Read Rongmei Naga JEREMIA 31 Bible Online

JEREMIA 31 - Rongmei Naga bible

JEREMIA 31

¹RINGHPOUC rui sa the, “Ai rui Isaraelmei kaikhwang guayna Racguangc, khatni kaniw rui amei nunc sw nimei ganv guang the.

²Theihmei khou rui pak duak patmei nunc khou ai rui tazikramv khou kaniw ta zauc nzianlou the. Isaraelmei nunc zaeng nthaekcmei ta agwnna bam khou,

³ai rui kaniw daeng khou guangna lyanlou the. Isaraelmei nuncle, ai nangniw ta kaganv kathuih na nzian e, kumhpui zaeng rui ai rui nangniw ta taek makna nzianmei lyanlou bammei tuang e.

⁴Ai rui nangniw ta kasiamh thaulou dat puni. Nangniw rui nangniw tuang syamtuaic zaythau datna neihlana alaamh dat puni he liuchang Isarael.

⁵Nangniw Samaria tuang luangcbut guay khou drakhalau ruaic lana kathai rei tuna lungc dat puni.

⁶Ngguay, ‘Aniu Zaion thangc ku di kho, RINGHPOUC aniu Racguangc daeng khou ku di kho’ twna rigaanvmei nunc rui sa nimei ganv guang the.”

⁷RINGHPOUC rui sa e, “Zaatc pang khou daic liangmei Isaraelmei zaat khang hei neihlana suan o. Nangniw thuanhmei lu suan o, ‘RINGHPOUC rui kamei nunc ta kanlou the; theic nsaekcloumei guay ta kamei rui kan patlou the.’

⁸Ai rui kaniw ta dihpy thangc rui phungc guang dat puni khatni kandih tintou thangc rui khuam kaduai dat puni. Kaphay baumei ni kamik tiatmei ni, kapumc nritmei khatni nahbam changh bam pw nimei pui nunc ni kaniw lev twna guang puni, kaniw zaatc daihmei swna guang dat puni.

⁹Amei nunc tei kapna hanc guang dat puni, huayneyna guang puni ai rui kaniw ta zaylouna. Ai rui kaniw ta duithuak daeng khou lwanna titat puni, phaysuymei bam maekmei chaeng gaymei khou zaylou puni. Ai hei Isaraelmei khang kaniw pu e, Ephraim hei anac gaanvthaihmei e.”

¹⁰RINGHPOUC rui sa e, “Zaatc nuncle, ai rui samei hei nking o, duhmei duipui tin thangc alat hei dinc ndauhlou o. Ai rui amei nunc ta zin phaklou the, tiki ai rui kaniw ta khuam kaduai dat puni the, khatni lauziu gaenghmeipu rui kalauziu nunc ta gaek kumc gaeklou puni.

¹¹Ai rui Isaraelmei ta kangamv daihmei zaat akhat baanc khou rui tiduaklou the kumna kaniw ta thuakpatlou the.

¹²Kaniw Zaion Chyng khou guang datna mi khou tei neihlana lu suan puni khatni kaniw kaipat— nap-bi, drakhadui, Olive thauc, lauziu khatni guaih-bangh katna neihla bam puni. Kaniw tei dui zwan chuymei pikwan kumc puni the; kaniw khang gaat tuang nai dat lak khe.

¹³Khoutei tunac nunc neihlana alaamh puni the, khatni nggaanvmei alauc, gaanvthaih neihla puni the. Ai rui kaniw ta swmlou puni the kumna kaniw tuang ryanra tei neihlamei khou tiguanhlou puni the, kaniw zaengsi tei zaenggaymei khou tiguanhlou puni the.

¹⁴Ai rui amuh nunc ta tugay zangvgaymei taektw rui titu nggulou puni the, khatni amei nunc guay khang ramh gaat tuang nai dat lak khe. RINGHPOUC ai rui sa the.”

¹⁵RINGHPOUC rui sa e, “Rama khou ramh khwan akhat chu e, huayna kap ranvna kapmei khwan chu e. Rachel rui theic kanmei kanac nunc ta huayna kap bam e. Kata swmgay dat ngam mak khe, kalam thu kanac nunc gaanv khat sini maek khe.

¹⁶Nang kapmei nthaekc tho kumna nang mikdui thut ganc tho. Nang rui nang nac nunc khang taancloumei khang tei kathai ti-nthailou makna taan lak ge; kaniw tei zauczihmei kandic thangc rui hanc guang dat puni the.

¹⁷Thei thangc khang machunhmei nai the; nang nac nunc kai guang dat puni the. RINGHPOUC ai rui sa the.

¹⁸“Isaraelmei nunc rui zaengsina kumna samei ai chu e, ‘He RINGHPOUC, aniw hei nrakmei khouringc kumc the, tiki aniw ta latpiu khang nchamlou the, kalam thu nang hei RINGHPOUC aniw Racguangc de.

¹⁹Aniw nang khou rui ducna tat the, tiki aniw katumcna hanc guang dat nii the. Nang rui aniw ta riaploumei tangv, zaengsina aniw py nkhum key the. Aniw zak the khatni zawsi the, kalam thu chabwan douc aniw paapc taanc the.’

²⁰“Isaraelmeile, nang hei ai rui nzian liangmei nac mpouh e, ai rui nzian liangmei nac e. Ai rui nang zanc satow patpui sik ai nang ta nzianna kakhanh e. Alung hei nang khou lou the, ai rui nang ta zauc nzianlou puni. RINGHPOUC rui sa the.

²¹Chaeng lwn thay khang chaeng tei madanclou tho; nangniw guangmei chaeng tei phu pat dat tho. Isaraelmei nuncle, guang dat tho, nangniw rui ganclou kanmei kaidai guay khou tei guang dat tho.

²²Asaanh nangniw lwmsina bam nina cho lwmnuh makmei nuncle? Ai rui ramhkhat kathanc khatni kadath datmei, ntumei rui nggaanvmei ta gaek bammei kumhmei kadath datmei damclou the.”

²³Ngamparymei RINGHPOUC, Isaraelmei Racguangc rui sa e, “Ai rui kaniw ta kaniw tuang kandic khou nduangh guanglou dat pwkhou ‘RINGHPOUC rui Jerusalem tuang nthanmei chyngbut ti hei, kamei bammei nthanmei bamv ti hei suaihiamlou pw diu,’ twna Juda kandic khou khatni mi tuang kaidai guay khou sa dat puni.

²⁴Juda kandic khatni mi tuang kaidai guay khou tei meic nunc tei lungc dat puni kumna khou tei kailau taanhmei nunc khatni kaniw lauziu pang gaengcna bammei lauziu gaenghmei nunc ni nai geic dat puni.

²⁵Lakna bammei nunc ta tei ai rui kachaengc tiringclou dat puni khatni ndaapcna ngam makna bammei nunc ta tei titu nggulou dat puni.

²⁶Khou kiu meic nunc rui ‘Ai zipkeyna zipthau dat ki meichaengc ringc dyng the,’ twna sa puni the.

²⁷“Isaraelmei khatni Juda kandic hei maansei khatni khouringh khounah rui padikna lungc dat nimei ganv guang pw the twna RINGHPOUC ai rui sa e.

²⁸Kamaan phuai pat khang, zaybau key khang, swpangv khang, swkamut kamailou khang khatni swkatuptuaylou khang ai rui lunghlouna sw kanmei kumcna, ai rui kaniw ta lingclou khang khatni kasiamh thau dat khang kadanna sw puni.

²⁹Mi ganv kiu guang pwkhou, ‘Kapui kapu rui drakhathai khianghmei tu tina kanah nunc huc nkym e,’ twna meic nunc rui sa dat pw lak khe.

³⁰Mi phaan tei drakhathai khianghmei tu tupui mei tei kahuc nkym puni the; kumna paapc taanv taanhpui mei tei kapaap zaeng rui theic puni the.”

³¹RINGHPOUC rui sa e, “Ai rui Isaraelmei khatni Judamei lev akak khou latdyng kathanc sw dat nimei ganv guang pw the.

³²Mi hei ai rui kaniw pupouc nunc ta kaniw baanctyang zayna Izip khou rui zay patmei douc tei kaniw lev twna swlou kanmei latdyng raanv tei kumhmei hamh the. Ai rui kaniw tuang gaanv kumcna bam tisini kaniw mi latdyng tei ngaek mak ge.

³³Ai rui Isaraelmei nunc lev sw nimei latdyng kiu mi hei the: Ai rui atuang latdyng kaniw lungc khou lou puni kumna hei tei kaniw lungc khou hylou puni. Ai rui kaniw Racguangc sw puni, kumna kaniw amei nunc sw puni.

³⁴Meic gaanv khat na sini kapammei akhat ta RINGHPOUC ta thay o twna ncham dat lak khe, kalam thu kaniw nthyammei khou rui thauna daic liangmei nganvna ata thay ngam puni the. Ai rui kaniw tuang paap ningtow bam dat lak khe. RINGHPOUC ai rui sa the.”

³⁵Kalaanv gaanh khang RINGHPOUC rui neihmik tiilou the, zingbangc gaanh khang bw khatni gaanchuangcna tiilou the. Kamei rui duipui ta kaguatc thauna tikamuatc kachin karolou the, kazanc hei Ngamparymei RINGHPOUC twna kaw e.

³⁶Bw, neih, gaanchuangcna guay nai bam saanv Isaraelmei hei zaatc akhat swna bam puni twna kamei rui latdyng swlou e.

³⁷Tingpuk kau ndath tanghpui nungc rui, kandih bamv suic tanghpui nungc rui kamei rui Isaraelmei ta ganc pat puni kaniw tuang taanv zaeng rui. RINGHPOUC ai rui sa the.

³⁸RINGHPOUC rui sa e, “Jerusalem hei atuang kaidai swna neihkey thangc Hananel Rihphaankai Kakwn Raengckat nganv kasiamh thau dat nimei ganv guang pw the.

³⁹Ramvrei tei khou tei rui thauna neihkey biak thangc keyna Gareb chyng key tangcna Goa khou ngguic guang the.

⁴⁰Theihmei nunc ta phuploumei khatni tanacmei puat gancloumei nzaengc kapwm tei khatni Kidron duithuak ruc tuang ramv guay neihpat biak thangc Takuanh Raengckat nganv tei atuang nthanmei bamv sw puni. Mi kaidai tei swrakey dat lak khe hamh e thei swkamut kamai dat lak khe.”