek khe. Tiki nangniw lungh gutna nkinglou mak khe.

⁴RINGHPOUC rui kabangc muhzwng nunc thouc guangna bam sini nangniw nkinglou mak ge khatni thouh swlou mak ge.

⁵RINGHPOUC rui nangniw khatni nangniw pupouc nunc tuang tingsaeng kandic khang tiiloumei ramv khou tei nangniw lungcna bam khang nangniw tuang simei panty khou tei rui khatni nangniw simei taanv taanc bammei khou tei rui kalaic pat ro twna kaniw rui nangniw khou sa bam khwan e.

⁶Rav baih baihmei ta kalum mak khang khatni nangniw rui kasiamhmei ravmaengc nunc ta kalumna RINGHPOUC lung tipuamclou mak khang kaniw rui nangniw khou sa bam khwan e. Nangniw rui RINGHPOUC lat piu bam khwan e thei kamei rui nangniw ta riap bam lak nimei tuang e.

⁷Tiki nangniw kalat piu mak ge twna RINGHPOUC kamei rui sa the. Kumna nangniw tuang ravmaengc rui kalungpuam tithaulouna kumna nangniw rana nangniw ruc khou ryanramei tiguang the.

⁸“Kumna nangniw rui kalat piu mu timei zaeng rui Ngamparymei RINGHPOUC rui sa e,

⁹‘ai rui dihpy biak thangc mei zaat nunc ta khatni abangc Babilonmei guangc Nebukadnezar ta kaw puni the. Judamei ruc khou khatni mi khoutei lungc bammei zaatc guayna ruc khou adow khang ai rui kaniw ta thouc guang puni the. Ai rui Judamei ta khatni kakainingmei zaatc nunc ta swkatupctuayna tingsaengzaeng ganclou puni the, hei tei meicpumc kasunhmei khatni pingmei lwn puni the. RINGHPOUC ai rui sa kan the.

¹⁰Kaniw tuang neihla zaenggaymei khwan khatni nownah laaguangmei tuang neihlamei guangmei tuang neihlamei khwan guay dapmitlou puni the. Kaniw tuang thaucmai khang thauh nai ni tuang hamh the, khatni nap-bi ni nai dat ni tuang hamh the.

¹¹Mi kandic kapwm hei sw kasic karoucna ganclou puni the, kumna hei tei meicpingmei lwn puni the, kainingmei zaatc nunc rui Babilonmei bangc tingkwm 70 sw puni the.

¹²Mi tangv tei ai rui Babilonmei ta kaniw guangc ta lev kaniw paap zaeng rui riap puni the. Ai rui mi kandic tei sw katupc tuaylouna tingsaengzaeng ganclou puni the.

¹³Ai rui zaatc nunc ruc khou tiguang puni twna Jeremia khou sa guangmei mi buk khou hyloumei kamut kamaimei guay hei ai rui Babilonmei ruc khou tiguangna riap puni the.

¹⁴Babilonmei nunc ta kaniw rui taancloumei khwm tei ai rui khangclou dat puni, kumna kaniw ta zaatc mpeyna rui khatni guangh daihmei mpeyna rui kaniw bangc tisw puni.’ ”

¹⁵RINGHPOUC, Isaraelmei Racguangc rui akhou sa the, “Alungpuam buangc hei abaanc khou rui laa tho. Ai rui nang ta thoucloumei zaatc kaguayna khou tei nang tatna mi hei tizangv tho.

¹⁶Kaniw rui mi hei zangvna ai rui kaniw ruc khou thouc guangmei suc-rih zaeng khou tei rui kaniw mbana bam puni the.”

¹⁷Kumna ai rui buangh tei RINGHPOUC baanc khou rui laana, RINGHPOUC rui ata thoucloumei zaatc guayna khou tei tat lana hei tei tizangv the.

¹⁸Jerusalem khatni Juda tuang kaidai kaguayna, mi tuang guangc guay khatni meicdaihmei nunc tei sypungramv, meicpingmei lwn tiswlou khang khatni meic nunc rui kaniw zanc sindaancna siang bam khang ai rui mi nunc ti hei mi buangc khou tei rui tizangv the. Kumna ntaw nganvna mi hei kaniw heikumna bam the.

¹⁹Mi nunc hei ni mi buangc khou tei rui zangv puni the: Izipmei guangc khatni katuang meicdaihmei nunc khatni kapy nunc; Izipmei kaguayna

²⁰khatni Izip khou bammei gin guay; Uz kandic tuang guangh guay; Philistinmei tuang kaidai Askelon, Gaza, Ekron, khatni Asdod khou theic nsaekcloumei guay;

²¹Edom, Moab, khatni Ammonmei guay;

²²Tur lev Sidon tuang guangc nei; Mediterranian ramv tuang guangh nunc;

²³Dedan, Tema, khatni Buz kaidai guay; Kasam rapduimei mei nunc tei;

²⁴Arabmei guangc guay; tazikramv khou lungc bammei zaatc nunc tuang guangc nunc;

²⁵Zimri, Elam, khatni Media tuang guangh nunc;

²⁶dihpy ramv anamei, duhmei khou bammei guangc nunc; hei guay khou kaliang swna guang puni the. Kandih nam ruc khou naimei zaatc kaguayna hei tei zangv puni the. Nkhamh liang khou Babilonmei guangc rui hei tei zangv puni the.

²⁷Mi tangv tei RINGHPOUC rui akhou sa the, “Ai rui kaniw ruc khou tiguang nimei suc-rih tei rui kaniw zangvna ngguakc mak saanv, khatni kaniw bow keyna thau dat ngam mak bam saanv hei tei zangv tho twna Ngamparymei RINGHPOUC, Isaraelmei Racguangc ai rui latdanv dan pat the twna meic nunc khou tei sa ti tho.

²⁸Kaniw rui mi buangc hei nang baanc khou rui laana zangv mu e thei, kaniw mi hei zangv nina de twna Ngamparymei RINGHPOUC rui sa e twna sa tio.

²⁹Ai rui atuang kaidai ta swkasicmei taanv hei taanc kahouh puni the. Kaniw ta tei riaplou makna heikumna bam puni de twna kaniw ningna cho? Kaniw ta tei riap puni the, kalam thu kandih nam ruc khou bammei meic katana ruc khou suc-rih tiguang puni the. Ngamparymei RINGHPOUC ai rui sa the.

³⁰“Jeremiale, ai rui samei guay hei nang sa ndauh nina e. Meic nunc khou tei mi hei sa o, ‘RINGHPOUC tingpuk thangc rui nin pat puni the khatni tingpuk kauh thangc rui ganh key kumc key puni the. Kamei rui kamei nunc ruc khou nin key puni the; drakha thai niimei nunc kumcna kauc puni the. Kandihmei kaguayna rui kakhwan chu puni the,

³¹Kakhwan tei kandih tin kagaengv tangc puni the. RINGHPOUC rui zaatc nunc ta latzan sw puni the. Kamei rui meic kathuicna ta latzan sw puni the kumna meicsimei ta swluai puni the. RINGHPOUC rui sa the.’ ”

³²Zauclo, Ngamparymei RINGHPOUC rui sa the: Sw kasic karoucmei hei zaatc nunc ruc khou liangc swna guang pw the, kumna kandih tin thangc pwanzingh dai kanangh bam the.

³³Mi nungc kiu RINGHPOUC rui swluailoumei pumc nunc tei kandih tin akhat khou rui kandih tin akhat nganv nrou padiklou puni the. Meic gaanv khat na rui sini kaplou ni tuang hamh the, meic gaanv khat na rui sini mbeihlou ni tuang hamh the. Kaniw ta khou tei mphuam tanacmei puat ganclou kumc kandih khou ganclou bam puni the.

³⁴Kap tho, kapy swmei nangniwle, amei nunc ta gaenghmei nuncle, kap ranvna kap tho! Mbutding khou liaulu-liaulangna kap tho. Nangniw ta lauziuchic pang ta dow kumc dow key nimei ganv guang pw the.

³⁵Nangniw duak dat nimei chaeng maek khe.

³⁶Nangniw puihuayna kap tho kalam thu RINGHPOUC rui kalungpuam khou nang kandic ta swmutlou the

³⁷kumna nchu-nrina bammei nang kandic hei sw kasic karoucna ganclou the.

³⁸Kamangliangpui rui katuang khowkai mpatlouna tat kan kumc RINGHPOUC rui kamei nunc ta ganclouna tat kan the. Suc-rih rui khatni RINGHPOUC tuang lungpuam rui mi kandic ti hei ramvkaengvdic ti-mbaihlou the.