Read Rongmei Naga JEREMIA 3 Bible Online

JEREMIA 3 - Rongmei Naga bible

JEREMIA 3

¹RINGHPOUC rui kumna sa the, “Thowkumhmei rui kanow ntamvna, mipui tei kagaanv ta ganclouna meic baihmei now sw dat kan e thei, kamei rui mipui ta tei laa dat nuh puni dina cho? Mi hei rui mi kandic ta swtanac pw lakna cho? Tiki Isaraelmei nangniw ramhkhangc mpeyna nai tat nganv lana ntaw hei akhou hanc guang dat niina cho?

²Ravbamv but nunc khou tei zauc ku zauc o. Nangniw kapumc zuanhmei nunc kumcna swlou makmei bamv tabui khou tei nai thena cho? Arabmei nunc rui tazikramv khou kaniw tuang suc-rih ta nchwanmei kumc nangniw ramhkhangc nunc ta chaeng daeng chaeng daeng khou nangniw nkhwan bam e. Nangniw tuang nthah-boulahmei taanv rui mi kandic hei swtanac the.

³Hei zaeng rui ting ta khaamvlou kan the, chapuak ting riu key mak khe. Nangniw hei mangcsangmeiluc nunc kumc the; nangniw khou meiczakmei maek khe.

⁴“Kumlana ntaw nangniw ‘nang hei aniw pu e, aniw alaucna khou rui nang rui aniw ta nzian guangmei tuang di the.

⁵Nang lungpuamc tanh tan bam pw lak ge; tingsaengzaeng puamc bam pw lak ge,’ twna akhou sa bam dat re. Isaraelmei, nangniw rui hei tei kumcna sa lana simei taanv thu taanc nuhmei kamv nangniw taancna bam e.”

⁶Josia rui guangh sw bammei douc RINGHPOUC rui akhou sa the, “Isaraelmei, mi lwmnuh makmeipui tei rui taanc kanmei taanv tei nang how the. Kamei akhou rui tat patna ravbamv chyngbut kauh kauhmei ruc khou khatni thingbang ndiakcmei bang bangc khou mangcsangmeiluc kumcna sw kan the.

⁷Kamei rui mi guay tei taanc tang e thei akhou hanc guang dat pwng e twna ai ning bam khwan e. Tiki kamei akhou hanc guang dat mak ge, kumna lwmnuh makmei kaswanrey Juda rui mi guay tei how the.

⁸Isaraelmei rui ata ganclouna mangcsangmeiluc sw tat kanmei zaeng rui ai rui kata mulou the twmei Juda rui ni how kan the. Tiki lwmnuh makmei Isaraelmei swanrey Juda ping mak ge. Kamei ni mangcsangmeiluc sw the.

⁹Kumna meiczakmei tuang khat na sini maek khe. Kamei rui thing ntauh ta kalumna lungcmaanv lungcmowna mi kandic ti hei swtanac the.

¹⁰Mi guay hei sw tang lana Isaraelmei tuang lwmnuh makmei swanrey Juda lungning nthan makna lunghlaic guang datmei thak swna akhou guang e. RINGHPOUC, ai rui samei tuang the.”

¹¹Isaraelmei rui kakhou rui tat kan khwan sini Isaraelmei hei lwmnuh makmei Juda suangc thu gay maih de twna RINGHPOUC rui akhou sa e.

¹²Isaraelmei khou tatna sa o twna kamei rui akhou kumna sa the, “Lwmnuh makmei Isaraelmeile, akhou guang dat ro. Ai hei nzianthaymeipu e. Kumna ai nangniw ta lunghpuamc tanh tan bam lak ge.

¹³Nangniw nkhuai dyng the, nangniw RINGHPOUC ta liamna tat dyng the twmei nuh key tho. Thingbang ndiakcmei bang bangc khou rav baihmei nunc ta nzian dyng the kumna nangniw alatdanv piu mak dyng the twmei sa ndauh tho. RINGHPOUC ai rui samei tuang the.

¹⁴“Lwmnuh makmei nuncle, hanc guang dat ro; nangniw hei atuang de. Ai rui nangniw ta kaidai kathuic khou rui gaanv khat gaanv khat khatni puinac kathuic khou rui gaanv nei gaanv nei laana Zaion chyng khou phungc guanglou dat puni.

¹⁵Ai rui nangniw khang alung kwnmei dihsinpouc nunc tiilou puni kumna kaniw rui ningtyngna khatni kabah thayna dihsin puni.

¹⁶Nangniw mi kandic khou tei meic kingckiuc pat pwkhou, meic nunc rui atuang Latdyng Khuk lam khou lat sa dat pw lak khe. Kaniw mi ta tei kakhanh dat pw lak khe khatni ningtow dat pw lak khe; kaniw khang hei tei kage nai dat lak khe. Baihmei ni kasiamh dat lak khe.

¹⁷Mi khou kiu Jerusalem ti hei ‘RINGHPOUC tuang Guangcbamvpaeng’ twna kaw puni, kumna ata kalum khang zaatc guayna khou tei guang kaduai puni. Kaniw tuang tanhmei khatni simei lung rui samei tei kaniw piu dat pw lak khe.

¹⁸Isaraelmei lev Juda kariu puni, dihpy biak kandic thangc rihnym tatmei khou rui ai rui nangniw pupouc khang tiiloumei kandic khou hanc guang dat kariu puni.”

¹⁹RINGHPOUC rui sa e, “Isaraelmei, ai rui nang ta anac mpouh swna, nang khang nungngai amanvmei kandic khou gay liangmei kandic tiilou nii e. Nang rui ata apu twna kawna, akhou rui tat dat zat makna bammei ta laa nii e.

²⁰Tiki lwmnuh makmei now kumcna, nang hei akhang lwmnuh mak khe. RINGHPOUC ai rui samei tuang the.”

²¹Ravbamv Chyngbut twan guay khou ramh khwan chu e: hei tei Isaraelmei nunc kapna huaycha bammei khwan e, kalam thu kaniw RINGHPOUC kaniw Racguangc ta amuclouna paapc taancna lungc the.

²²RINGHPOUC khou rui tat pat kanmei nangniw meic guayna hanc guang dat ro; kamei rui nangniw ta tigaylou dat puni, kumna lwmnuhmei tiswlou dat puni. Nangniw kumna sa o, “Ngguay, aniw RINGHPOUC khou guang the, kalam thu kamei hei aniw Racguangc e.

²³Ravbamv Chyngbut twan chyng twan khou rav baihmei ta kalum bammei tei rui nkhavloumei tuang ramhkhat na sini maek ge. Isaraelmei ta nkhavloumei hei RINGHPOUC aniu Racguangc na rui de.

²⁴Tiki Baal, chanymei rav ta kalum khou rui lauziu, guaih, aniu nac mpouh aluh guay, rey khou rui aniu pupouc nunc rui taanc patloumei guay amaan ngam the.

²⁵Aniu tuang zakmei rui tigumbinlouna aniu zakna zip bam nimei tuang di the. Aniu khatni aniu pupouc nunc rui RINGHPOUC aniu Racguangc ruc khou kaganv kathuicna khou paapc taanc the; aniu katuang latdanv piu zat mak khe.”