Read Rongmei Naga JEREMIA 29 Bible Online

JEREMIA 29 - Rongmei Naga bible

JEREMIA 29

¹Jerusalem khou rui Babilon thangc kangmei swna nym tat kanmei amuh nunc, muhzwng nunc, kapy nunc, khatni meic guayna khou ai rui tatdyn akhat hy the.

²Guangh Jehoiakin, kapui, guanghkai khou meicdaihmei nunc, Juda khatni Jerusalem tuang kapy nunc, thyamra thaymei nunc, khatni baanhthaymei nunc ta bangh zay tat kanmei tangv tei ai rui mi hei hymei tuang e.

³Mi tatdyn hei Shaphan nac mpouh Elasa khatni Hilkia nac mpouh Gemaria baanc khou Judamei guangc Zedekia rui Babilonmei guangc Nebukadnezar khou tiguang khwan e. Mi khou tei hei kumcna hylou e:

⁴“Ngamparymei RINGHPOUC, Isaraelmei Racguangc rui kamei rui nuhlou tina Nebukadnezar rui Jerusalem khou rui Babilon thangc kangmei swna zay tat kanmei nunc khou kumna sa e:

⁵‘Kaisaamh swna lungc tho. Pikwan swna riuc tuna lungc tho.

⁶Nowkaw nahlaana tunapuan puancna bam tho. Nangniw nac nunc ni nowkaw-nahlana kaniw tunapuan puancna lungc kan di tho. Nangniw meicsing geic pat nina the, raw key nina hamh the.

⁷Ai rui nangniw ta kangmei swna tizay tatmei kaidai guay khang tei gay khang khatni nchu-nzaengh khang nangniw taanc tho. Kaniw khang akhou ney o, kalam thu kaniw lungcgay ti thei nangniw ni lungcgay puni.

⁸Nangniw pang khou bammei muhzwng nunc khatni dinc kasuakc bammei nunc tei rui nangniw ta guat mak khang ramhthay lo twna RINGHPOUC Isaraelmei Racguangc ai rui sa e. Kaniw tuang mang khou tei lunghlou bam la rio.

⁹Kaniw azanc khou saraamc sa bam e. Ai rui kaniw ta thouclou mak ge. RINGHPOUC ai rui sa the.’

¹⁰“RINGHPOUC rui kumna sa e, ‘Babilon khou tingkwm 70 tangc pwkhou, ai rui nangniw ta zauclou dat puni kumna alatryan theilayna nangniw ta kai khou phungc guanglou dat puni.

¹¹Ai rui nangniw khang swlou nimei sw kamut kamaimei hamhna tilungcgay chingkhiuhlou nimei nangniw tuang machunc khang hu dwan tuang chamvraeng guay ai narui hei tei thay e.

¹²Mi ganv khou kiu nangniw ata kaw puni. Nangniw akhou guangna huayney puni, kumna ai rui dawlou puni.

¹³Nangniw ata phu puni, kumna ata phu tow puni, kalam thu nangniw lung kapwm rui ata phu puni the.

¹⁴Ngguay, ai rui sa e, nangniw ata phutow puni kumna ai rui nangniw ta nangniw kandic khou tilungclou dat puni. Ai rui nangniw ta zin phaklou kanmei bamv khatni kandih kathuic khou rui ai rui khuam guang kaduai dat puni. Ai rui nangniw ta nthau gancloumei kandic khou tei phungc guanglou dat puni. RINGHPOUC ai rui sa the.’

¹⁵“RINGHPOUC rui nangniw khang Babilon khou muhzwng nunc tiguang the twna nangniw sa e.

¹⁶David tuang guangcdic khou guanghtu bammei guangc khatni nangniw lev twna kangmei swna zay tat nchamc makna mi kaidai khou ganclou duhmei nangniw riangluaicmei nunc lam khou RINGHPOUC rui samei hei nking o.

¹⁷Ngamparymei RINGHPOUC rui kumna sa e, ‘zauclo! Ai rui kaniw ruc khou suc-rih, nkow-ndaapcmei khatni ravpyan tiguang puni the, kumna ai rui kaniw ta taamcna tu nuh makmei tadutthai tiswlou puni the.

¹⁸Ai rui kaniw ta suc-rih rui, nkow-ndaapcmei rui khatni ravpyan rui rai puni the, kumna hei tei how pwkhou kandihmei maansei kaguayna rui ping puni the. Ai rui kaniw ta zin phakloumei bamv kathuicna khou kaniw ruc khou patloumei tei howna ping puni the. Meic nunc rui kaniw ta nuic puni the kumna kaniw zanc tei zay daancna siang puni the.

¹⁹Ai rui abangc muhzwng nunc ta thouc guang dat datna sa bammei alat tei kaniw piu makmei zaeng rui mi hei kaniw ruc khou patlou puni the.

²⁰Babilon thangc thouc gancloumei nangniw thu RINGHPOUC ai rui samei hei nking o.’

²¹“Ngamparymei RINGHPOUC, Isaraelmei Racguangc kazanc khou rui saraamhmei lat sana bammei Kolaia nac mpouh Ahab khatni Maaseia nac mpouh Zedekia lam khou kamei rui sa the. Kamei rui kaney ta tei Babilonmei guangc Nebukadnezar baanc khou tiilou puni the, kumna kamei rui kaney ta nangniw hu khou swluai puni the twna kamei rui sa the.

²²Thowkumhmei Jerusalem thangc rui kangmei swna tatmei nunc tei rui thowkumhmei ta siang nii e thei ‘Babilonmei guangc rui Ahab lev Zedekia ta nringh mai rawmei kumcna nang ta RINGHPOUC rui sw kan diu’ twna kaniw sa puni the.

²³Mi hei kaney ruc khou guanglou puni the, kalam thu kaney tei si sihmei paap taanc the—kaney lungcmaanv lungcmowmei taanv taancna RINGHPOUC zanc khou saraamh the. Hei tei RINGHPOUC rui nuh mak khe; kaney taanv tei kamei thay the, kumna kamei mi tuang sakhi di the. RINGHPOUC rui sa the.”

²⁴Ngamparymei RINGHPOUC, Isaraelmei Racguangc rui Nehelammei Shemaia khang akhou lat tiguang khwan e,

²⁵Mipu hei rui kazanc khou Jerusalem khou bammei meic kathuicna khang, Maaseia rui puanhmei amuh Zephania khang khatni amuh guay khang tatdyn akhat tii guang khwan e. Mi tatdyn khou tei Shemaia rui Zephania khou kumna hylou khwan e:

²⁶“RINGHPOUC rui nang ta Jehoiada phaan amuh tiswlou kan the. Ntaw thu nang hei Isaraelmei khou meicdaihmei di the. Muhzwng thiak sw bammei mbamei kathuic ta tei kaguang khou ntanh guangkhaengv khaplou nimei hei nang thouc the.

²⁷Muhzwng thak swna meic nunc khou sa bammei Anathotmeipu Jeremia ta tei tabui swna kumna ntalou makna ganclou bam tu cho?

²⁸Kata tei ti-nthaekclou nina the, kalam thu kamei rui Babilon khou bammei nunc khou kaniw mi khou tei kangmei swna tingsaengcna bam puni di he kumna kaniw kaisaamh sw lana lungc bam o, phunling phunlu lingc keyna tuna lungc bam o twna sa the.”

²⁹Amuh Zephania rui muhzwng Jeremia khou mi tatdyn tei pac the.

³⁰RINGHPOUC lat tei Jeremia khou guang the,

³¹khou tei Babilon thangc kang bammei guay khou tei Shemaia lam khou kumna hy o twna RINGHPOUC rui akhou sa the: “RINGHPOUC ai rui Shemaia ta thouclou mak ge, tiki kamei rui muhzwng khe swna saraamhmei lat sana nangniw ta tilwm bam e.

³²Hei zaeng rui Nehelammei Shemaia khatni kakikta ta riap puni the, nangniw pang khou kakikta nai lak khe. Ai rui amei nunc khang taanv gaymei taanclou nimei ta tei kamei how tow ni tuang hamh the, kalam thu kaniw ta tei alat liam khang kamei rui nchamlou the. RINGHPOUC, ai rui sa the.”