Read Rongmei Naga JEREMIA 27 Bible Online

JEREMIA 27 - Rongmei Naga bible

JEREMIA 27

¹Judamei guangc Josia nac mpouh Zedekia rui guangh swthau kahouhmei ganv khou RINGHPOUC lat Jeremia khou guang the.

²RINGHPOUC rui kumna sa e, guangkhaengv puatphung kasiamhna nang guang khou lou o.

³Khoutei Edom, Moab, Ammon, Tur, khatni Sidon tuang guangc nunc khou Guangh Zedekia ta ariw khang Jerusalem khou guangmei kaniw tuang dihkhyn nunc khou tei rui chamv tii titho twna RINGHPOUC rui akhou sa the.

⁴Guangh nunc khou tei heikumna sa o twna kaniw khou sa tio twna Ngamparymei RINGHPOUC Isaraelmei Racguangc rui sa the:

⁵“Angamv khatni apumtan rui ai rui mbaanv maansei, kandih khou lungc bammei khouringh katana ta damclou the, kumna ai rui hei tei kwnlou loumei khang tii the.

⁶Mi zaatc guayna ti hei abangc Babilonmei Guangc Nebukadnezar bangc khou loumei tei ai rui e, kumna ai rui nwmbangc khouringc nunc ta nganvna kabangc tiswlou the.

⁷Zaatc kapwmna rui kabangc sw puni, khatni kaguanghdic tei bowkey nimei ganv guang tangh mak saanv kaniw rui kanac khatni katou nunc bangc nganvna sw puni. Mi tangv kiu thu Babilonmei tei kangamv naimei zaat nunc khatni guangh nunc bangc sw dat puni.

⁸“Tiki thow pwni kabangc khou gutlou mumei zaat khatni guanghdih ta tei Nebukadnezar rui sw kamut kamailou mak saanv suc-rih rui, nkow- ndaapcmei rui khatni ravpyan rui riap puni.

⁹Nangniw tuang muhzwng nunc hamh e thei mang manvna ny, theihmei bumaengc kawna ny, duaih swna ny guang nimei ta dinc kasuakc ngam e twna sa bammei nunc lat tei nking riu. Kaniw rui na thu nangniw ta Babilon guangc khou gutlou mak khang sa puni.

¹⁰Kaniw rui heikumna nangniw ta guatna nangniw ta nangniw kandic khou rui ti-alay pat puni. Ai rui nangniw ta alay pat puni, kumna nangniw ta sw kamut kamailou puni.

¹¹Tiki Babilonmei guangc bangc khou gutlouna kabangc sw bammei zaatc ta tei thu kaisw lautaancna kakandih khou lungc bam khang nuhlou puni. RINGHPOUC ai rui sa the.”

¹²Hei tei kumcna ai rui Judamei guangc Zedekia khou sa the “Babilonmei guangc khou gutlou tho. Kabangc khatni kamei nunc bangc sw tho kum e thei nangniw ringc puni the.

¹³Tabui swna nang ni nang mei nunc ni suc-rih rui, nkow- ndaapcmei rui khatni ravpyan rui theic bam nina cho? Babilonmei guangc khou gutlou makmei zaat khou tei thu hei kumhmei hei guang puni twna RINGHPOUC rui sa the.

¹⁴Gutlou nuh mak ge twna sa bammei muhzwng nunc lat tei chu la riu. Kaniw nangniw ta guat bammei tuang e.

¹⁵RINGHPOUC kamei rui kaniw ta thouclou mak ge kumna kazanc khou kaniw saraamcna sa bam tuang e twna sa the. Kumhpui zaeng rui nangniw ta ni, nangniw khou saraamc sa bammei muhzwng nunc ta ni kamei rui alay ganc puni the khatni swmaan puni the.”

¹⁶RINGHPOUC rui samei lat tei ai rui muhzwng nunc khou khatni meic nunc khou kumna sa the: “Ravkai tuang khiukhingh guay tei Babilon khou rui phungc guang dat zaic puni the twna sa bammei muhzwng nunc lat tei chu la riu. Kaniw nangniw khou saraamcna sa bam tuang e.

¹⁷Kaniw lat tei chulou la riu! Babilonmei bangc khou gutlou tho, kum e thei nangniw ringc puni the! Tabui swna mi kaidai hei sw kasic karoucna gancloumei khuan sw bam nina cho?

¹⁸Kaniw tei muhzwng nunc changh bam khwan e thei khatni alat kaniw khou tiguanglou changh bam khwan e thei Ravkai khou khatni guanghkai khou lou bammei khiukhingh guay tei Babilon thangc phungc tat mak khang Ngamparymei RINGHPOUC akhou ney dam bu cho?”

¹⁹RINGHPOUC rui ntiangh guay, dui duangc nunc thauhmai hyang nunc khatni laibung-lairiu nunc mi kaidai khou louduhmei guay lam khou sa e,

²⁰mi guay hei Judamei guangc Jehoiakim nac mpouh Jehoiakin khatni Juda lev Jerusalem tuang meicdaihmei nunc ta Babilonmei guangc Nebukadnezar rui Jerusalem khou rui Babilon thangc rih nym tatmei ganv khou phungc tat makmei puat nunc the.

²¹“Ravkai khatni Jerusalem tuang guanghkai khou ganclou duhmei khiukhingh asaekc lam khou tei Ngamparymei RINGHPOUC, Isaraelmei Racguangc rui kumna samei nking o:

²²mi guay tei ni Babilon thangc phungc tat kan puni kumna ai rui kaniw khou karih guanglou dat mak saanv mi thangc tei lou bam puni. Mi tangv kiu ai rui mi guay tei phungc guang datna kabamv khou lou dat puni. RINGHPOUC, ai rui sa the.”