Read Rongmei Naga JEREMIA 28 Bible Online

JEREMIA 28 - Rongmei Naga bible

JEREMIA 28

¹Mi kwm tei, Zedekia rui guanghtumei padeihmei kwm tuang panguhmei bw khou, Azzur nac mpouh Hanania, Gibeon kaidaimei muhzwng akhat rui amuh nunc khatni meicguayna hu khou sa the.

²Ngamparymei RINGHPOUC, Isaraelmei Racguangc rui kumna sa e “Babilonmei guangc ngamv tei ai rui riambau kan the.

³Guangh Nebukadnezar rui Babilon thangc phungc tat kanmei Ravkai tuang khiukhingh kaguayna tei tingkwm kanei lungc khou ai rui phungc guanglou dat puni the.

⁴Ai rui Judamei guangc Jehoiakin ta Judamei Babilon thangc bangh sw tat kanmei nunc tei lev twna nduangh guanglou dat puni the. Ngguay, ai rui Babilonmei ngamv tei riambau puni. RINGHPOUC ai rui kumna sa the.”

⁵Khoutei amuh nunc khatni Ravkai khou ding bammei meic nunc hu khou tei ai rui Hanania khou sa the:

⁶“Charynmei tuang di the! Mi hei RINGHPOUC rui swlou puni twmei lwm gay e! Nang tuang dinckasuakcmei hei kamei rui tiguang tangclou puni the kumna Babilon thangc rui Ravkai tuang khiukhingh guay khatni bangh khang nym tat kanmei guay ta tei phungc guanglou dat puni the twmei lwm changh the.

⁷Tiki ai rui nang khou khatni meic nunc khou samei lat hei nking o.

⁸Suc-rih, nkow-ndaapcmei, khatni ravpyan zaatc mpeyna khou khatni kangamv naimei guanghdic guay khou guang puni twna aniu lungc guang maekmei hu thangc rui dinc kasuakclou khwan e.

⁹Tiki nchu-nzaenghmei guang puni twna dinc kasuakc bammei muhzwng nunc tei thu kaniw lat tei guang tangc pwkhou na rui RINGHPOUC rui thoucloumei muhzwng changh e twmei thay puni.”

¹⁰Khoutei muhzwng Hanania rui guangkhaengv tei aguang khou rui laa pat lana hei tei sw bau paruatlou the,

¹¹Hanania rui meic guayna hu khou kumna sa the: “Babilonmei guangc Nebukadnezar guangkhaengv swbauloumei kumc zaatc guayna guang khou loumei guangkhaengv tei RINGHPOUC rui tingkwm kanei lungc khou swbaulou puni the tw e.” Mi tangv tei ai tat dat the.

¹²Muhzwng Hanania rui muhzwng Jeremia guang khou naimei guangkhaengv tei swbaumei tangv RINGHPOUC lat Jeremia khou sa dat the,

¹³“Nang rui thing tuang guangkhaengv thu swbau nuh e, tiki ntanh tuang guangkhaengv lynlou dat puni twna RINGHPOUC rui sa e.

¹⁴Ngamparymei RINGHPOUC Isaraelmei Racguangc rui mi zaatc guayna khou tei ntanh tuang guangkhaengv lou puni the. Kumna kaniw Guangh Nebukadnezar bangc sw puni the twna kamei rui sa the. RINGHPOUC kamei rui nwmbangc khouringc ta nganvna Nebukadnezar bangc tiswlou puni the twna kamei rui sa the.”

¹⁵Khoutei ai muhzwng Hanania khou kumna ni sa the, Hananiale, nking o! RINGHPOUC rui nang ta thouclou mak ge tiki nang tuang saraamhmei lat tei meic nunc ta tilwm bam e.

¹⁶Kumhpui zaeng rui RINGHPOUC kamei rui nangniw ta mpatlou puni the tw e. Zauclo! Mi tingkwm hei luai mak khou nang theic puni the kalam thu RINGHPOUC ta liam khang nang rui meic nunc khou dinclou the.

¹⁷Kumna mi kwm tuang chaneimei bw khou Hanania theic the.