Read Rongmei Naga JEREMIA 30 Bible Online

JEREMIA 30 - Rongmei Naga bible

JEREMIA 30

¹RINGHPOUC khou rui Jeremia khou lat tiguang khwan e:

²akhou heikumna sa the: “Ai rui nang khou saloumei kaguayna tei latrik buk khou hy keylou o,

³kalam thu ai rui amei Isaraelmei khatni Judamei ta laalou dat nimei ganv guang puni. Ai rui kaniw pupouc nunc khang tiiloumei ramc khou tei kaniw ta phungc guanglou dat puni, kumna kaniw hei tei laa dat puni. RINGHPOUC ai rui sa the.”

⁴RINGHPOUC rui Isaraelmei khatni Judamei khou kumna sa the:

⁵“Ping kasic karoucna kapmei khwan ai chu e, pingna kapmei khwan ai chu e, nchu-nzaenghmei khwan hamh the.

⁶Thanv o khatni kakhanh zauc o! Nggaanvmei rui ngana puanc dina cho? Tabui swna nahbam nimeipui kumcna meic kathuicna kabung kabung kagoucna bam tu cho? Tabui swna meic kathuicna heidi nda dianh dian bam tu cho?

⁷Apuileni! Adikamv Ping kasic-karoucmei tingmik sw puni cho; hei tei lev kida nuhmei tingmik maek khe— amei nunc khang ryanramei tingmik the, tiki kaniw duak pat puni.”

⁸Ngamparymei RINGHPOUC rui sa e, “Mi tingmik kiu guang pwkhou, kaniw guang khou lou bammei guangkhaengv tei khatni kaniw ta bangclou bammei kangriang tei laa ganclou puni, kumna kaniw gin nunc bangc sw dat lak khe.

⁹Mi phaan tei kaniw rui RINGHPOUC kaniw Racguangc khatni David kiktamei ai rui guangh tiswloumeipu tuang siamruai swna kaniw lungc dat puni.

¹⁰“Amei nuncle, ping riu; Isaraelmei nuncle, ping kasicna bam riu. Ai rui nangniw ta mi duhmei kandic thangc tei rui, nangniw kangmei swna bammei kandic thangc rui kanpatlou dat puni. Nangniw kai khou guang datna nchu-nzaenghna lungc bam dat puni; nangniw kadan dat lak khe, meic gaanv khat na rui sini nangniw ta tiping dat lak khe RINGHPOUC rui sa e.

¹¹Ai rui nangniw ta kanlou khang lamluailou bam e. Nangniw ta zin phakloumei kandic guay tuang zaatc guay ta tei ai rui swkamut kamailou puni, tiki nangniw ta thu swkamut kamai lak ge. Ai rui nangniw ta riap makna ganclou lak ge; tiki ai nangniw ta riap pwkhou, nchumhna sw puni. RINGHPOUC ai rui sa the.”

¹²RINGHPOUC rui kamei nunc khou sa e, “Nang tuang zamcdai hei gay dat ngam lak khe, nang tuang zamzei hei gay dat ngam lak khe.

¹³Nangniw ta zauclou nimei meic maek khe, nangniw asuh tigay dat khang puc maek khe, nangniw ta tigay dat nimei tuang ramh maek khe, tigay dat khang machunhmei ni maek khe.

¹⁴Nangniw rui nzianmei guay nangniw ta amuc the; kaniw nangniw ta kadan dat taan the. Ai rui nangniw ta zauczihmei ta kumcna adow the; nangniw tuang paap geihmei zaeng rui nangniw ramsi hei si langvmei zaeng rui nangniw tuang dandi hei ranv the.

¹⁵Nangniw tuang zamzei lam khou nangniw lat sa dat ri tho; nangniw ta tigay dat khang ramh maek khe. Ai rui nangniw ta heikumna riap puni the, kalam thu nangniw paap hei geic the khatni nangniw tuang simei hei daic the.

¹⁶Tiki ntaw thu, nangniw ta swkasicmei nunc ta sw kasic dat puni the, khatni nangniw ta zauczihmei nunc ta tei kangmei nunc swna zay tat dat puni the. Nangniw ta raimei nunc ta rai dat puni the, nangniw tuang asutmei nunc tuang asut dat puni the.

¹⁷Nangniw ta zauczihmei nunc rui ‘Zaion hei gancloumei di the; meic gaanv khat na rui sini kakhang kadanlou dat mak khe,’ twna sa bam sini, ai rui nangniw ta tigaylou dat puni; ai rui nangniw zamzei tigaylou dat puni. RINGHPOUC ai rui sa the.”

¹⁸RINGHPOUC rui sa e, “Ai rui amei nunc ta kaniw kandic khou tiguanglou dat puni, kumna kaikhunh kathuic khou suaihiamlou dat puni; Jerusalem ta kasiamh thau dat puni kumna mi tuang kaidai tuang guanghkai sw thau dat puni.

¹⁹Mi kaidai khou tei lungc bammei guay thuancna suan puni; kaniw neihlana kauc puni. Asuaihiam paan rui kaniw lungc kingckiuc puni; asuaihiam paan rui kaniw ta chakhwang champouh sw puni.

²⁰Kaniw tuang reynungc guangcdic pumtan tei ai rui tiilou dat puni kumna hei tei ntipna lingclou dat puni; kaniw ta raimei guay ta tei ai rui dandi tii puni.

²¹Kaniw pang khou rui dihsinmei cha pat dat puni kaniw pang khou rui guangh cha pat dat puni Ai rui kata kaw pwkhou kamei adaeng khou guang puni, kalam thu kaw makna thow guang bauc nina cho?

²²Kaniw hei amei nunc sw puni kumna ai rui kaniw Racguangc swlou puni. RINGHPOUC ai rui sa the.”

²³Zauclo! Ravguangc lungpuam pwanzingh tei meicsimei nunc py ruc khou tei pwansa karai kumc guanglou puni the.

²⁴Kamei rui taanc nimei guay taanc tangh mak saanv hei tei luai dat lak khe. Thei thangc kamei nunc rui mi hei nthanna thay puni.