Read Rongmei Naga JEREMIA 26 Bible Online

JEREMIA 26 - Rongmei Naga bible

JEREMIA 26

¹Josia rui puanhmei Jehoiakim rui Juda tuang guangc sw rappui lev

²RINGHPOUC rui akhou sa the, “Isaraelmei tuang kaimav khou tei dingna Juda tuang kaidai guay khou rui kalum khang mi khou hei guangmei nunc khou tei ai rui sa o twna samei lat tei dinc ndauh tho ramhkhat na sini dinc nsaekclou nuh mak ge.

³Meic nunc tei nkinglouna kaniw tuang simei chaeng tei ganclou kho ni nuh e. Kum pw e thei kaniw tuang taanv simei zaeng rui kaniw ta swkamut kamailou khang swlouna bammei khou rui alung hei kalaic dat puni.”

⁴Meic nunc khou sa o twna RINGHPOUC rui akhou sa the, “Ai rui nangniw khou atuang latdanv khou lungh khang dincloumei tei piu mak ge

⁵khatni ai rui nangniw khou thouc guang bammei abangc muhzwng nunc lat tei chulouna nangniw alat piu bam nina e twna kaniw rui samei tei nangniw piu zat mak ge thei

⁶mi ravkai ti hei Shilo tei kumc swlou puni, khatni mi kaidai hei sindaancna kandihmei zaatc guay hu khou siang puni.”

⁷Mi guay hei ai rui Ravkai khou sa bammei ta amuh nunc, muhzwng nunc, khatni meic guayna chu kan the.

⁸RINGHPOUC rui sa o twna samei lat tei ai sa taan rappui lev kaniw rui ata nymna kumna kauc the, “Nang ta swluai puni the!

⁹Mi Ravkai hei Shilo kumc puni the kumna mi kaidai hei swkatupctuaylouna mi khou hei meic lungc dat ni tuang hamh the twna tabui swna RINGHPOUC zanc khou rui sa bam tu cho?” Khoutei meic nunc rui adaeng khou huamc guang the.

¹⁰Pat bammei lam khou tei Juda tuang kapy swmei nunc rui chu lana katumcna guanghkai khou rui Ravkai khou guang the. Kumna raenghkat kathanc khou guang bam the.

¹¹Khoutei amuh nunc lev muhzwng nunc tei rui kapy nunc khatni meic nunc khou tei sa the, “Mipu hei theic biu the kalam thu kamei rui aniu tuang kaidai ruc khou sa kasicna sa the. Hei tei nangniw nu kahak rui chu kan the.”

¹²Khoutei ai rui sa the, “Mi tuang Ravkai khatni mi tuang kaidai ruc khou ai rui sa bammei kaguayna hei sa o twna RINGHPOUC rui ata thoucloumei tuang de.

¹³Nangniw lungc bammei lwnlung hei khatni nangniw taanc bammei taanv hei kalaic nina e, kumna RINGHPOUC nangniw Racguangc lat piu nina e. Kum ti thei, kamei rui nangniw ruc khou kamut kamaimei tiguang puni twna sa bammei tei kalung kalaic dat nuh e.

¹⁴Ai hei thu nangniw baanc bangc khou nai the cho! Nangniw rui nchumh e twna ningmei tei aruc khou swlou rap tho.

¹⁵Tiki mi hei thu nthanna thaylou o: nangniw rui ata swluai e thei thu, nangniw khatni mi kaidai tuang mei nunc ruc khou khuay maekmei ta swluaimei khuay keylou puni the, kalam thu RINGHPOUC kamei rui mi lat hei sa o twna thoucloumei tuang de.”

¹⁶Khoutei kapy nunc khatni meic nunc tei rui amuh nunc lev muhzwng nunc khou tei kumna sa the, “Mipu hei RINGHPOUC aniu Racguangc zanc khou rui sa bammei tuang de; kata swluai nuh mak ge.”

¹⁷Mi tangv tei gaanvthaih gaanvsaekc dingthauna khou tei guang kaduai bammei nunc khou tei sa the,

¹⁸“Hezekia rui Judamei guangc sw bammei douc tei Moreshetmei muhzwng Mika rui ‘Zaion ta tei lau suak kumc suaklou puni the, Jerusalem hei sw kasic karoucna gancloumei khuan sw puni the. Ravkai tei nwmbangc mbaih puni the, twna Ngamparymei RINGHPOUC rui sa e twna meic mathiucna khou sa kan e.

¹⁹Khoutei Guangh Hezekia khatni Judamei nunc rui Mika ta swluai kan mak ge. Swluaimei phaan Hezekia rui RINGHPOUC ta pingna kamei rui zauc nzianlou khang karamc khwan e. RINGHPOUC rui kalung kalaicna kamut kamaimei tei tiguanglou mak khwan e. Tiki ntaw aniu rana aniu ruc khou sw kamut kamai daihmei tiguang puni the.”

²⁰(Baihmei gaanv khatpu ni, Shemaia rui puanhmei mpouh Uria, Kiriath Jearim kaidaimeipu rui RINGHPOUC zanc khou rui sana Jeremia rui samei kumc rapna mi kaidai khatni Judamei ruc khou sa kan e.

²¹Hei tei chu pwkhou Guangh Jehoiakim khatni katuang ricmei nunc lev meicdaihmei nunc rui kata swluai khang sw khwan e. Hei tei Uria rui chu lana pingna Izip kandic thangc pak tat kan khwan e.

²²Izip khou rui Uria ta nym guang dat khang Guangh Jehoiakim rui Akhbor nac mpouh Elnathan lev meic gaanvsaekc ta thouclou khwan e.

²³Kaniw rui kata Guangh Jehoiakim khou nym guang datna kata tei swluaina tarou luangc khou ganclou khwan e.)

²⁴Tiki Shaphan nac mpouh Ahikam rui abiak liangclouna ata meic nunc baanc khou tipatlou mak khe.